ಇಸ್ರೇಲ್​-ಹಮಾಸ್​ ಯುದ್ಧ: ಗಾಜಾದಲ್ಲಿ ಪ್ರತೀ ನಿತ್ಯ 37 ತಾಯಂದಿರ ಸಾವು - Gaza

ಗಾಜಾ ಪಟ್ಟಿಯಲ್ಲಿ ಇಸ್ರೇಲ್​ ನಡೆಸುತ್ತಿರುವ ದಾಳಿಯಿಂದ ಈವರೆಗೆ 31,988 ಮಂದಿ ಸಾವನ್ನಪ್ಪಿದ್ದಾರೆ ಎಂದು ವರದಿಯಾಗಿದೆ.

ಗಾಜಾ: ಗಾಜಾದಲ್ಲಿ ಇಸ್ರೇಲ್ ನಡೆಸುತ್ತಿರುವ ದಾಳಿಯಿಂದ ಪ್ರತಿನಿತ್ಯ 37 ತಾಯಂದಿರು ಬಲಿಯಾಗುತ್ತಿದ್ದಾರೆ ಎಂದು ಪ್ಯಾಲೆಸ್ತೇನಿಯನ್​ ರೆಡ್​ ಕ್ರೆಸೆಂಟ್​ ಸೊಸೈಟಿ ತಿಳಿಸಿದೆ. ಪ್ಯಾಲೆಸ್ತೇನಿಯನ್​ ಲಿಬರೇಶನ್ ಆರ್ಗನೈಸೇಶನ್‌ನಲ್ಲಿ ಡಿಟೈನಿಸ್​​ ಮತ್ತು ಪ್ಯಾಲೆಸ್ತೇನಿಯನ್​ ಪ್ರಿಸನರ್ಸ್ ಕ್ಲಬ್ ಅಸೋಸಿಯೇಷನ್ ತಾಯಂದಿರ ದಿನದ ಹಿನ್ನೆಲೆಯಲ್ಲಿ ಈ ಕುರಿತು ಜಂಟಿ ಹೇಳಿಕೆ ಬಿಡುಗಡೆ ಮಾಡಿದೆ. ಗಾಜಾದಲ್ಲಿ ಇಸ್ರೇಲ್​ ನಡೆಸುತ್ತಿರುವ ದಾಳಿ ಭಾರೀ ಪ್ರಮಾಣದಲ್ಲಿ ಪ್ಯಾಲೆಸ್ತೇನಿಯನ್​ ತಾಯಂದಿರು ಮತ್ತು ಮಕ್ಕಳ ಸಾವಿಗೆ ಕಾರಣವಾಗುತ್ತಿದೆ ಎಂದು ತಿಳಿಸಿದೆ ಎಂದು ಕ್ಸಿನ್ಹುವಾ ಸುದ್ದಿ ಸಂಸ್ಥೆ ವರದಿ ಮಾಡಿದೆ.

ಹಮಾಸ್​​ ವಿರುದ್ಧ ಅಕ್ಟೋಬರ್​ನಲ್ಲಿ ಇಸ್ರೇಲ್​ ಯುದ್ಧ ಆರಂಭಿಸಿದಾಗಿನಿಂದ ಇಸ್ರೇಲ್​ ಸೇನೆ ಪ್ಯಾಲೆಸ್ತೇನಿಯನ್​ ಮಹಿಳೆಯರನ್ನು ಸಾಮೂಹಿಕ ಬಂಧಿಸುತ್ತಿದೆ ಎಂದು ಇದೇ ವೇಳೆ ತಿಳಿಸಿದೆ. 2023ರ ಅಕ್ಟೋಬರ್​ 7ರ ಬಳಿಕ ಪ್ಯಾಲೆಸ್ತೇನಿಯನ್ ಮಹಿಳೆಯರು, ಕೈದಿಗಳ ಹಕ್ಕುಗಳ ಉಲ್ಲಂಘನೆ ನಡೆಯುತ್ತಿದೆ. ಹಮಾಸ್​ ಮತ್ತು ಪ್ಯಾಲೆಸ್ತೇನಿಯನ್ ಪುರುಷರು ಮತ್ತು ಗಂಡು ಮಕ್ಕಳನ್ನು ಬೆದರಿಸಲು ಅವರು ಮಹಿಳೆಯರನ್ನು ಒತ್ತೆಯಾಳುವಾಗಿರಿಸಿಕೊಂಡಿದ್ದಾರೆ ಎಂದು ದೂರಲಾಗಿದೆ. ಮಹಿಳೆಯರ ವಿರುದ್ಧ ನಡೆಯುತ್ತಿರುವ ಅಪಾರಾಧ ಮತ್ತು ಮಹಿಳೆಯರನ್ನು​ ವಶಕ್ಕೆ ಪಡೆದಿರುವ ಇಸ್ರೇಲ್​​ ಕ್ರಮಕ್ಕೆ ಅಂತಾರಾಷ್ಟ್ರೀಯ ಮಹಿಳಾ ಸಂಘಟನೆಗಳು ಧ್ವನಿ ಎತ್ತಿವೆ.

ಗಾಜಾದಲ್ಲಿರುವ ಶಿಫಾ ಆಸ್ಪತ್ರೆಯ ಮೇಲೆ ಇಸ್ರೇಲ್​ ದಾಳಿ ಮುಂದುವರೆಸಿದ್ದು, ಇಸ್ರೇಲ್​ ಸೈನಿಕರು 140 ಜನರನ್ನು ಕೊಂದಿದ್ದು, ಹಿರಿಯ ಹಮಾಸ್​ ನಾಯಕರನ್ನು ಬಂಧಿಸಿರುವುದಾಗಿ ತಿಳಿಸಿದೆ. ಸರಿಸುಮಾರು 600 ಜನರನ್ನು ಬಂಧಿಸಲಾಗಿದ್ದು, 140 ಮಂದಿಯನ್ನು ಕೊಲ್ಲಲಾಗಿದೆ ಎಂದಿರುವ ಸೇನೆ, ಅವರೆಲ್ಲಾ ಉಗ್ರರು ಎಂದು ಹೇಳಿಕೆಯಲ್ಲಿ ತಿಳಿಸಿದೆ.

ಸಾವಿನ ಸಂಖ್ಯೆ 31,988ಕ್ಕೇರಿಕೆ: ಗಾಜಾ ಪಟ್ಟಿಯಲ್ಲಿ ಇಸ್ರೇಲ್​ ನಡೆಸುತ್ತಿರುವ ಯುದ್ಧದಿಂದ ಒಟ್ಟು 31,988 ಮಂದಿ ಸಾವನ್ನಪ್ಪಿದ್ದಾರೆ ಎಂದು ಗಾಜಾದಲ್ಲಿ ಹಮಾಸ್​ನ ಆರೋಗ್ಯ ಸಚಿವರು ತಿಳಿಸಿದ್ದಾರೆ. ಇಸ್ರೇಲ್​ ಸೇನೆ ಕಳೆದ 24 ಗಂಟೆಯಲ್ಲಿ 65 ಮಂದಿಯನ್ನು ಕೊಂದಿದ್ದು, 92 ಮಂದಿ ಗಾಯಗೊಂಡಿದ್ದಾರೆ. ಒಟ್ಟಾರೆ ಸಾವಿನ ಪ್ರಕರಣ 31,988 ಆಗಿದ್ದು 74,188 ಮಂದಿ ಗಾಯಗೊಂಡಿದ್ದಾರೆ ಎಂದು ಕ್ಸಿನ್ಹುವಾ ಸುದ್ದಿ ಸಂಸ್ಥೆ ವರದಿ ಮಾಡಿದೆ. (ಐಎಎನ್​ಎಸ್​)

ಇದನ್ನೂ ಓದಿ: 31,645ಕ್ಕೇರಿದ ಪ್ಯಾಲೆಸ್ಟೈನಿಯರ ಸಾವಿನ ಸಂಖ್ಯೆ: ಕದನವಿರಾಮಕ್ಕೆ ಮೂಡದ ಒಮ್ಮತ