ಕಾಂತಾರ ಖ್ಯಾತಿಯ ರಿಷಬ್ ಶೆಟ್ಟಿ, ಆರ್ಆರ್ಆರ್ ಖ್ಯಾತಿಯ ಜೂನಿಯರ್ ಎನ್ಟಿಆರ್, ಕೆಜಿಎಫ್ ಖ್ಯಾತಿಯ ಪ್ರಶಾಂತ್ ನೀಲ್ ಒಂದೆಡೆ ಸೇರಿದ್ದು, ಸೋಷಿಯಲ್ ಮೀಡಿಯಾದಲ್ಲಿ ಬಿರುಗಾಳಿ ಎದ್ದಿದೆ. ಮಾರ್ಚ್ 1, ಶುಕ್ರವಾರದಂದು ತೆಲುಗು ಸೂಪರ್‌ ಸ್ಟಾರ್ ಜೂನಿಯರ್ ಎನ್ಟಿಆರ್ ಬೆಂಗಳೂರಿನಲ್ಲಿ ಕನ್ನಡ ಚಿತ್ರರಂಗದ ಪ್ರತಿಭಾವಂತರನ್ನು ಭೇಟಿಯಾಗಿದ್ದಾರೆ. ತಾರೆಯರು ಹಂಚಿಕೊಂಡ ಹೊಸ ಫೋಟೋಗಳು ಸಾಮಾಜಿಕ ಜಾಲತಾಣದಲ್ಲಿ ಜಾಗ ಗಿಟ್ಟಿಸಿಕೊಂಡಿವೆ.
ಈ ಫೋಟೋಗಳು ಶೇರ್ ಆಗುವ ಮುನ್ನ ಜೂನಿಯರ್ ಎನ್ಟಿಆರ್ ಅವರ ವಿಡಿಯೋ ಹೈದರಾಬಾದ್ ವಿಮಾನ ನಿಲ್ದಾಣದಿಂದ ಹೊರಬಿದ್ದಿತ್ತು. ನಂತರ ಶೆಟ್ಟಿ ಮತ್ತು ಎನ್ಟಿಆರ್ ಈ ಫೋಟೋಗಳನ್ನು ಹಂಚಿಕೊಂಡಿದ್ದಾರೆ. ಇದೊಂದು ಖಾಸಗಿ ಭೇಟಿ ಎಂದು ನಂಬಲಾಗಿದೆ. ಫೋಟೋ ಹಂಚಿಕೊಂಡ ತಾರೆಯರು, "ಬೆಂಗಳೂರು ಡೈರಿಸ್" ಎಂದು ಕ್ಯಾಪ್ಷನ್ ಕೊಟ್ಟಿದ್ದಾರೆ.
ಸಿನಿರಂಗದ ಪ್ರತಿಭಾನ್ವಿತರು ಶೇರ್ ಮಾಡಿರೋ ಈ ಪೋಸ್ಟ್‌ನಲ್ಲಿ ಕನ್ನಡ ಚಿತ್ರರಂಗದ ಖ್ಯಾತ ಚಲನಚಿತ್ರ ನಿರ್ಮಾಣ ಸಂಸ್ಥೆ ಹಾಗೂ ರಿಷಬ್, ಪ್ರಶಾಂತ್ ನೀಲ್ ಅವರ ಸಿನಿಮಾಗಳನ್ನು ನಿರ್ಮಿಸಿರೋ ಹೊಂಬಾಳೆ ಫಿಲ್ಮ್ಸ್ಸ್ನ ನಿರ್ಮಾಪಕ ವಿಜಯ್ ಕಿರಗಂದೂರ್ ಕೂಡ ಜೊತೆಗಿದ್ದಾರೆ. ಅಲ್ಲದೇ ಸಿನಿ ದಿಗ್ಗಜರ ಬಾಳ ಸಂಗಾತಿಯರಾದ ಲಕ್ಷ್ಮಿ ಪ್ರಣತಿ, ಪ್ರಗತಿ ಶೆಟ್ಟಿ ಮತ್ತು ಲಿಕಿತಾ ನೀಲ್ ಕೂಡ ಇದ್ದಾರೆ.
ಇದನ್ನೂ ಓದಿ:'ಕೆರೆಬೇಟೆ'ಗೆ ಬಿ.ವೈ ರಾಘವೇಂದ್ರ, ಆರಗ ಜ್ಞಾನೇಂದ್ರ ಸಾಥ್: ಟೈಟಲ್ ಸಾಂಗ್ ರಿಲೀಸ್
ಜೂನಿಯರ್ ಎನ್ಟಿಆರ್ ಅವರ ಮುಂದಿನ ಬಹುನಿರೀಕ್ಷಿತ ಚಿತ್ರ 'ದೇವರ'. ಕೊರಟಾಲ ಶಿವ ನಿರ್ದೇಶನದ ಈ ಆ್ಯಕ್ಷನ್ - ಪ್ಯಾಕ್ಡ್ ಚಿತ್ರದ ಮೇಲೆ ಪ್ರೇಕ್ಷಕರು ಸಾಕಷ್ಟು ನಿರೀಕ್ಷೆ ಇಟ್ಟುಕೊಂಡಿದ್ದಾರೆ. 2016ರಲ್ಲಿ ಬಂದ ಜನತಾ ಗ್ಯಾರೇಜ್ ಸಿನಿಮಾ ನಂತರ ಕೊರಟಾಲ ಶಿವ ಮತ್ತು ಜೂನಿಯರ್ ಎನ್ಟಿಆರ್ ಕಾಂಬಿನೇಶನ್ನ ಎರಡನೇ ಚಿತ್ರವಿದು. ಬಾಲಿವುಡ್ ಬೆಡಗಿ ಜಾಹ್ನವಿ ಕಪೂರ್ ಇದೇ ಮೊದಲ ಬಾರಿಗೆ ಜೂನಿಯರ್ ಎನ್ಟಿಆರ್ ಜೊತೆ ಕೈ ಜೋಡಿಸಿದ್ದಾರೆ. ಅಲ್ಲದೇ, ನಟಿಗಿದು ತೆಲುಗಿನಲ್ಲಿ ಚೊಚ್ಚಲ ಚಿತ್ರ ಕೂಡ ಹೌದು. ಸೈಫ್ ಅಲಿ ಖಾನ್, ಶೈನ್ ಟಾಮ್ ಚಾಕೊ ಕೂಡ ಪ್ರಮುಖ ಪಾತ್ರಗಳನ್ನು ನಿರ್ವಹಿಸಿದ್ದಾರೆ. ಖ್ಯಾತ ಗಾಯಕ ಅನಿರುಧ್ ರವಿಚಂದರ್ ಅವರ ಸಂಗೀತವಿದೆ.
ಇದನ್ನೂ ಓದಿ:ಅನಂತ್ ಅಂಬಾನಿ ಗ್ರ್ಯಾಂಡ್ ಪ್ರೀ ವೆಡ್ಡಿಂಗ್ ಸೆಲೆಬ್ರೇಶನ್ ಫೋಟೋಗಳಿಲ್ಲಿವೆ ನೋಡಿ
ಇದಲ್ಲದೇ, ಪ್ರಶಾಂತ್ ನೀಲ್ ಜೊತೆ ಸಿನಿಮಾ ಮಾಡಲಿದ್ದಾರೆ. ಈ ಚಿತ್ರವನ್ನು ತಾತ್ಕಾಲಿಕವಾಗಿ ಎನ್ಟಿಆರ್ 31 ಎಂದು ಹೆಸರಿಸಲಾಗಿದೆ. ಈ ಇಬ್ಬರ ಸದ್ಯದ ಸಿನಿಮಾಗಳು ಪೂರ್ಣಗೊಂಡ ಬಳಿಕವಷ್ಟೇ ಎನ್ಟಿಆರ್ 31 ಆರಂಭವಾಗಲಿದೆ. ಪ್ರಭಾಸ್ ನಟನೆಯ ಸಲಾರ್‌ 2 ನೀಲ್ ಬಳಿ ಇದೆ. ಇನ್ನೂ ಕಾಂತಾರ ಮೂಲಕ ಸಾಕಷ್ಟು ಜನಪ್ರಿಯರಾಗಿರುವ ರಿಷಬ್ ಶೆಟ್ಟಿ ಪ್ರಸ್ತುತ ಅದರ ಸೀಕ್ವೆಲ್ ಕೆಲಸದಲ್ಲಿ ಬ್ಯುಸಿಯಾಗಿದ್ದಾರೆ.
