"ಶಿಸ್ತಿನ ಹೊರತಾಗಿ ಯಶಸ್ಸಿಗೆ ಬೇರೆ ರಹಸ್ಯವಿಲ್ಲ. ಅದಿಲ್ಲದೆ, ಯಾವುದೇ ಪ್ರತಿಭೆ ಅರಳಲು ಸಾಧ್ಯವಿಲ್ಲ". ಇದು ಮಾಧ್ಯಮ ಲೋಕದ ದಿಗ್ಗಜ ರಾಮೋಜಿ ಗ್ರೂಪ್ ಅಧ್ಯಕ್ಷ, ಈನಾಡು ಸಂಸ್ಥೆಯ ಸಂಸ್ಥಾಪಕರಾದ ಪದ್ಮವಿಭೂಷಣ ಪುರಸ್ಕೃತ ದಿ.ರಾಮೋಜಿ ರಾವ್ ಅವರ ಬದುಕಿನ ಪಾಠ.
ಮಾಧ್ಯಮ ಲೋಕದಲ್ಲಿ ಕ್ರಾಂತಿ, ಸದಭಿರುಚಿಯ ಚಲನಚಿತ್ರಗಳು, ತೂಕದ ಮಾತುಗಳ ಮಾಂತ್ರಿಕ ಹಾಗೆಯೇ ಉದ್ಯಮಶೀಲತೆಯ ಜಾದುಗಾರರಾಗಿ ರಾವ್ ಚಿರಪರಿಚಿತರು. ಈ ಎಲ್ಲವೂ ಒಬ್ಬ ವ್ಯಕ್ತಿಯಲ್ಲಿ ಅಡಕವಾಗಿತ್ತೆಂದರೆ ಅದಕ್ಕೆ ನಿದರ್ಶನ ರಾಮೋಜಿ ರಾವ್ ಮಾತ್ರ. ರಾಮೋಜಿ ರಾವ್ ತಮ್ಮ ಶಿಖರ ಸದೃಶ ಜೀವನ ಸಾಧನೆಗಳೊಂದಿಗೆ, ಅಸಂಖ್ಯಾತ ಅಭಿಮಾನಿಗಳು ಮತ್ತು ಲಕ್ಷಾಂತರ ಅನುಯಾಯಿಗಳನ್ನು ಗಳಿಸಿದವರು. ಪತ್ರಿಕಾ ಸ್ವಾತಂತ್ರ್ಯ, ಪತ್ರಿಕೋದ್ಯಮದಲ್ಲಿನ ನಾವೀನ್ಯತೆ, ತಮ್ಮ ಪ್ರತಿಯೊಂದು ಪ್ರಯತ್ನಗಳಲ್ಲಿ ವೃತ್ತಿಪರತೆ ಮತ್ತು ಹೊಸ ಬಗೆಯ ಪ್ರಯೋಗಕ್ಕಾಗಿ ಜೀವನಪರ್ಯಂತ ಹೋರಾಟಗಾರನಂತೆ ಬಾಳಿದವರು ರಾವ್.
ಸದಾಕಾಲ ಜೀವಂತ ರಾಮೋಜಿ ರಾವ್ ಪರಂಪರೆ: ಆಂಧ್ರ ಪ್ರದೇಶದ ಗುಂಟೂರಿನ ಸಮೀಪದ ಪೆದಪರುಪುಡಿ ಗ್ರಾಮದಲ್ಲಿ 1936 ನವೆಂಬರ್ 16ರಂದು ರೈತ ಕುಟುಂಬದಲ್ಲಿ ಜನಿಸಿದ ರಾಮೋಜಿ ರಾವ್ ಸಾಧನೆ ಅಸಾಮಾನ್ಯವಾದದ್ದು. 2024 ಜೂನ್ 8ರಂದು ತಮ್ಮ 87ನೇ ವಯಸ್ಸಿನಲ್ಲಿ ರಾವ್ ಇಹಲೋಕ ತ್ಯಜಿಸಿದ್ದರು. ಆದರೆ ತಾವು ಪ್ರವೇಶಿಸಿದ ಪ್ರತಿಯೊಂದು ಕ್ಷೇತ್ರಕ್ಕೂ ತಮ್ಮದೇ ಆದ ವಿಶಿಷ್ಟ ಕೊಡುಗೆ ನೀಡಿದ್ದು, ಶಾಶ್ವತ ಪರಂಪರೆಯನ್ನೇ ಬಿಟ್ಟು ಹೋಗಿದ್ದಾರೆ. ಹೀಗಾಗಿ, ತಮ್ಮ ಹಲವು ದಶಕಗಳ ಮೇರು ಸಾಧನೆಯಲ್ಲಿ ರಾಮೋಜಿ ರಾವ್ ತೋರುದೀಪವಾಗುತ್ತಾರೆ.
ತಮ್ಮ ಕನಸಿನ ಕೂಸು, ಗಿನ್ನೆಸ್ ವಿಶ್ವದಾಖಲೆಯಾಗಿ ಮೈದಳೆದು ನಿಂತಿರುವ ವಿಶ್ವದ ಅತೀ ದೊಡ್ಡ ಸಿನಿಮಾ ನಗರಿ ಹೈದರಾಬಾದ್‌ನ ಹೃದಯಭಾಗದಲ್ಲಿರುವ ರಾಮೋಜಿ ಫಿಲ್ಮ್ ಸಿಟಿ ಕಟ್ಟಿದವರು ಇದೇ ರಾಮೋಜಿ ರಾವ್. ನಿಷ್ಠಾವಂತ ಚಲನಚಿತ್ರ ನಿರ್ಮಾಪಕರಾಗಿಯೂ, ಸಾಮಾಜಿಕ ಜವಾಬ್ದಾರಿಯ ಬದ್ಧತೆ ಹೊಂದಿರುವ ದಾನಿಗಳಾಗಿಯೂ, ಯಾವಾಗಲೂ ರೈತನ ಮಗನಾಗಿಯೇ ಇದ್ದ ರಾವ್ ಅವರು ಗಗನದೆತ್ತರ ಬೆಳೆದರೂ ತಮ್ಮ ಮೂಲ ಬೇರನ್ನು ಎಂದಿಗೂ ಮರೆತಿರಲಿಲ್ಲ. ತಾವು ಹುಟ್ಟಿ ಬೆಳೆದ ಸ್ವಂತ ಗ್ರಾಮವನ್ನು ದತ್ತು ತೆಗೆದುಕೊಂಡು ಅಭಿವೃದ್ಧಿಪಡಿಸಿದ್ದರು.
ದಣಿವರಿಯದ ಕರ್ಮಯೋಗಿ: ರಾಮೋಜಿ ರಾವ್ ತಮ್ಮಿಡೀ ಜೀವನದುದ್ದಕ್ಕೂ ಕ್ರಿಯಾಶೀಲ ವ್ಯಕ್ತಿಯಾಗಿದ್ದರು. ಮಾಧ್ಯಮ, ಚಲನಚಿತ್ರ, ಆತಿಥ್ಯ, ಹಣಕಾಸು ಭದ್ರತೆ, ಆಹಾರ, ಕೈಗಾರಿಕೆ ಹೀಗೆ ವೈವಿಧ್ಯಮಯ ಕ್ಷೇತ್ರಗಳಲ್ಲಿ ತೊಡಗಿಸಿಕೊಂಡು ಲಕ್ಷಾಂತರ ಜನರ ಜೀವನವನ್ನು ಸ್ಪರ್ಶಿಸಿದರು. ಅಪರೂಪದ ದೂರದೃಷ್ಟಿಯ ವ್ಯಕ್ತಿಯಾಗಿದ್ದ ರಾವ್, ಕನಸುಗಳನ್ನು ನನಸಾಗಿಸಲು ಅಹರ್ನಿಶಿ ದುಡಿಯುತ್ತಿದ್ದರು. ಮಾಧ್ಯಮ ಲೋಕದ ಸ್ಟೀರಿಯೊಟೈಪ್‌ಗಳನ್ನು ಭೇದಿಸಿ ಮುನ್ನಡೆದರು. ತಮ್ಮ ಕಾಲದ ಹಿರಿಯ ಪ್ರತಿಸ್ಪರ್ಧಿಗಳಿಗೆ ಸವಾಲು ಹಾಕಿದರು. ಮತ್ತು ಎಲ್ಲಾ ವರ್ಗದ ಓದುಗರಿಗೆ ಸೇವೆ ಸಲ್ಲಿಸುವಂತಹ ದಿಟ್ಟ ಹೆಜ್ಜೆಗಳನ್ನಿಟ್ಟರು.
ಚೆರುಕುರಿ ರಾಮೋಜಿ ರಾವ್ ಎಂಬುದು ಪೂರ್ಣ ಹೆಸರು. ಆದರೆ ಇವರು ರಾಮೋಜಿ ರಾವ್ ಎಂದೇ ಜನಪ್ರಿಯರು. ರಾವ್ ಅವರ ಬಹುಮುಖ ವ್ಯಕ್ತಿತ್ವದ ಹಿಂದೆ ಮಗುವಿನ ಮನಸ್ಸಿತ್ತು. ಓರ್ವ ಸ್ನೇಹಿತನಾಗಿ, ತತ್ವಜ್ಞಾನಿಯಾಗಿ ಮತ್ತು ಮಾರ್ಗದರ್ಶಕರಾಗಿ ಆದರ್ಶಪ್ರಾಯವಾಗಿದ್ದರು. ತಮ್ಮ ಸಾವಿನ ಬಳಿಕ ಅಂತ್ಯಕ್ರಿಯೆ ಎಲ್ಲಿ ಮಾಡಬೇಕೆಂಬುದನ್ನೂ ಕೂಡಾ ಮೊದಲೇ ನಿರ್ಧರಿಸಿದ್ದರು. ರಾಮೋಜಿ ಫಿಲ್ಮ್ ಸಿಟಿಯಲ್ಲಿ ರಾವ್ ಅವರ ಪಾರ್ಥಿವ ಶರೀರದ ಅಂತ್ಯಸಂಸ್ಕಾರವನ್ನು ಸಕಲ ಸರ್ಕಾರಿ ಗೌರವಗಳೊಂದಿಗೆ ನೆರವೇರಿಸಲಾಗಿತ್ತು.
ಹೊಸ ಆಲೋಚನೆಯ ಉದ್ಯಮಿ: ಉದ್ಯಮಿಯಾಗಿದ್ದ ರಾಮೋಜಿ ರಾವ್ ಯಾವಾಗಲೂ ಹೊಸ ಆಲೋಚನೆಗಳಿಂದ ತುಂಬಿದ್ದರು. ಓದುಗರಿಗಾಗಿ, ಸಿನಿಮಾ ಪ್ರೇಮಿಗಳಿಗಾಗಿ, ಆಹಾರಪ್ರಿಯರಿಗಾಗಿ, ಹಣ ಉಳಿಸುವವರಿಗಾಗಿ.. ಹೀಗೆ ಎಲ್ಲಾ ವರ್ಗದ ಜನರಿಗೆ ಏನನ್ನಾದರೂ ಸೃಷ್ಟಿಸುವ ತುಡಿತ ಹೊಂದಿದ್ದರು. ನಿರಂತರ ಶ್ರಮದಿಂದ ತಮ್ಮ ಅನೇಕ ಮಾಧ್ಯಮ ಪ್ರಕಾಶನಗಳ ಮೂಲಕ ರೈತರು, ಮಹಿಳೆಯರು, ಮಕ್ಕಳು, ಯುವಕರು ಮತ್ತು ಉದ್ಯೋಗಾಕಾಂಕ್ಷಿಗಳು ಸೇರಿದಂತೆ ಸಮಾಜದ ಎಲ್ಲಾ ವರ್ಗಗಳಿಗೂ ಒಂದೊಂದು ಯೋಜನೆಗಳ ಮೂಲಕ ತಲುಪಿದ್ದರು.
1962ರಲ್ಲಿ ಮಾರ್ಗದರ್ಶಿ ಚಿಟ್‌ಫಂಡ್‌, 1974ರಲ್ಲಿ ಈನಾಡು, 1980ರಲ್ಲಿ ಪ್ರಿಯಾ ಫುಡ್ಸ್, 1980ರಲ್ಲಿ ಡಾಲ್ಫಿನ್ ಗ್ರೂಪ್ ಆಫ್ ಹೋಟೆಲ್ಸ್, 1983ರಲ್ಲಿ ಉಷಾಕಿರಣ್ ಮೂವೀಸ್, 1995ರಲ್ಲಿ ಈಟಿವಿ ವಾಹಿನಿಗಳು, 1996ರಲ್ಲಿ ರಾಮೋಜಿ ಫಿಲ್ಮ್ ಸಿಟಿ, 2002ರಲ್ಲಿ ರಮಾದೇವಿ ಪಬ್ಲಿಕ್ ಸ್ಕೂಲ್ ಮತ್ತು 2019ರಲ್ಲಿ ಈಟಿವಿ ಭಾರತ್ ಸ್ಥಾಪಿಸಿದರು. ಇಂದಿಗೂ ಈ ಎಲ್ಲಾ ಸಂಸ್ಥೆಗಳು ಯಶಸ್ವಿಯಾಗಿ ನಡೆಯುತ್ತಿವೆ.
ಪತ್ರಿಕಾ ಸ್ವಾತಂತ್ರ್ಯಕ್ಕಾಗಿ ಹೋರಾಡಿದ್ದರು: 1975ರ ಜೂನ್ 25ರಂದು ಅಂದಿನ ಪ್ರಧಾನಿ ಇಂದಿರಾ ಗಾಂಧಿ ಅವರು ಘೋಷಿಸಿದ್ದ ತುರ್ತುಪರಿಸ್ಥಿತಿಯ ಸಂದರ್ಭದಲ್ಲಿ ಈನಾಡು ಸ್ಥಾಪಿಸಿದ್ದ ರಾಮೋಜಿ ರಾವ್, ಪತ್ರಿಕಾ ಸೆನ್ಸಾರ್‌ಶಿಪ್ ವಿರುದ್ಧ ಸೆಟೆದು ನಿಂತಿದ್ದರು. ಅವರದೇ ನೇತೃತ್ವದಲ್ಲಿ ಈನಾಡು ಸಂಸ್ಥೆ ತನ್ನ 50 ವರ್ಷಗಳ ಪಯಣದಲ್ಲಿ ಜನತೆಯ ವಿವಿಧ ಹೋರಾಟಗಳಲ್ಲಿ ನಿರಂತರವಾಗಿ ಅವರ ಪರವಾಗಿ ನಿಂತಿದೆ. ದಿನಪತ್ರಿಕೆ ಸತ್ಯ ಮತ್ತು ನ್ಯಾಯವನ್ನು ಬಲವಾಗಿ ಪ್ರತಿಪಾದಿಸುತ್ತಿದೆ. ರಾಮೋಜಿ ರಾವ್ 80ರ ದಶಕದ ಉತ್ತರಾರ್ಧದಲ್ಲಿ ಎಡಿಟರ್ಸ್ ಗಿಲ್ಡ್ ಆಫ್ ಇಂಡಿಯಾದ ಅಧ್ಯಕ್ಷರಾಗಿಯೂ ಸೇವೆ ಸಲ್ಲಿಸಿದ್ದರು.
Here is the English translation of my tribute to Ramoji Rao Garu.https://t.co/DA4uUnULQo
— Narendra Modi (@narendramodi) June 9, 2024
ಮಾಧ್ಯಮ ಕ್ಷೇತ್ರದ ಅನ್ನದಾತ: ತಮ್ಮ ಬದುಕಿನ ಐದು ದಶಕಗಳಿಗೂ ಹೆಚ್ಚು ಕಾಲ ರಾಮೋಜಿ ರಾವ್ ಅವರು ದೊಡ್ಡ ಸಂಖ್ಯೆಯ ಪತ್ರಿಕೆಗಳು, ನಿಯತಕಾಲಿಕಗಳು ಮತ್ತು ಎಲೆಕ್ಟ್ರಾನಿಕ್ ಪ್ಲಾಟ್ಪಾರ್ಮ್‌ಗಳನ್ನು ಸ್ಥಾಪಿಸಿದರು. ಇವುಗಳಲ್ಲಿ ಈನಾಡು ತೆಲುಗು ದಿನಪತ್ರಿಕೆ, ಈಟಿವಿ, ಈಟಿವಿ ಭಾರತ್, ಅನ್ನದಾತ, ಬಾಲಭಾರತ, ಚತುರ ಮತ್ತು ವಿಪುಲ ಸೇರಿವೆ. 1974ರಲ್ಲಿ ಪ್ರಾರಂಭವಾದ ಈನಾಡು ದಿನಪತ್ರಿಕೆ ತೆಲುಗು ಓದುಗರ ಹೃದಯ ಗೆದ್ದಿದೆ.
ರಾಮೋಜಿ ರಾವ್ ಅನೇಕ ಗಣ್ಯ ವ್ಯಕ್ತಿಗಳು, ರಾಜಕೀಯ ನಾಯಕರು ಮತ್ತು ನಾಗರಿಕ ಸಮಾಜದ ನಾಯಕರಿಂದ ವಿಶೇಷ ಪ್ರಶಂಸೆಗಳನ್ನು ಪಡೆದಿದ್ದಾರೆ. ಪ್ರಧಾನಿ ನರೇಂದ್ರ ಮೋದಿ ಅವರು ರಾಮೋಜಿ ರಾವ್ ಪ್ರಯತ್ನಗಳನ್ನು ಶ್ಲಾಘಿಸಿದ್ದರು. "ರಾಮೋಜಿ ಗ್ರೂಪ್ ಅಧ್ಯಕ್ಷರು ಭಾರತೀಯ ಮಾಧ್ಯಮವನ್ನು ಕ್ರಾಂತಿ ಪಥದಲ್ಲಿ ಮುನ್ನಡೆಸಿದ್ದಷ್ಟೇ ಅಲ್ಲದೆ, ಈ ಮೂಲಕ ದೇಶದ ಅಭಿವೃದ್ಧಿಗೆ ತಮ್ಮ ಕೊಡುಗೆ ನೀಡಿದ್ದಾರೆ. ನಾನು ಅವರೊಂದಿಗೆ ಸಂವಾದ ನಡೆಸಲು ಮತ್ತು ಅವರ ಜ್ಞಾನದಿಂದ ಪ್ರಯೋಜನ ಪಡೆಯುವ ಹಲವು ಅವಕಾಶಗಳನ್ನು ಪಡೆದಿದ್ದೇನೆ" ಎಂದು ಪ್ರಧಾನಿ ಮೋದಿ ತಮ್ಮ 'ಎಕ್ಸ್‌' ಖಾತೆಯಲ್ಲಿ ಪೋಸ್ಟ್‌ ಹಂಚಿಕೊಂಡಿದ್ದರು.
ಹಿರಿಯ ಪತ್ರಕರ್ತ ಮತ್ತು ದಿ ಹಿಂದೂ ಪಬ್ಲಿಷಿಂಗ್ ಗ್ರೂಪ್ ನಿರ್ದೇಶಕ ಎನ್.ರಾಮ್, ಆಂಧ್ರ ಪ್ರದೇಶ ಸರ್ಕಾರ ಆಯೋಜಿಸಿದ್ದ ಶ್ರದ್ಧಾಂಜಲಿ ಸಭೆಯಲ್ಲಿ ಮಾತನಾಡಿ, "ಸರ್ಕಾರದ ಅತಿಕ್ರಮಣ, ಭ್ರಷ್ಟಾಚಾರ ಮತ್ತು ಪ್ರಜಾಸತ್ತಾತ್ಮಕ ಮೌಲ್ಯಗಳ ವಿರುದ್ಧದ ಬೆದರಿಕೆಗಳ ವಿರುದ್ಧ ಸತತವಾಗಿ ನಿಂತಿದ್ದಾರೆ" ಎಂದು ರಾಮೋಜಿ ರಾವ್ ಈನಾಡು ಪತ್ರಿಕೆಯನ್ನು ಸತ್ಯ ಮತ್ತು ನ್ಯಾಯಕ್ಕಾಗಿ ಬಲವಾದ ವಕೀಲನನ್ನಾಗಿ ಮಾಡಿದ ಬಗ್ಗೆ ನೆನಪಿಸಿಕೊಂಡಿದ್ದರು.
ರಾಮೋಜಿ ರಾವ್ ಅವರ ಪರಂಪರೆಯ ಸ್ಮರಣಾರ್ಥ ಈನಾಡು ವ್ಯವಸ್ಥಾಪಕ ನಿರ್ದೇಶಕ ಮತ್ತು ರಾಮೋಜಿ ರಾವ್ ಅವರ ಹಿರಿಯ ಪುತ್ರ ಚೆರುಕುರಿ ಕಿರಣ್ ಅವರು, ಸಂಸ್ಥೆಯ ಪರವಾಗಿ ಆಂಧ್ರ ಪ್ರದೇಶದ ರಾಜಧಾನಿ ಅಮರಾವತಿ ನಿರ್ಮಾಣಕ್ಕೆ 10 ಕೋಟಿ ರೂ. ನೀಡಿದ್ದಾರೆ.
ಈನಾಡು ಪತ್ರಿಕೆಯ ಸುವರ್ಣ ಮಹೋತ್ಸವ: ಒಂದು ರೋಮಾಂಚಕ ಮಾಧ್ಯಮ ಸಮೂಹದ ಚುಕ್ಕಾಣಿ ಹಿಡಿದ ತಮ್ಮ ದೀರ್ಘಾವಧಿಯಲ್ಲಿ ರಾಮೋಜಿ ರಾವ್ ಅವರು ಪತ್ರಿಕೋದ್ಯಮ ಮತ್ತು ಸಮೂಹ ಸಂವಹನದಲ್ಲಿ ಅಪರಿಮಿತ ಪ್ರಯೋಗಗಳನ್ನು ಮಾಡಿದವರು. ಅವರ ನಾಯಕತ್ವದಲ್ಲಿ, ಈನಾಡು ಪತ್ರಿಕೆ ತೆಲುಗು ಪತ್ರಿಕೋದ್ಯಮದ ಕಿರೀಟವಾಗಿ ಹೊರಹೊಮ್ಮಿತು. ಭವಿಷ್ಯದ ಪೀಳಿಗೆಗೆ ಅವಕಾಶ ಕಲ್ಪಿಸಲು, ಪತ್ರಿಕೋದ್ಯಮವನ್ನು ಕಲಿಸುವ ಈನಾಡು ಪತ್ರಿಕೋದ್ಯಮ ಶಾಲೆಯನ್ನೂ ಆರಂಭಿಸಿದ್ದರು. ಪತ್ರಿಕೋದ್ಯಮ ಕ್ಷೇತ್ರಕ್ಕೆ ತಮ್ಮ ಸೇವೆಯ ಮೂಲಕ ಯುವಕರು ಮತ್ತು ಹಿರಿಯರು, ವಿದ್ಯಾರ್ಥಿಗಳು, ಮಕ್ಕಳು, ಮಹಿಳೆಯರು, ರೈತರು ಹೀಗೆ ಲಕ್ಷಾಂತರ ಹೃದಯಗಳನ್ನು ತಲುಪಿದ್ದರು.
ಸರ್ಕಾರದ ಎಲ್ಲ ಒಳ್ಳೆಯ, ಕೆಟ್ಟ ಕಾರ್ಯಗಳಿಗೆ ಸರ್ಕಾರವೇ ಹೊಣೆಯಾಗಿರುತ್ತದೆ ಎನ್ನುತ್ತಿದ್ದವರು ರಾಮೋಜಿ. ಅದೇ ರೀತಿ ಈನಾಡು ಪತ್ರಿಕೆ, ರಾಮೋಜಿ ರಾವ್ ಅವರಿಗೆ ಸಾರ್ವಜನಿಕ ಉದ್ದೇಶ ಹಾಗೂ ಜನಸಾಮಾನ್ಯರ ಒಳಿತಿಗಾಗಿ ಇದ್ದ ಬದ್ಧತೆಯ ಸಂಕೇತವೂ ಆಗಿತ್ತು. 2004ರಲ್ಲಿ ವೈ.ಎಸ್.ರಾಜಶೇಖರ್ ರೆಡ್ಡಿ ನೇತೃತ್ವದ ಸರ್ಕಾರದ ಅವಧಿಯಲ್ಲಿ ಸಾರ್ವಜನಿಕರಿಗೆ ಸೇರಿದ ಸಂಪನ್ಮೂಲಗಳನ್ನು ಕೆಲವು ವ್ಯಕ್ತಿಗಳ ಒಳಿತಿಗಾಗಿ ಯಾವ ರೀತಿ ಬಳಸಲಾಗುತ್ತಿತ್ತು ಎಂಬುದರ ಕುರಿತು ವರದಿ ಮಾಡುವ ಮೂಲಕ ಈನಾಡು ಪತ್ರಿಕೆ ಸರ್ಕಾರದ ಹುಳುಕನ್ನು ಅನಾವರಣಗೊಳಿಸಿತ್ತು.
ಪತ್ರಿಕೆಯ ವಿಷಯದಲ್ಲಿ ರಾವ್, ವಿಶ್ವಾಸಾರ್ಹತೆಗೆ ಹೆಚ್ಚು ಪ್ರಾಮುಖ್ಯತೆ ನೀಡಿದ್ದರು. ಈ ಮೂಲಕ 'ಈನಾಡು' ಪ್ರಾರಂಭವಾದ ನಾಲ್ಕು ವರ್ಷಗಳಲ್ಲೇ ಎಲ್ಲಾ ತೆಲುಗು ಪತ್ರಿಕೆಗಳನ್ನು ಹಿಂದಿಕ್ಕಿ ಅಗ್ರಸ್ಥಾನ ಅಲಂಕರಿಸಿತು. 1984ರ ಪ್ರಜಾಪ್ರಭುತ್ವ ಆಂದೋಲನದಂತಹ ಪ್ರತಿಯೊಂದು ಜನಾಂದೋಲನಗಳ ಹಿಂದೆ ಈನಾಡು ಇತ್ತು. ಭಾರತದ ಹಲವು ಭಾಷೆಗಳಲ್ಲಿ ಈಟಿವಿ ವಾಹಿನಿಯನ್ನು ಪ್ರಾರಂಭಿಸುವ ಮೂಲಕ ಇಡೀ ದೇಶದ ಗಮನ ಸೆಳೆದಿದ್ದರು. ಇದು ರಾಮೋಜಿ ರಾವ್ ಅವರ ದೂರದೃಷ್ಟಿಗೆ ಹಿಡಿದ ಕೈಗನ್ನಡಿ. ಅದಲ್ಲದೇ, 13 ಭಾರತೀಯ ಭಾಷೆಗಳಲ್ಲಿ 23 ಸುದ್ದಿ ಪೋರ್ಟಲ್ಗಳನ್ನು ಹೊಂದಿರುವ 'ಈಟಿವಿ ಭಾರತ್' ಎನ್ನುವ ಮೊಬೈಲ್ ಅಪ್ಲಿಕೇಶನ್ ಸ್ಥಾಪಿಸಿ ಡಿಜಿಟಲ್ ಫ್ಲಾಟ್ಫಾರ್ಮ್ಗೂ ಕಾಲಿಟ್ಟರು.
1984ರಲ್ಲಿ ಸಂಯುಕ್ತ ಆಂಧ್ರ ಪ್ರದೇಶದ NTR ಸರ್ಕಾರವನ್ನು ಪದಚ್ಯುತಗೊಳಿಸಿದಾಗ, ರಾಮೋಜಿ ರಾವ್ ನೇತೃತ್ವದ ಈನಾಡು ಪತ್ರಿಕೆ, ಅಪ್ರಜಾಸತ್ತಾತ್ಮಕ ನಡೆಯನ್ನು ದೃಢವಾಗಿ ವಿರೋಧಿಸಿತು. ಮತ್ತು ರಾಜ್ಯದಲ್ಲಿ ಪ್ರಜಾಪ್ರಭುತ್ವವನ್ನು ಪುನಃಸ್ಥಾಪಿಸಲು ಕಾರಣವಾದ ಜನರ ಚಳವಳಿಗೆ ಅಗತ್ಯ ನೈತಿಕ ಬೆಂಬಲ ನೀಡಿತು. ಹೀಗೆ ಜನರ ನಾಡಿಮಿಡಿತವನ್ನು ಗ್ರಹಿಸುವಲ್ಲಿ ಈನಾಡು ಮುಂಚೂಣಿಯಲ್ಲಿತ್ತು.
ಸಂತ್ರಸ್ತರ ಬೆನ್ನೆಲುಬಾಗಿ ನಿಂತ ರಾಮೋಜಿ ಗ್ರೂಪ್: 1976ರಲ್ಲಿ ಆಂಧ್ರ ಪ್ರದೇಶಕ್ಕೆ ಒಂದಾಂದ ಮೇಲೆ ಒಂದರಂತೆ ಮೂರು ಚಂಡಮಾರುತಗಳು ಅಪ್ಪಳಿಸಿದಾಗ, ರಾವ್ ಅವರು 10,000 ನೀಡಿ 'ಈನಾಡು ಪರಿಹಾರ ನಿಧಿ'ಯನ್ನು ಪ್ರಾರಂಭಿಸಿದ್ದರು. ಜೊತೆಗೆ, ಈನಾಡು ಪತ್ರಿಕೆ ಮೂಲಕ ಸಹಾಯ ಕೋರಿ ಜಾಗೃತಿ ಅಭಿಯಾನವನ್ನು ನಡೆಸಿದ್ದರು. ಆಗ ಈನಾಡು ಪತ್ರಿಕೆ ಆರಂಭವಾಗಿ 2 ವರ್ಷಗಳಷ್ಟೇ ಆಗಿತ್ತು. ಈ ನಿಧಿಯ ಹೊರತಾಗಿಯೂ, ಅವರು ಶಾಲೆಗಳನ್ನು ನಿರ್ಮಿಸಲು, ನೇಕಾರರಿಗೆ ಮಗ್ಗಗಳನ್ನು ಒದಗಿಸಲು ಮತ್ತು ಅವಿಭಜಿತ ಆಂಧ್ರ ಪ್ರದೇಶ, ಗುಜರಾತ್, ಒಡಿಶಾ, ತಮಿಳುನಾಡು ಮತ್ತು ಕೇರಳದಾದ್ಯಂತ ಇತರ ಚಂಡಮಾರುತಗಳಿಂದ ಹಾನಿಗೊಳಗಾದ ಹಳ್ಳಿಗಳಲ್ಲಿ ಮನೆಗಳನ್ನು ನಿರ್ಮಿಸಲು ಸಹಾಯ ಮಾಡಿದ್ದಾರೆ.
19 ನವೆಂಬರ್ 1977ರಂದು, ಆಂಧ್ರ ಪ್ರದೇಶದ ಕೃಷ್ಣಾ ಜಿಲ್ಲೆಯ ದಿವಿಸೀಮಾದಲ್ಲಿ ತೀವ್ರವಾದ ಚಂಡಮಾರುತ ಅಪ್ಪಳಿಸಿ, ಅಪಾರ ಪ್ರಾಣ ಮತ್ತು ಆಸ್ತಿ ನಷ್ಟವಾಗಿತ್ತು. ಆಗ ರಾಮೋಜಿ ರಾವ್ ಅವರು ಈನಾಡು ಪರಿಹಾರ ನಿಧಿಗೆ ಇನ್ನಷ್ಟು ಜೀವ ತುಂಬಿ 7.5 ಲಕ್ಷ ರೂ.ಗಳನ್ನು ಸಂಗ್ರಹಿಸಿದ್ದರು. ಮತ್ತು ಹಾನಿಗೊಳಗಾದ ಪ್ರದೇಶಗಳಲ್ಲಿ 112 ಮನೆಗಳನ್ನು ನಿರ್ಮಿಸಿದರು.
2014ರಲ್ಲಿ ಅಪ್ಪಳಿಸಿದ ಹುದುದ್ ಚಂಡಮಾರುತ ಆಂಧ್ರ ಪ್ರದೇಶದಲ್ಲಿ ವಿನಾಶವನ್ನುಂಟು ಮಾಡಿತ್ತು. ಆಗ ಈನಾಡು ಪರಿಹಾರ ನಿಧಿಗೆ 3 ಕೋಟಿ ರೂ ನೀಡಿದ್ದರು. ಇದನ್ನು ಕಂಡು ಈನಾಡು ಓದುಗರು ಕೂಡ ಕೈಜೋಡಿಸಿದ್ದು, ಒಟ್ಟು 6.18 ಕೋಟಿ ರೂ. ಪರಿಹಾರ ಕಾಮಗಾರಿಗೆ ಸಂಗ್ರಹವಾಗಿತ್ತು. ರಾಮೋಜಿ ರಾವ್ ಅವರು 'ಹುದುದ್ ಸೈಕ್ಲೋನ್ ಪುನರ್ವಸತಿ ಕಾಲೊನಿ' ನಿರ್ಮಿಸಿದರು. ವಿಶಾಖಪಟ್ಟಣಂ ಮತ್ತು ಶ್ರೀಕಾಕುಳಂ ಜಿಲ್ಲೆಗಳ ಸಂತ್ರಸ್ತರಿಗೆ ಈ ವಸತಿ ಯೋಜನೆಗಳ ಮೂಲಕ ಸಹಾಯ ಮಾಡಲಾಯಿತು.
2018ರ ಕೇರಳ ಪ್ರವಾಹ ಸಮಯದಲ್ಲಿ, ರಾಮೋಜಿ ರಾವ್ ಅವರು 7.71 ಕೋಟಿ ರೂ ಪರಿಹಾರ ನಿಧಿಯನ್ನು ಜಿಲ್ಲಾಧಿಕಾರಿ ಕೃಷ್ಣ ತೇಜಾ ಅವರ ನೆರವಿನೊಂದಿಗೆ ಅಲಪ್ಪುಳ ಜಿಲ್ಲೆಯಲ್ಲಿ 121 ಮನೆಗಳನ್ನು ನಿರ್ಮಿಸಲು ಸಹಾಯ ಮಾಡಿದರು.
ರಾಮೋಜಿ ಗ್ರೂಪ್ ಆಫ್ ಕಂಪನೀಸ್ ಯಾವಾಗಲೂ ನೈಸರ್ಗಿಕ ವಿಪತ್ತುಗಳಿಗೆ ತುತ್ತಾದವರಿಗೆ ಸಹಾಯ ಮಾಡುವಲ್ಲಿ ಮುಂಚೂಣಿಯಲ್ಲಿದೆ. ಪಾಕಿಸ್ತಾನ ಗಡಿ ಗುಜರಾತ್‌ನಲ್ಲಿ ಸಂಭವಿಸಿದ ಭೂಕಂಪದಲ್ಲಿ ನೆಲಸಮವಾದ ಕವ್ದಾ ಗ್ರಾಮವನ್ನು ಸಂಸ್ಥೆ ಪುನರ್‌ನಿರ್ಮಿಸಿತು. ತಮಿಳುನಾಡಿನ ಕಡಲೂರು ಮತ್ತು ನಾಗಪಟ್ಟಿನಂನ ಸುನಾಮಿ ಸಂತ್ರಸ್ತರಿಗೆ ನೇರವು ನೀಡಲಾಯಿತು. ಅವಿಭಜಿತ ಆಂಧ್ರಪ್ರದೇಶ ಮತ್ತು ಒಡಿಶಾದಲ್ಲಿ ಜನರು ಚಂಡಮಾರುತ ಮತ್ತು ಪ್ರವಾಹದಿಂದ ತತ್ತರಿಸಿದ್ದಾಗ ಪುನರ್ವಸತಿ ಚಟುವಟಿಕೆಗಳನ್ನು ಕೈಗೆತ್ತಿಕೊಳ್ಳಲಾಯಿತು.
ರಾಮೋಜಿ ಫೌಂಡೇಶನ್: ರಾಮೋಜಿ ರಾವ್ ಅವರು, ಸಂಸ್ಥೆಯ ಸಿಎಸ್‌ಆರ್ ಅಂಗವಾದ ರಾಮೋಜಿ ಫೌಂಡೇಶನ್ ಮೂಲಕ ಇದುವರೆಗೆ ಗ್ರಾಮೀಣಾಭಿವೃದ್ಧಿ ಅಡಿಯಲ್ಲಿ ವಿವಿಧ ಉಪಕ್ರಮಗಳಿಗಾಗಿ 131 ಕೋಟಿ ರೂ. ವ್ಯಯಿಸಿದ್ದಾರೆ. ಅವರ ಸ್ವಗ್ರಾಮ ಪೆದಪರುಪುಡಿ ಮತ್ತು ನಾಗನಪಲ್ಲಿ ಎರಡು ಗ್ರಾಮಗಳನ್ನು ಸ್ಮಾರ್ಟ್ ವಿಲೇಜ್ ಪರಿಕಲ್ಪನೆಯಡಿಯಲ್ಲಿ ದತ್ತು ಪಡೆದು, 40 ಕೋಟಿ ರೂ. ವೆಚ್ಚದಲ್ಲಿ ಅಭಿವೃದ್ಧಿ ಪಡಿಸಿದ್ದಾರೆ. ಅಬ್ದುಲ್ಲಾಪುರ್ಮೆಟ್, ಇಬ್ರಾಹಿಂಪಟ್ಟಣ ಮತ್ತು ಹಯತ್‌ನಗರ ಮಂಡಲಗಳಲ್ಲಿ ಸರ್ಕಾರಿ ಕಟ್ಟಡಗಳ ನಿರ್ಮಾಣಕ್ಕೆ 13 ಕೋಟಿ ರೂ. ಮತ್ತು ಮಂಚೇರಿಯಲ್, ಭದ್ರಾಚಲಂ ಮತ್ತು ಕರ್ನೂಲ್‌ನಲ್ಲಿ ವೃದ್ಧಾಶ್ರಮಗಳನ್ನು ನಿರ್ಮಿಸಲು 9 ಕೋಟಿ ರೂ. ನೀಡಿದ್ದಾರೆ.
ಕೋವಿಡ್ ಸಮಯದಲ್ಲಿ, ರಾಮೋಜಿ ಫೌಂಡೇಶನ್ ಎರಡು ತೆಲುಗು ರಾಜ್ಯಗಳಿಗೆ 20 ಕೋಟಿ ರೂಪಾಯಿ ಮತ್ತು ತಮಿಳುನಾಡಿಗೆ 3 ಕೋಟಿ ರೂಪಾಯಿಗಳನ್ನು ಪ್ರವಾಹ ಪರಿಹಾರ ಚಟುವಟಿಕೆಗಳಿಗೆ ದೇಣಿಗೆ ನೀಡಿದೆ. ಉಳಿದಂತೆ ಗ್ರಾಮೀಣಾಭಿವೃದ್ಧಿಗಾಗಿ ಎಪಿ ಕನೆಕ್ಟ್‌ಗೆ 10 ಕೋಟಿ ರೂ, ವೈದ್ಯಕೀಯ ಸಂಸ್ಥೆಗಳು, ಜಿನೋಮ್ ಫೌಂಡೇಶನ್, ಎಲ್‌ವಿ ಪ್ರಸಾದ್ ಐ ಇನ್‌ಸ್ಟಿಟ್ಯೂಟ್, ಆಸ್ಪತ್ರೆಗಳನ್ನು ಸ್ಥಾಪಿಸಲು ಮತ್ತು ಸಂಶೋಧನೆಗಾಗಿ ಕ್ಯಾನ್ಸರ್ ಫೌಂಡೇಶನ್ಗಳಿಗೆ 8 ಕೋಟಿ ರೂ ದೇಣಿಗೆ ನೀಡಿದ್ದಾರೆ.
ರಾಮೋಜಿ ರಾವ್ ನಡೆದ ಹಾದಿಯಲ್ಲೇ ಹೆಜ್ಜೆ ಇಡುತ್ತಿರುವ ಅವರ ಕುಟುಂಬ ಕೂಡ ಕೌಶಲ್ಯ ಅಭಿವೃದ್ಧಿ, ಕಲೆ ಮತ್ತು ಸಂಸ್ಕೃತಿಯ ಪ್ರಚಾರ ಮತ್ತು ಕ್ರೀಡೆಗಳ ಪ್ರಚಾರಕ್ಕಾಗಿ ಗಮನಾರ್ಹ ಕೊಡುಗೆಗಳನ್ನು ನೀಡುವ ಮೂಲಕ ಲೋಕೋಪಕಾರಿ ಕೆಲಸಗಳನ್ನು ಮುಂದುವರಿಸಿದೆ. ಅಲ್ಲದೆ ಇತ್ತೀಚೆಗೆ ಸಂಸ್ಥೆಯು, ಇಂಡಿಯನ್ ಸ್ಕೂಲ್ ಆಫ್ ಬ್ಯುಸಿನೆಸ್‌ ಶಿಕ್ಷಣ ಸಂಸ್ಥೆಗೆ ಅತ್ಯಾಧುನಿಕ ಆಡಿಟೋರಿಯಂ ನಿರ್ಮಿಸಲು 30 ಕೋಟಿ ರೂ.ಗಳನ್ನು ದೇಣಿಗೆಯಾಗಿ ನೀಡಿದೆ.
ರಾಮೋಜಿ ಫಿಲ್ಮ್ ಸಿಟಿ(RFC)- ಒಂದು ಕನಸಿನ ಯೋಜನೆ: ರಾಮೋಜಿ ರಾವ್ ಅವರು ಚಲನಚಿತ್ರ ನಿರ್ಮಾಪಕ, ವಿತರಕ ಮತ್ತು ಸ್ಟುಡಿಯೋ ಮಾಲೀಕರಾಗಿಯೂ ಸಾಧನೆ ಮಾಡಿದವರು. ರಾಮೋಜಿ ಅವರ ಮಯೂರಿ, ಪ್ರತಿಘಟನ, ಚಿತ್ತಿರಮ್ ಮತ್ತು ನುವ್ವೇಕಾವಲಿ ಮುಂತಾದ ಸಂದೇಶ ಆಧರಿತ ಚಿತ್ರಗಳು ಬಾಕ್ಸ್ ಆಫೀಸ್‌ನಲ್ಲಿ ದೊಡ್ಡ ಹಿಟ್ ಆಗಿದ್ದವು. ರಾಮೋಜಿ ಫಿಲ್ಮ್ ಸಿಟಿ (RFC) ಚಲನಚಿತ್ರ ಕ್ಷೇತ್ರಕ್ಕೆ ಕೇಂದ್ರಬಿಂದು. ಇಲ್ಲಿ ಬಾಹುಬಲಿ, ಗಜಿನಿ, ಚಂದ್ರಮುಖಿ, ರೋಬೋಟ್ ಮತ್ತು ಪುಷ್ಪ ಸೇರಿದಂತೆ 3,000ಕ್ಕೂ ಹೆಚ್ಚು ಚಲನಚಿತ್ರಗಳನ್ನು ನಿರ್ಮಿಸಲಾಗಿದೆ. RFC, ರಜಾದಿನಗಳು, ಹಬ್ಬಗಳು ಮತ್ತು ವಿಶೇಷ ಕಾರ್ಯಕ್ರಮಗಳ ಸಮಯದಲ್ಲಿ ಪ್ರವಾಸಿಗರನ್ನು ಮನರಂಜಿಸಲು ಹಲವು ರೀತಿಯ ಕಾರ್ಯಕ್ರಮಗಳನ್ನು ಆಯೋಜಿಸುವ ಮೂಲಕ ಮನರಂಜನೆ ಮತ್ತು ಮೋಜಿನ ಚಟುವಟಿಕೆಯ ಕೇಂದ್ರವಾಗಿಯೂ ಹೊರಹೊಮ್ಮಿದೆ.
ರಾಮೋಜಿ ರಾವ್ ಜೀವನ ಸಂದೇಶ:
- ಯಾವಾಗಲೂ ನಾಳೆಯ ಬಗ್ಗೆ ಯೋಚಿಸಿ. ನಿನ್ನೆಯ ಬಗ್ಗೆ ಚಿಂತಿಸಬೇಡಿ.
- ಬದಲಾವಣೆ ಮತ್ತು ಪ್ರಗತಿ ಅವಳಿ-ಜವಳಿ. ಬದಲಾವಣೆಯೊಂದಿಗೆ ಮಾತ್ರ ಅಭಿವೃದ್ಧಿ ಸಾಧ್ಯ. ಅಭಿವೃದ್ಧಿ ಬಯಸಿದರೆ ಹೊಸ ಆಲೋಚನೆಗಳನ್ನು ಮಾಡಿ.
- ಎಷ್ಟೇ ಕಷ್ಟಗಳೆದುರಾದರೂ ನಿಮ್ಮದೇ ಆದ ಬದುಕನ್ನು ಬದುಕಿ. ಯಾರ ಸಹಾಯಕ್ಕೂ ಕಾಯಬೇಡಿ.
- ಶಿಸ್ತಿನ ಹೊರತಾಗಿ ಯಶಸ್ಸಿಗೆ ಬೇರೆ ರಹಸ್ಯವಿಲ್ಲ. ಇದರ ಹೊರತಾಗಿ ಯಾವ ಪ್ರತಿಭೆಯೂ ಅರಳುವುದಿಲ್ಲ.
- ಒಬ್ಬ ವ್ಯಕ್ತಿ ಅಥವಾ ಸಂಸ್ಥೆಯ ನಿಜವಾದ ಸಂಪತ್ತು ವಿಶ್ವಾಸಾರ್ಹತೆ. ಅದನ್ನು ನಿಮ್ಮ ಕಣ್ಣಿನಂತೆ ರಕ್ಷಿಸಿ.
ಇದನ್ನೂ ಓದಿ: 3 ನೂತನ ಮಾರ್ಗದರ್ಶಿ ಚಿಟ್ ಫಂಡ್ ಶಾಖೆಗಳನ್ನು ಉದ್ಘಾಟಿಸಿದ ಎಂಡಿ ಶೈಲಜಾ ಕಿರಣ್
