ಸಿನಿಮಾ ಎಂಬ ಗ್ಲ್ಯಾಮರ್ ಲೋಕದಲ್ಲಿ ಶೈನ್ ಆಗಬೇಕೆನ್ನೋ ಕನಸು ಹಲವರದ್ದು. ಆದ್ರೆ ಚಿತ್ರರಂಗಕ್ಕೆ ಪ್ರವೇಶ ಪಡೆಯುವುದು ಅಂದುಕೊಂಡಷ್ಟು ಸುಲಭವಲ್ಲ. ಈ ಕ್ಷೇತ್ರದಲ್ಲಿ ಸಾಧನೆಯ ಕುರಿತು ಆಲೋಚಿಸಿದಾಗ ಮೊದಲು ತಲೆಗೆ ಬರೋದು ಚಿತ್ರರಂಗದಲ್ಲಿ ತಮ್ಮ ಪರಿಚಿತರು ಯಾರಿದ್ದಾರೆ ಅನ್ನೋದು. ಸಹಾಯ ಸಿಕ್ಕರೂ, ಪರಿಶ್ರಮವಿದ್ದರೂ, ಎಲ್ಲರ ಬದುಕಲ್ಲಿ ಅದೃಷ್ಟ ಸಾಥ್ ಕೊಡೋದಿಲ್ಲ. ಮತ್ತೊಂದೆಡೆ, ನೆಪೋಟಿಸಂ ಎಂಬ ಸಮಸ್ಯೆಯೂ ಅಲ್ಲಿರುತ್ತದೆ.
ಇಲ್ಲೋರ್ವ ಪ್ರತಿಭೆಯ ತಂದೆ ಚಲನಚಿತ್ರೋದ್ಯಮದವರಾಗಿದ್ದರೂ, ಅವರಿಗೆ ಅವಕಾಶಗಳು ಅಷ್ಟು ಸುಲಭವಾಗಿ ಸಿಗಲಿಲ್ಲ. ತಮ್ಮ 14ನೇ ವಯಸ್ಸಿನಲ್ಲಿ ಹಿನ್ನೆಲೆ ನರ್ತಕನಾಗಿ ಕೆಲಸ ಮಾಡಿದ್ರು. 75 ರೂಪಾಯಿ ಸಂಭಾವನೆ ಪಡೆದಿದ್ರು. ಚಲನಚಿತ್ರಗಳನ್ನು ಪ್ರವೇಶಿಸಿದ ನಂತರವೂ, ತಮ್ಮ ವೃತ್ತಿಜೀವನದ ಆರಂಭಿಕ ದಿನಗಳಲ್ಲಿ ಪೋಷಕ ಪಾತ್ರಗಳಲ್ಲಿ ಕಾಣಿಸಿಕೊಂಡರು. ಸಣ್ಣ ಪಾತ್ರಗಳೊಂದಿಗೆ ದೊಡ್ಡ ನಟನಾಗಬಹುದು ಮತ್ತು ನಿಮ್ಮನ್ನು ನೀವು ಸಾಬೀತುಪಡಿಸುವ ಮೂಲಕ ಉನ್ನತ ಮಟ್ಟಕ್ಕೆ ಏರಬಹುದು ಎಂಬುದನ್ನು ಈ ಪ್ರತಿಭೆ ಸಾಬೀತುಪಡಿಸಿದ್ದಾರೆ.
ಹೌದು, ನಾವೀಗ ಹೇಳ ಹೊರಟಿರುವುದು ಬಾಲಿವುಡ್ ಸೂಪರ್ ಸ್ಟಾರ್ ಸಲ್ಮಾನ್ ಖಾನ್ ಬಗ್ಗೆ. ಈ ಹ್ಯಾಂಡ್ಸಂ ಹಂಕ್‌ ಬಗ್ಗೆ ತಿಳಿದಿಲ್ಲದವರು ಬಹುಶಃ ಯಾರೂ ಇಲ್ಲ. ಸಲ್ಮಾನ್ ಖಾನ್ ಅವರ ತಂದೆ ಸಲೀಂ ಖಾನ್ ಚಿತ್ರ ಕಥೆಗಾರ ಮತ್ತು ನಿರ್ಮಾಪಕರು. ಆದಾಗ್ಯೂ, ಸಲ್ಮಾನ್‌ಗೆ ಸಿನಿಮಾ ಅವಕಾಶಗಳು ಸುಲಭವಾಗಿ ಸಿಗಲಿಲ್ಲ. ತಮ್ಮ 14ನೇ ವಯಸ್ಸಿನಲ್ಲಿ, ತಾಜ್ ಹೋಟೆಲ್‌ನಲ್ಲಿ ಬ್ಯಾಗ್ರೌಂಡ್ ಡ್ಯಾನ್ಸರ್ ಆಗಿ ಪ್ರದರ್ಶನ ನೀಡಿದ್ರು. ಅವರಿಗೆ 75 ರೂ. ಸಂಭಾವನೆ ಸಿಕ್ಕಿತ್ತು. ಅದಾದ ನಂತರ, 'ಬಿವಿ ಹೋ ತೋ ಐಸಿ' ಚಿತ್ರದಲ್ಲಿ ಅವಕಾಶ ಸಿಕ್ಕಿತು. ಪೋಷಕ ಪಾತ್ರದಲ್ಲಿ ನಟಿಸಿದ್ರು.
ಇದನ್ನೂ ಓದಿ: ಜೂ.ಬಚ್ಚನ್‌ಗಿಂದು ಬರ್ತ್‌ಡೇ ಖುಷಿ: ಅಭಿಷೇಕ್ ಬದುಕಲ್ಲಿ ಐಶ್ವರ್ಯಾ ಪ್ರವೇಶ ಹೇಗಾಯ್ತು ಗೊತ್ತೇ?
1989ರಲ್ಲಿ 'ಮೈನೆ ಪ್ಯಾರ್ ಕಿಯಾ' ಚಿತ್ರದಲ್ಲಿ ಮುಖ್ಯಭೂಮಿಕೆ ವಹಿಸಿದ್ರು. ಈ ಸಿನಿಮಾ ಸೂಪರ್ ಹಿಟ್ ಆಯ್ತು. ಇದರೊಂದಿಗೆ ಸಲ್ಮಾನ್ 31,000 ರೂ. ಸಂಭಾವನೆ ಸ್ವೀಕರಿಸಿದ್ರು. ಅದಾದ ಬಳಿಕ, ಸರಣಿ ಹಿಟ್ ಕೊಟ್ರು ಬಾಲಿವುಡ್ ಭಾಯ್ಜಾನ್. ಪ್ರತಿ ಚಿತ್ರಕ್ಕೆ 75,000 ಸಂಭಾವನೆ ನೀಡಲಾಯಿತು. ಪ್ರಸ್ತುತ ಅವರು ಹಿಂದಿ ಚಿತ್ರರಂಗದ ಅತ್ಯಂತ ಶ್ರೀಮಂತ ತಾರೆಯಲ್ಲೋರ್ವರು. ವರದಿಗಳ ಪ್ರಕಾರ, ಪ್ರಸ್ತುತ ನಟ 2,900 ಕೋಟಿ ರೂ. (Net Worth) ಮೌಲ್ಯದ ಆಸ್ತಿ ಹೊಂದಿದ್ದಾರೆ.
ಇದನ್ನೂ ಓದಿ: ತಂದೆ ನಿರ್ಮಾಪಕನಾದ್ರೂ ಸ್ವಪ್ರಯತ್ನದಲ್ಲೇ ಸಾಧನೆ : 500ರೂ.ಗೆ ಕೆಲಸ ಮಾಡಿದ್ದ ನಟ ಕನ್ನಡದ ಸೂಪರ್ ಸ್ಟಾರ್
59ರ ಹರೆಯದ ಸಲ್ಮಾನ್ ಖಾನ್ ಸಿನಿ ಕ್ಷೇತ್ರದಲ್ಲಿ ಸಖತ್ ಬ್ಯುಸಿಯಾಗಿದ್ದಾರೆ. ರೊಮ್ಯಾನ್ಸ್ ಅಥವಾ ಆ್ಯಕ್ಷನ್ ಪಾತ್ರ ಯಾವುದೇ ಇರಲಿ ಸಂಪೂರ್ಣ ಜೀವ ತುಂಬೋದನ್ನು ಕರಗತ ಮಾಡಿಕೊಂಡಿದ್ದಾರೆ. ತಮ್ಮ ವೃತ್ತಿಜೀವನದಲ್ಲಿ ಈವರೆಗೆ 100ಕ್ಕೂ ಹೆಚ್ಚು ಚಿತ್ರಗಳಲ್ಲಿ ನಟಿಸಿದ್ದಾರೆ. 'ಹಮ್ ಆಪ್ಕೆ ಹೈ ಕೌನ್', 'ಕರಣ್ ಅರ್ಜುನ್', 'ಹಮ್ ಸಾಥ್ ಸಾಥ್ ಹೈ', 'ದಬಾಂಗ್', 'ಭಜರಂಗಿ ಭಾಯಿಜಾನ್', 'ಸುಲ್ತಾನ್', 'ಪ್ರೇಮ್ ರತನ್ ಧನ್ ಪಾಯೋ' ಮತ್ತು 'ಟೈಗರ್ ಜಿಂದಾ ಹೈ'ನಂತಹ ಹಿಟ್ ಚಿತ್ರಗಳನ್ನು ಪ್ರೇಕ್ಷಕರಿಗೆ ನೀಡಿದ್ದಾರೆ. ಕೊನೆಯದಾಗಿ ಟೈಗರ್-3ನಲ್ಲಿ ಕಾಣಿಸಿಕೊಂಡರು. ಮಾರ್ಚ್ 28ರಂದು ಬಹುನಿರೀಕ್ಷಿತ 'ಸಿಕಂದರ್' ಚಿತ್ರ ತೆರೆಗಪ್ಪಳಿಸಲಿದೆ.
