ವನಪರ್ತಿ(ಆಂಧ್ರ ಪ್ರದೇಶ): ತೆಲಂಗಾಣದಲ್ಲಿ ಉತ್ತಮ ತಳಿಯ ಕೋಳಿಯ ಬಗ್ಗೆ ಕೇಳಿದರೆ ಮಸಾಲೆಯುಕ್ತ, ಪರಿಮಳಯುಕ್ತ ಭಕ್ಷ್ಯಗಳು ನೆನಪಿಗೆ ಬರುತ್ತವೆ. ಹಾಗೆಯೇ ಆಂಧ್ರ ಪ್ರದೇಶದಲ್ಲಿ ಕೂಡ ಕೋಳಿಯ ಭಕ್ಷ್ಯ ಭೋಜನಗಳು ನೆನಪಾಗುತ್ತವೆ. ಆದರೆ ಹಾಗಂತ ಎಲ್ಲ ಕೋಳಿಗಳು ತಿನ್ನುವುದಕ್ಕೇ ಇರುವುದಿಲ್ಲ. ಕೆಲ ತಳಿಯ ಕೋಳಿಗಳನ್ನು ಅವುಗಳ ಸೌಂದರ್ಯಕ್ಕಾಗಿಯೂ ಬೆಳೆಸಲಾಗುತ್ತದೆ ಎಂದರೆ ಅಚ್ಚರಿಯಾಗಬೇಡಿ. ಅಷ್ಟೇ ಅಲ್ಲ. ಇವು ಲಕ್ಷಾಂತರ ರೂಪಾಯಿ ಬೆಲೆ ಬಾಳುವುದು ಮತ್ತೂ ವಿಶೇಷ.
ವನಪರ್ತಿ ಮಂಡಲದ ರಾಜನಗರಂ ಗ್ರಾಮದ ಗುರುನಂದನ್ ರೆಡ್ಡಿ ಇಂಥ ವಿಶೇಷ ಕೋಳಿಗಳನ್ನು ಬೆಳೆಸುತ್ತಿರುವವರಲ್ಲಿ ಒಬ್ಬರಾಗಿದ್ದಾರೆ. ಮಾರುಕಟ್ಟೆ ಇಲಾಖೆಯ ನಿವೃತ್ತ ಕಾರ್ಯದರ್ಶಿ (2006) ಗುರುನಂದನ್ ಅವರು ಒಂದು ದಶಕದಿಂದ ಅಸಿಲ್ ತಳಿಯ ಕೋಳಿಗಳನ್ನು ಸಾಕುತ್ತಿದ್ದಾರೆ. ಆಕರ್ಷಕ ಲಕ್ಷಣಗಳು, ಗಿಳಿ ಆಕಾರದ ಕೊಕ್ಕುಗಳು, ನವಿಲಿನಂತಹ ಬಾಲ, ಉದ್ದನೆಯ ಕುತ್ತಿಗೆ ಮತ್ತು ದೃಢವಾದ ದೇಹಕ್ಕೆ ಹೆಸರುವಾಸಿಯಾದ ಅಸಿಲ್ ಕೋಳಿಗಳನ್ನು ಸಂಗ್ರಾಹಕರು ಮತ್ತು ಕೋಳಿ ಉತ್ಸಾಹಿಗಳಲ್ಲಿ ಹೆಚ್ಚು ಜನಪ್ರಿಯವಾಗಿವೆ.
2007ರಲ್ಲಿ ಗುರುನಂದನ್ ಅವರು ತಮಿಳುನಾಡಿನ ಸೇಲಂನಿಂದ ಎರಡು ಜೋಡಿ ಆಸಿಲ್ ಮರಿಗಳನ್ನು ಖರೀದಿಸಲು 1 ಲಕ್ಷ ರೂಪಾಯಿ ಹೂಡಿಕೆ ಮಾಡಿದ್ದರು. ಅಂದಿನಿಂದ, ಅವರು ಈ ಭವ್ಯವಾದ ಪಕ್ಷಿಗಳನ್ನು ಸಂತಾನೋತ್ಪತ್ತಿ ಮತ್ತು ಮಾರಾಟ ಮಾಡುತ್ತಿದ್ದಾರೆ. ಇವರ ಕೋಳಿಗಳು ಅವುಗಳ ಸೌಂದರ್ಯಕ್ಕಾಗಿ ಮಾತ್ರವಲ್ಲದೇ ಅವುಗಳ ವಂಶಾವಳಿಗಾಗಿಯೂ ಮೌಲ್ಯಯುತವಾಗಿವೆ.
ಕೆಲ ಕೋಳಿಗಳನ್ನು ತಲಾ 50,000 ರೂ.ಗಳಿಗೆ ಮಾರಾಟ ಮಾಡಿರುವುದಾಗಿ ಇವರು ಹೆಮ್ಮೆಯಿಂದ ಹೇಳಿಕೊಳ್ಳುತ್ತಾರೆ. ತೆಲಂಗಾಣ ಮತ್ತು ಆಂಧ್ರ ಪ್ರದೇಶದ ಉತ್ಸಾಹಿಗಳು ಇವರ ಬಳಿಗೆ ಬಂದು ಕೋಳಿಗಳನ್ನು ಖರೀದಿಸುತ್ತಾರೆ. ಇದಲ್ಲದೆ ಗುರುನಂದನ್ ಸ್ವತಃ ಕೆಲ ಕೋಳಿಗಳನ್ನು 1 ಲಕ್ಷ ರೂ. ನೀಡಿ ಖರೀದಿಸಿದ್ದಾರೆ. ಪ್ರಸ್ತುತ, ಅವರು ವಿವಿಧ ಗಾತ್ರ ಮತ್ತು ವಯಸ್ಸಿನ 50ಕ್ಕೂ ಹೆಚ್ಚು ಆಸಿಲ್ ಕೋಳಿಗಳ ಹೆಮ್ಮೆಯ ಮಾಲೀಕರಾಗಿದ್ದಾರೆ.
ಗುರುನಂದನ್ ಅವರಿಗೆ ಇದು ಕೇವಲ ಕೃಷಿಗಿಂತ ಮಹತ್ವದ್ದಾಗಿದೆ. ಪ್ರಾಣಿಗಳ ಮೇಲಿನ ಪ್ರೀತಿಯನ್ನು ಅಪರೂಪದ ಆಸಿಲ್ ತಳಿಯನ್ನು ಸಂರಕ್ಷಿಸುವ ಮೂಲಕ ಅವರು ಪಾಲಿಸಿಕೊಂಡು ಬರುತ್ತಿದ್ದಾರೆ.
