ನಿಮ್ಮ ಆಧಾರ್​ ​ಬಳಕೆಯ ಹಿಸ್ಟರಿ ತಿಳಿಯಬೇಕೇ?: ಹಾಗಾದ್ರೆ ಈ ಸರಳ ಹಂತಗಳನ್ನು ಅನುಸರಿಸಿ

ನಿಮ್ಮ ಆಧಾರ್​ ಕಾರ್ಡನ್ನು ಯಾರಾದರೂ ದುರುಪಯೋಗ ಮಾಡಿಕೊಳ್ಳುವ ಬಗ್ಗೆ ಭಯವಿದೆಯೇ?. ಹಾಗಿದ್ದರೆ, ಚಿಂತೆ ಏಕೆ?, ಹಿಸ್ಟರಿ ತಿಳಿಯಲು ಈ ಕೆಳಗಿನ ಸುಲಭ ವಿಧಾನಗಳನ್ನು ಅನುಸರಿಸಿ.

ಪ್ರಸ್ತುತ ದಿನಮಾನಗಳಲ್ಲಿ ಆಧಾರ್ ಕಾರ್ಡ್​ ಎಂಬುದು ಎಲ್ಲದಕ್ಕೂ ಕಡ್ಡಾಯವಾಗಿರುವ ದಾಖಲೆ. ಬ್ಯಾಂಕ್ ಖಾತೆ ತೆರೆಯಲು, ಹೊಸ ಸಿಮ್ ಕಾರ್ಡ್ ಪಡೆಯಲು, ಬ್ಯಾಂಕ್ ಸಾಲಕ್ಕೆ, ಸರ್ಕಾರದ ಯೋಜನೆಗಳು ಇತ್ಯಾದಿಗಳಿಗೆ ಆಧಾರ್ ಬೇಕೇ ಬೇಕು. ಆದರೆ ಇತ್ತೀಚಿನ ದಿನಗಳಲ್ಲಿ ನಮಗೆ ಗೊತ್ತಿಲ್ಲದಂತೆ ಬೇರೊಬ್ಬರು ನಮ್ಮ ಆಧಾರ್​ ಬಳಸಿಕೊಂಡು ಸಿಮ್​ ಖರೀದಿ ಮಾಡುವುದು ಅಥವಾ ನಮ್ಮ‌ ಹೆಸರಿನಲ್ಲಿ ಬ್ಯಾಂಕ್‌ ಖಾತೆ ಸೃಷ್ಟಿಸುವಂಥ ಸೈಬರ್ ಅಪರಾಧಗಳನ್ನು ಎಸಗುತ್ತಿದ್ದಾರೆ. ಹಾಗಾಗಿ ಈ ಎಲ್ಲದರಿಂದ ಎಚ್ಚರಿಕೆ ವಹಿಸಲು ಆಗಾಗ್ಗೆ ನಮ್ಮ ಆಧಾರ್ ಬಳಕೆಯ ಹಿಸ್ಟರಿಯನ್ನು ಪರಿಶೀಲಿಸುವುದು ಒಳ್ಳೆಯದು.

ಆಧಾರ್​ ಹಿಸ್ಟರಿ ಪರಿಶೀಲಿಸುವುದು ಹೇಗೆ?:

• ಮೊದಲು ನಿಮ್ಮ ಮೊಬೈಲ್​ ಅಥವಾ ಗೆಜೆಟ್​ಗಳಲ್ಲಿ UIDAI ಅಧಿಕೃತ ಪೋರ್ಟಲ್ https://uidai.gov.in/en/ ವೆಬ್‌ಸೈಟ್​ ಅನ್ನು ತೆರೆಯಿರಿ.
• ನಂತರ ಮೇಲೆ ಕಾಣುವ My Aadhaar ಟ್ಯಾಬ್ ಮೇಲೆ ಟ್ಯಾಪ್​ ಮಾಡಿ, Aadhaar Service ಮೇಲೆ ಕ್ಲಿಕ್​ ಮಾಡಿ.
• ಅಲ್ಲಿ ಕಾಣಿಸುವ Aadhaar Authentication History ಒತ್ತಿ.
• ತಕ್ಷಣವೇ ಲಾಗಿನ್ ಮಾಡಲು ಹೊಸ ಪುಟ ತೆರೆದುಕೊಳ್ಳುತ್ತದೆ.
• ಲಾಗಿನ್ ಮೇಲೆ ಕ್ಲಿಕ್ ಮಾಡಿ. ನಿಮ್ಮ ಆಧಾರ್ ಸಂಖ್ಯೆ, ಕ್ಯಾಪ್ಚಾ, ಒಟಿಪಿ ನಮೂದಿಸಿ ಲಾಗಿನ್ ಆಗಿ.
• ಕೆಳಗೆ ಸ್ಕ್ರಾಲ್ ಮಾಡಿದ ಮೇಲೆ Authentication History ಎಂಬುದು ಕಾಣಿಸುತ್ತದೆ. ಅದರ ಮೇಲೆ ಕ್ಲಿಕ್ಕಿಸಿ.
• ಅಲ್ಲಿ ALL ಆಯ್ಕೆ ಮಾಡಿ ಮತ್ತು ಡೇಟಾವನ್ನು ಆಯ್ಕೆ ಮಾಡಿಕೊಂಡು Fetch Authentication History ಮೇಲೆ ಕ್ಲಿಕ್ ಮಾಡಿ.
• ತಕ್ಷಣವೇ, ಕಳೆದ ಆರು ತಿಂಗಳಲ್ಲಿ ನಿಮ್ಮ ಆಧಾರ್ ಕಾರ್ಡ್ ಅನ್ನು ನೀವು ಯಾವುದಕ್ಕೆಲ್ಲಾ ಬಳಸಿದ್ದೀರಿ ಎಂಬುದರ ಕುರಿತು ಎಲ್ಲಾ ಮಾಹಿತಿ ಲಭಿಸುತ್ತದೆ. ಇಷ್ಟೇ ಸಿಂಪಲ್​.!

ಈ ಮೂಲಕ ಆರು ತಿಂಗಳವರೆಗೆ ನಿಮ್ಮ ಆಧಾರ್ ಕಾರ್ಡ್ ಅನ್ನು ಎಲ್ಲೆಲ್ಲಿ ಬಳಸಲಾಗಿದೆ ಮತ್ತು ಯಾವುದಕ್ಕೆ ಬಳಕೆಯಾಗಿದೆ ಎಂಬುದನ್ನು ಸುಲಭವಾಗಿ ತಿಳಿಯಬಹುದು. ನಿಮ್ಮನ್ನು ಹೊರತುಪಡಿಸಿ ಬೇರೆ ಯಾರಾದರೂ ನಿಮ್ಮ ಆಧಾರ್ ಕಾರ್ಡ್ ಬಳಸಿರುವುದು ಕಂಡುಬಂದರೆ, ತಕ್ಷಣವೇ ಸೂಕ್ತ ಕ್ರಮ ಕೈಗೊಳ್ಳಬಹುದು.