ৰঙিয়াত অগ্নিকাণ্ড, অগ্নিদগ্ধ শতায়ু গৰকা বৃদ্ধা

ৰঙিয়া, ২০ ফেব্ৰুৱাৰী: ৰঙিয়াত পুৱতি নিশা ভয়ংকৰ অগ্নিকাণ্ড । শ্মশান কালী মন্দিৰৰ সমীপৰ বলোৰাম বনিয়াৰ গৃহত সংঘটিত হয় এই অগ্নিকাণ্ড । পুৱতি নিশা দাউ দাউকৈ জ্বলি উঠিল দুটাকৈ গৃহ । ঘৰৰ ভিতৰতে আৱদ্ধ হৈ পৰে শিশু, বৃদ্ধাসহ তিনিজন । মূহুৰ্ততে জুইৰ লেলিহান শিখাই আৱৰি ধৰে চৌদিশ । ঘৰৰ দৰ্জা ভাঙি শিশুটিক উদ্ধাৰ কৰিবলৈ সংক্ষম হয় যদিও অগ্নিদগ্ধ হয় শতায়ু গৰকা বৃদ্ধাগৰাকী । পিছত ঘৰটোৰ ভিতৰৰ পৰা কোনোমতে মুমূৰ্ষ অৱস্থাত উদ্ধাৰ কৰে দিম্বেশ্বৰী বনিয়া নামৰ বৃদ্ধাগৰাকীক । লগে লগে গুৰুতৰভাৱে আহত বৃদ্ধাগৰাকীক চিকিৎসালয়ত ভৰ্তি কৰোৱাৰ বাবে ১০৮ এম্বুলেঞ্চক খবৰ দিয়ে যদিও কোনো সহাৰি নোপোৱাৰ অভিযোগ স্থানীয় ৰাইজৰ ।  

উপায়বিহীন হৈ মৃত্যু যন্ত্ৰণাত চটফটাই থকা বৃদ্ধাগৰাকীক এখন মালবাহী চাৰিচকীয়া বাহনেৰে স্থানীয় চিকিৎসালয়ত ভৰ্তি কৰায় যদিও সংকটজনক অৱস্থাত গুৱাহাটী মেডিকেল কলেজ হস্পিতললৈ প্ৰেৰণ কৰে । পৰৱৰ্তী সময়ত অগ্নি নিৰ্বাপক বাহিনীয়ে কোনোমতে জুই নিৰ্বাপন কৰে । জানিব পৰামতে নিশাৰভাগত ঘৰৰ ভিতৰত মম জ্বলাই ৰাখিছিল । মমৰ শিখাৰ পৰা জুই সূত্ৰপাত হোৱাৰ সন্দেহ কৰিছে পৰিয়ালৰ লোকসকলে ।  

লগতে পঢ়ক: অভয়াপুৰীত অগ্নিকাণ্ডত বিনষ্ট দুই লক্ষাধিক টকাৰ সম্পত্তি