কোকৰাঝাৰ,১ মাৰ্চ:কোকৰাঝাৰ চহৰৰ কঠালগুৰীস্থিত ছাই ষ্টেডিয়ামৰ খেলপথাৰত শুকুৰবাৰৰ পৰা আৰম্ভ হৈছে ৰাজ্যিক পৰ্যায়ৰ খেল মহাৰণৰ প্ৰতিযোগিতাসমূহ ৷ ৰাজ্যৰ ৩৫ খন জিলাৰ খেলুৱৈয়ে অংশগ্ৰহণ কৰা ৰাজ্যিক পৰ্যায়ৰ খেল মহাৰণ প্ৰতিযোগিতাখনি শুকুৰবাৰে শুভ উদ্বোধন কৰে ৰাজ্যৰ ক্ৰীড়া মন্ত্ৰী নন্দিতা গাৰ্লোচাই ৷ অহা ৫ মাৰ্চলৈ ৰাজ্যিক পৰ্যায়ৰ খেলমহাৰণ (এথেলিটিকছ) প্ৰতিযোগিতাসমূহ কোকৰাঝাৰত অনুষ্ঠিত হ'ব ৷
উল্লেখ্য যে ১৯ বছৰ অনুৰ্ধ আৰু ১৯ বছৰ উৰ্ধৰ পুৰুষ আৰু মহিলা শাখাত অনুষ্ঠিত হোৱা খেল মহাৰণ প্ৰতিযোগিতাত ৰাজ্যৰ ৩৫ খন জিলাৰ পৰা মুঠ ১৪৩২ গৰাকী খেলুৱৈয়ে অংশগ্ৰহণ কৰিছে ৷ কোকৰাঝাৰৰ ছাই ষ্টেডিয়ামত শুকুৰবাৰৰ পৰা আৰম্ভ হোৱা খেল মহাৰণ প্ৰতিযোগিতাত কেৱল এথেলেটিকছৰ খেলসমূহহে অনুষ্ঠিত হৈছে ৷ ইপিনে খেলমহাৰণ প্ৰতিযোগিতা শুভ উদ্বোধন কৰি ক্ৰীড়া মন্ত্ৰী নন্দিতা গাৰ্লোচাই কয় যে ৰাজ্যত যোৱা তিনিমাহৰ পৰা খেল মহাৰণ অনুষ্ঠিত হৈ আহিছে ।