কলিয়াবৰ : আজি উৰুকা । ভোগৰ বিহু ভোগালীৰ উৰুকাত এসাঁজ তৃপ্তিৰে খাবৰ বাবে সকলোৱে বিচাৰে মন পছন্দৰ মাছটো ক্ৰয় কৰিবলৈ । সেয়েহে ৰাজ্য়ৰ বিভিন্ন প্ৰান্তত দেওবাৰে নিশাৰে পৰাই পাইকাৰী বজাৰত ব্য়ৱসায়ীৰ লগতে ক্ৰেতাসকলে ভিৰ কৰিছে । কোনে কিমান ডাঙৰ মাছ কিনিব পাৰে যেন তাৰেই অঘোষিত প্ৰতিযোগিতা । বজাৰত এফালৰ পৰা সকলোৱে মাছ কিনিছে । নিজে কিনা মাছটো আনতকৈ ডাঙৰ হয় নে নহয় সেয়াও মনতে জুখি চাবলৈ পাহৰা নাই ।
লোকে লোকাৰণ্য হৈ পৰিল কলিয়াবৰৰ চুলুং পাইকাৰী মাছৰ বজাৰ । কলিয়াবৰৰ চুলুং পাইকাৰী মাছৰ বজাৰত উদুলি-মুদুলি পৰিবেশ । ভোগালীৰ উৰুকাৰ নিশা লগে ভাগে এসাঁজ খোৱাৰ পৰম্পৰা চলি আহিছে । মাছ নহ'লে নহয় উৰুকাৰ তৃপ্তিৰ এসাঁজ । সেয়ে ভোগালীত চাহিদা বৃদ্ধি পাইছে মাছৰ । প্ৰতি বছৰৰ দৰে এইবাৰো কলিয়াবৰৰ চুলুঙত উৰুকাৰ আগনিশা বহিছে মাছৰ বিশেষ বজাৰ ।
লাখ লাখ টকাৰ ব্যৱসায় হোৱা এই বজাৰলৈ মধ্য অসমৰ বিভিন্ন স্থানৰ পৰা মাছ আহে । আনহাতে, ৰাজ্যৰ বিভিন্ন বজাৰত বিক্ৰীৰ বাবে মাছ যায় এই বজাৰৰ পৰাই । এই সম্পৰ্কে ব্য়ৱসায়ী সন্থাৰ সভাপতিগৰাকীয়ে কয়," বিগত বছৰৰ দৰে এইবাৰো মাছৰে উভৈনদী কলিয়াবৰৰ বজাৰ । ৰৌ, বাহু, বৰালি, আঁৰি, চিতল, বিগহেড,কমন কাৰ্প, গ্ৰাছ কাৰ্প আদি ডাঙৰ-ডাঙৰ মাছৰ উজান উঠিছে এই বজাৰখনত । ক্রেতা-বিক্রেতাৰ উপস্থিতিত উখল-মাখল পৰিবেশৰ সৃষ্টি হয় চুলুং পাইকাৰী বজাৰখনত । ২৫ কেজিৰ বিগহেড, ১২ কেজিৰ বৰালি, ৮ কেজিৰ চিতল আদি ডাঙৰ ডাঙৰ মাছ বজাৰখনত বিক্ৰীৰ বাবে অনা হৈছে ।"
বজাৰখনত ডাঙৰ বিগহেড ৩৫০ টকা, বাহু ১২০০ টকা, চিতল ৯০০ টকা আৰু বৰালি ১২০০ টকা পৰ্যন্ত দাম উঠিছে । অৱশ্য়ে বৰ্তমান বিক্ৰীৰ সন্তোষজনক নহয় বুলি বিক্রেতাসকলৰ পৰা জানিব পৰা গৈছে ।
