যোৰহাট, ৭ অক্টোবৰ : যোৰহাট নগৰৰ মাজমজিয়াৰ গড়আলিৰ পূৱ প্ৰান্তত আছে জাগ্ৰত শক্তিপীঠ বুঢ়ী গোঁসানী দেৱালয় । ৰাজ্যৰ লগতে দেশ-বিদেশৰ ভক্তপ্ৰাণ ৰাইজ আহি জাগ্ৰত শক্তিপীঠ বুঢ়ী গোঁসানী দেৱালয়ত এগছি বন্তি প্ৰজ্বলন কৰিবলৈ উদগ্ৰীৱ হৈ থাকে । কাৰণ মাৰ ওচৰত সেৱা আগবঢ়ালে ভক্তৰ নিজৰ মনোকামনা পূৰণ হয় বুলি এক জনবিশ্বাস আছে ।
বুঢ়ী গোঁসানী দেৱালয়ত শাৰদীয় দুৰ্গা পূজাৰ বাবে ব্যাপক প্ৰস্তুতি চলোৱা হৈছে আৰু যুদ্ধংদেহি তৎপৰতাৰে সকলো সাজু হৈছে । এই দেৱালয়খনত ২৩০ তম পূজা-অৰ্চনাৰ বাবে সকলো সাজু হৈছে । পূৰ্বতে এই দেৱালয়ত ম'হ বলি দিয়া হৈছিল যদিও এতিয়া এই প্ৰথা নাই । অৱশ্য়ে হাঁহ, ছাগলী বলি দিয়া হয় । উল্লেখ্য় যে সম্প্ৰতি ম'হ বলি দিয়া নহয় যদিও উৰ্চগা কৰিব পাৰে ভক্তই ।
বুঢ়ীগোঁসানী মূৰ্তি কি দৰে অনা হৈছিল ?
আহোম ৰজা ৰুদ্ৰসিংহই জয়ন্তীয়া ৰজাক পৰাস্ত কৰি জয়ন্তীয়া ৰাজ্যত থকা মূৰ্তি ভাগৰ লগতে পূজাত ব্যৱহৃত অন্যান্য সামগ্ৰী লৈ আনিছিল । প্ৰথমতে মূৰ্তি ভাগ আনি বুঢ়ী নদীৰ কাষত থোৱা বাবে মূৰ্তি ভাগৰ নাম বুঢ়ী গোঁসানী বুলি পৰিচিত হ'ল বুলি এক লোক বিশ্বাস আছে । আহোমৰ ৰাজধানী যোৰহাটলৈ স্থানান্তৰ কৰিব লগা হোৱাৰ লগে লগে মা বুঢ়ী গোসাঁনীকো লৈ অনা হয় ।