নিউজ ডেস্ক, 3 জুলাই: প্ৰতি বছৰেই অসমত বান আৰু খহনীয়াই জুৰুলা কৰি আছে ৰাইজক ৷ নদীপ্ৰধান ৰাজ্য অসমত নৈ-পৰীয়া ৰাইজৰ বাবে আশীৰ্বাদ আৰু অভিশাপ দুয়োটাই এখন নদী ৷ বাৰিষা নদীয়ে কালৰূপ ধাৰণ কৰি ঘৰ-দুৱাৰ, খেতিপথাৰ আদিৰ বিস্তৰ ক্ষতি সাধন কৰে ৷ কিন্তু বানে পেলাই যোৱা পলসে খেতি-পথাৰৰ উৰ্বৰতা বৃদ্ধি কৰি কৃষকক সহায় কৰে ৷ প্ৰতিবাৰেই বান হয় যদিও যোৱা কেইটামান বছৰৰ দৰে এইবাৰ বানে অতি বেছি ভয়ংকৰ ৰূপ লৈছে ৰাজ্যৰ ভিন্ন প্ৰান্তত ৷ ক্ষয়-ক্ষতিৰ পৰিমানো অধিক হৈছে ৷
ৰাজ্যত বিগত সময়ত হোৱা প্ৰলয়ংকৰী বান: অসমৰ ইতিহাসত বহুবাৰ ৰাজ্যখনৰ লোকসকল প্ৰলয়ংকৰী বানৰ সন্মুখীন হৈছে ৷ 1950 চনৰ বৰভূইকঁপৰ পিচত কেবাবছৰো বানে প্ৰলয়ংকৰী ৰূপ ধাৰণ কৰিছে অসমত ৷ 1954, 1962, 1972, 1977, 1984, 1988, 1998, 2002, 2004, 2012, 2019 আৰু 2020 চনত বানে অধিক ক্ষতিসাধন কৰিছিল ৰাজ্যত ৷ তাৰোপৰি 2022 চনত ৰাজ্যখনৰ প্ৰায় 35 জন জিলাৰ ভিতৰত 32 খন জিলাৰ 5.5 মিলিয়ন লোক বানত ক্ষতিগ্ৰস্ত হৈছিল ৷ 2023 চনতো প্ৰায় 22 খন জিলাৰ লোক বানৰ দ্বাৰা প্ৰভাৱিত হৈছিল ৷
লগতে পঢ়ক:বলীয়া বানৰ সংহাৰ ; ঘৰ এৰি ৰাষ্ট্ৰীয় ঘাইপথত আশ্ৰয় গ্ৰহণ বন্যাৰ্তৰ - ASSAM FLOOD 2024
অসমৰ বানত সৰ্বাধিক প্লাবিত অঞ্চলসমূহ-
- ৰাষ্ট্ৰীয় বান আয়োগৰ মতে, অসমৰ 40 শতাংশ অঞ্চল (31.05 লাখ হেক্টৰ) বানপ্ৰৱণ অঞ্চল ৷
- ৰাষ্ট্ৰীয় বান আয়োগৰ তথ্যত প্ৰকাশ পোৱা মতে অসমৰ মুঠ 78.523 লাখ হেক্টৰ ভূমিৰ ভিতৰত 31.05 লাখ হেক্টৰ ভূমিয়েই বানৰ কবলত পৰে ৷ শতাংশ হিচাপত এই পৰিসংখ্যা হৈছে 39.58 ৷ দেশৰ মুঠ বানপ্ৰৱণ অঞ্চলৰ 9.40 শতাংশ ভূমি আছে অসমত ৷ ইয়াৰ পৰা বুজা যায় যে অসমৰ বানপ্ৰৱণ অঞ্চলৰ পৰিসংখ্যা দেশৰ মুঠ বানপ্ৰৱণ অঞ্চলৰ চাৰিগুণ ৷
- ইছৰোৰ তথ্য মতে, অসমৰ ভূ-খণ্ডৰ প্ৰায় 30 শতাংশ অঞ্চল (22.54 লাখ হেক্টৰ) 1998 ৰ পৰা 2015 চনলৈ বানৰ দ্বাৰা প্ৰভাৱিত হৈছিল ৷ লগতে কোৱা হৈছে যে এই সময়ছোৱাত এবাৰ হ’লেও বানৰ ফলত প্ৰায় 22 লাখ হেক্টৰ ভূমি ক্ষতিগ্ৰস্ত হৈছে ।
- অসমৰ 34 খন জিলাৰ ভিতৰত 17 খনেই বানৰ দ্বাৰা অধিক ক্ষতিগ্ৰস্ত হয় ৷
- তথ্য মতে, বছৰি বানৰ দ্বাৰা গড়ে 9.31 লাখ হেক্টৰ ভূমি প্ৰভাৱিত হয় অসমত ৷
- প্ৰতিবছৰে 3 বা 4 বাৰকৈ অসমত বানে প্ৰভাৱিত কৰে ৷
- 1954 চনৰ পৰা বৰ্তমানলৈকে 13 বাৰকৈ বিধ্বংসী বানৰ মুখামুখি হৈছে অসমবাসী ৷
লগতে পঢ়ক:বানত ককবকাইছে ৰাজ্য়ৰ জনতাই : যেনিয়েই চকু যায় তেনিয়েই কেৱল পানী আৰু পানী - Assam Flood 2024
অসমত বান সমস্যাৰ কাৰণসমূহ-
- নদী প্ৰধান ৰাজ্য হোৱাৰ বাবেই প্ৰতিবছৰে অসম বান আৰু খহনীয়াৰ দৰে প্ৰাকৃতিক দুৰ্যোগৰ মুখামুখি হয় ৷ বানৰ ফলত ৰাজ্যখনৰ উন্নয়নত নেতিবাচক প্ৰভাৱ পৰে ৷
- অসমৰ নদীসমূহেই হৈছে বান সমস্যাৰ প্ৰধান কাৰণ ৷ কিয়নো ঘন বৰষুণৰ ফলত নদীসমূহ দুয়োপাৰ উপচি পৰি বান সমস্যাৰ সৃষ্টি কৰে ৷ খহনীয়াৰো অন্যতম কাৰণ হৈছে নদীসমূহ ৷ অসমৰ নদীসমূহে বৃহৎ পৰিমাণৰ পলস আৰু অন্যান্য ধ্বংসাৱশেষ বহন কৰাৰ ফলত নদীৰ গৰ্ভ বাম হৈ পৰে । গতিকে বৰষুণৰ সময়ত জলপৃষ্ঠ বৃদ্ধি পালে সেই পানী মূল নদীৰে বৈ যোৱাটো অসম্ভৱ হৈ পৰে ৷
- অসমৰ বানৰ বাবে ভূ-প্ৰকৃতিয়ে মুখ্য ভূমিকা পালন কৰে । ৰাজ্যখনৰ বেছিভাগ নদীয়েই অত্যধিক গতিৰে নামনিলৈ বৈ যায় আৰু ধাৰাসাৰ বৰষুণৰ সময়ত জলপৃষ্ঠ দুগুণ বৃদ্ধি পায়, ফলত মথাউৰি ভাগি যায় ।
- এই প্ৰক্ৰিয়াত মানুহৰ হস্তক্ষেপে পানীৰ প্ৰাকৃতিক প্ৰবাহত বাধাৰ সৃষ্টি কৰে যিটো বানৰ অন্যতম কৰাক । বিশেষকৈ বাৰিষাৰ সময়ত ব্ৰহ্মপুত্ৰ আৰু বৰাক দুয়োখন বিপদসীমাৰ ওপৰেৰে বৈ যায় । পানীৰ প্ৰবাহ বৃদ্ধি পোৱাৰ লগে লগে পাহাৰত বা নদীৰ উচ্চ অংশত হোৱা বৰষুণেও বান সমস্যাত অৰিহণা যোগায় ।
- ব্ৰহ্মপুত্ৰ আৰু বৰাক নদীত 50 খনতকৈও অধিক উপনৈৰ পানী মিলিত হয়, যিয়ে প্ৰতি বছৰে বাৰিষা কালত বানৰ ধ্বংসলীলাৰ সৃষ্টি কৰে ।
- ব্ৰহ্মপুত্ৰ অতি অস্থিৰ নদী, কাৰণ ইয়াৰ পলস আৰু ঠেক ঢাল । ইয়াৰ উপৰিও সমগ্ৰ অঞ্চলটো ভূমিকম্পৰ প্ৰৱণ অঞ্চল আৰু ইয়াত অধিক বৰষুণ হয় ।
- ৰাজ্যখন মাজেৰে বৈ গৈছে বিশাল ব্ৰহ্মপুত্ৰ নদী । চাৰিখন দেশৰ মাজেৰে বৈ যোৱা 5 লাখ 80 হাজাৰ বৰ্গ কিলোমিটাৰ অৱবাহিকা থকা ব্ৰহ্মপুত্ৰ নদীখন ই কঢ়িয়াই অনা বৃহৎ পৰিমাণৰ পলসৰ পৰিমাণৰ বাবে জনাজাত ।
- ব্ৰহ্মপুত্ৰ নদীৰ ভাঁজবোৰৰ বাবে বান সমস্যাৰ সৃষ্টি হয়; মূল নদীৰ উচ্চ পৰ্যায়ত উপনৈসমূহৰ নিৰ্গমন স্থানত পলসৰ পৰিমাণ আৰু পাহাৰীয়া জলধাৰাত মাটিৰ খহনীয়া আৰু ভূমিস্খলনৰ বাবে নদীখনে অত্যধিক পলসৰ বোজা বহন কৰিব লাগে ।
- তিব্বতত নদীখনৰ উৎপত্তিস্থলত পলস জমা হ'বলৈ আৰম্ভ কৰে, কাৰণ হিমবাহ গলি মাটি খহাই পেলায় । নদীখন অসম অভিমুখে বৈ অহাৰ লগে লগে ই অধিক পলস গোটাই লয়, ৰাজ্যখনৰ ভৈয়ামত ইয়াৰ বুকুত বৃহৎ পৰিমাণৰ পলস জমা হয় । নদীখনৰ আন আন উপনৈবোৰলৈ এই পলস প্ৰসাৰিত নহয়, যাৰ ফলত বৃহৎ পৰিমাণে নদীৰ বক্ষভাগ ওফন্দি উঠে আৰু খহনীয়াৰ সৃষ্টি হয় ।
- 2015 চনত অসম চৰকাৰে প্ৰকাশ কৰা এখন গৱেষণা পত্ৰৰ মতে, 1954 চনৰ পৰা খহনীয়াত 3800 বৰ্গ কিলোমিটাৰতকৈও অধিক কৃষিভূমি জাহ গৈছে ৷ প্ৰতি বছৰে প্ৰায় 8 হাজাৰ হেক্টৰ মাটি খহনীয়াত জাহ যায় ।
- বনাঞ্চলত জলাশয় নিৰ্মাণ, স্থানীয় জলভাগ ধ্বংস আৰু অত্যধিক মথাউৰি নিৰ্মাণে প্ৰতি বছৰে ৰাজ্যখনে সন্মুখীন হোৱা দুৰ্যোগক আৰু অধিক জোৰদাৰ কৰি তুলিছে । এই পদ্ধতিগত ধ্বংসই অঞ্চলটোৰ দুৰ্যোগৰ দুৰ্বলতা বৃদ্ধি কৰিছে ।
- জলবায়ু পৰিৱৰ্তন আৰু ইয়াৰ প্ৰভাৱ দেখা গৈছে পূব হিমালয়ত, য’ৰ পৰা ব্ৰহ্মপুত্ৰৰ বহু উপনৈৰ উৎপত্তি হয় ।
- অৰুণাচল প্ৰদেশত ব্যাপক বনাঞ্চল ধ্বংসৰ ফলত অসমত বিষয়টো আৰু অধিক জটিল হৈ পৰিছে ।
- অৰুণাচল প্ৰদেশ আৰু মেঘালয়ৰ দৰে চুবুৰীয়া ৰাজ্যৰ পৰা তললৈ বৈ অহা নদীৰ ক্ষন্তেকীয়া বাঢ়নী পানীৰ ফলত ৰাজ্যখনৰ বান সমস্যা আৰু অধিক ভয়াৱহ হৈ পৰিছে ।
লগতে পঢ়ক:বানৰ কবলত চিলাপথাৰৰ বিস্তীৰ্ণ অঞ্চল; পশুধনৰ খাদ্যৰ অভাৱ - ASSAM FLOOD 2024
