গুৱাহাটী :২০২৬ ৰ বিধানসভাৰ নিৰ্বাচনৰ বাবে সময় যিমানেই চমু চাপি আহিছে সিমানেই ৰাজ্যৰ মুখ্যমন্ত্ৰী ড৹ হিমন্ত বিশ্ব শৰ্মা নেতৃত্বাধীন চৰকাৰখনৰ কেবিনেটৰ সিদ্ধান্তৰ চমক বৃদ্ধি হৈ গৈ আছে ৷ বৃহস্পতিবাৰে ৰাজধানী দিশপুৰত অনুষ্ঠিত হয় এক কেবিনেটৰ বৈঠক ৷
এই কেবিনেট বৈঠকৰ পিছতেই মুখ্যমন্ত্ৰীৰ সভাকক্ষত এক সংবাদমেলযোগে কেইবাটাও গুৰুত্বপূৰ্ণ সিদ্ধান্ত ঘোষণা কৰে । মুখ্যমন্ত্ৰীৰ ঘোষণাসমূহ তলত উল্লেখ কৰা হ’ল -
‘‘আপোন ঘৰ’’ আঁচনিত ৩০ লাখ পৰ্যন্ত ঋণ:
চৰকাৰী কৰ্মচাৰীসকলক লক্ষ্য কৰি গৃহ প্ৰসংগত কেবিনেটে ল’লে গুৰুত্বপূৰ্ণ সিদ্ধান্ত । বৃহস্পতিবাৰে সন্ধিয়া অনুষ্ঠিত কেবিনেটে আনিলে ৰাজ্যৰ চৰকাৰৰ কৰ্মচাৰীলৈ সুখবৰ । ‘‘আপোন ঘৰ’’ আঁচনিৰ জৰিয়তে ৩০ লাখ পৰ্যন্ত ঋণ ল'ব পাৰিব চৰকাৰী কৰ্মচাৰীয়ে । পূৰ্বে ১৫ লাখ টকালৈ এই আঁচনিৰ জৰিয়তে লাভ কৰিছিল ঋণ । এতিয়া এই আঁচনিৰ জৰিয়তে ৩০ লাখ টকা পৰ্যন্ত ল’ব পাৰিব ঋণ ৷
মুখ্যমন্ত্ৰী ড৹ হিমন্ত বিশ্ব শৰ্মা (@himantabiswa)
আনহাতে, যিসকল চৰকাৰী কৰ্মচাৰীয়ে পূৰ্বে এই আঁচনিৰ জৰিয়তে ১৫ লাখ টকাৰ ঋণ লৈছিল সেইসকলেও আন ১৫ লাখ টকাৰ ঋণ ল’ব পাৰিব বুলি কেবিনেটত সিদ্ধান্ত গ্ৰহণ কৰা হয় । সংবাদমেলত এই কথা সদৰী কৰে মুখ্যমন্ত্ৰীয়ে । এই ‘‘আপোন ঘৰ’’ৰ লাভালাভ সম্প্ৰসাৰণত ১% সুদ ৰেহাইৰ সৈতে ইতিমধ্যে আঁচনিখনৰ সুবিধা গ্ৰহণ কৰা ৩৭,২৭৭ হিতাধিকাৰীলৈ ৩০ লাখ টকাৰ বৰ্ধিত ঋণ সীমাৰ লাভালাভ সম্প্ৰসাৰিত কৰাৰ প্ৰস্তাৱত অনুমোদন কেবিনেটৰ ।
ৰাজ্যৰ ধৰ্মীয় উপাসনাস্থলীসমূহক লৈ ৰাজ্যিক কেবিনেটে ল’লে গুৰুত্বপূৰ্ণ সিদ্ধান্ত । ৰাজ্যৰ ২৫ হাজাৰ ধৰ্মীয় উপাসনা স্থলীলৈ তিনি লাখ টকাকৈ দিয়া হ'ব । সংবাদমেলত এই কথা ঘোষণা মুখ্যমন্ত্ৰী ড৹ হিমন্ত বিশ্ব শৰ্মাৰ ।
