স্পৰ্টছ ডেস্ক, 7 জুলাই : হাৰাৰেত বেটে-বলে উজ্বলিল ভাৰতীয় যুৱ দল ৷ যুৱ তথা নৱাগত খেলুৱৈৰে ভৰা দলটোৱে আজি হাৰাৰেত শক্তিশালী প্ৰত্যাৱৰ্তন ঘটায় ৷ পাঁচখনীয়া শৃংখলাৰ প্ৰথমখন মেচত পৰাজয়ৰ পাচত আজি প্ৰত্যাৱৰ্তনেৰে ভাৰতীয় যুৱ দলটোৱে জিম্বাব’ৱেক 100 ৰাণৰ বিশাল ব্যৱধানত পৰাস্ত কৰিছে ৷ 235 ৰাণৰ বিশাল লক্ষ্য খেদি জিম্বাব’ৱে দলটোৱে ভাৰতৰ শক্তিশালী বলিং আক্ৰমণৰ সন্মুখত তিষ্ঠিব নোৱাৰি 18.4 অভাৰতে 134 ৰাণত আটাইকেইটা উইকেট হেৰুৱায় ৷ ৱেছলী মাধেভেৰে সৰ্বাধিক 43 ৰাণ সংগ্ৰহ কৰে ৷ ভাৰতৰ হৈ মুকেশ কুমাৰ আৰু আভেশ খানে 3 টাকৈ উইকেট দখল কৰে ৷ ৰবি বিষ্ণোইয়ে 2 টা উইকেট আৰু ৱাশ্বিংটন সুন্দৰে 1 টা উইকেট দখল কৰে ৷
ইফালে শনিবাৰে অনুষ্ঠিত হোৱা প্ৰথমখন মেচত আন্তঃৰাষ্ট্ৰীয় T-20ত অভিষেক ঘটোৱা অপেনিং বেটছমেন অভিষেক শৰ্মাই শূণ্যতে আউট হোৱাৰ পিচত আজি দ্বিতীয়খন মেচত দুৰ্দান্ত প্ৰদৰ্শন আগবঢ়ায় ৷ টছত জিকি প্ৰথমে বেটিঙৰ সিদ্ধান্ত লোৱা ভাৰতে অভিষেক শৰ্মা আৰু ৰুতুৰাজ গাইকোৱাডৰ বেটিং বিক্ৰমৰ সহায়ত নিৰ্ধাৰিত 20 অভাৰত 2 টা উইকেট হেৰুৱাই জিম্বাব’ৱেক বান্ধি দিয়ে 235 ৰাণৰ বিশাল লক্ষ্য ৷ অভিষেক মেচত ব্যৰ্থ হোৱা অভিষেক শৰ্মাই সমালোচকৰ মুখ বন্ধ কৰি দুৰ্দান্ত বেটিঙেৰে আন্তঃৰাষ্ট্ৰীয় T-20ত প্ৰথমটো শতক অৰ্জন কৰে ৷
দলীয় দহ ৰাণত 1.2 অভাৰতে অধিনায়ক শুভমন গিলৰ উইকেট হেৰুৱাই শলঠেকত পৰিছিল ভাৰতীয় দল ৷ ব্যক্তিগত 2 ৰাণত শুভমন গিলৰ উইকেট পতনৰ পিচত অভিষেক শৰ্মাই দলক আগুৱাই নিয়াৰ দায়িত্ব কান্ধ পাতি লয় ৷ বিস্ফোৰক বেটছমেনজনে মাত্ৰ 47 টা বলতে 8 টা ছয় আৰু 7 টা চাৰিৰ সহায়ত 100 ৰাণৰ এক গুৰুত্বপূৰ্ণ ইনিংছ খেলে ৷ ব্যক্তিগত 100 ৰাণত অভিষেক শৰ্মাৰ উইকেট পতনৰ পিচত আন এজন বিস্ফোৰক বেটছমেন ৰুতুৰাজ গাইকোৱাডে দুৰ্দান্ত বেটিঙেৰে 77 ৰাণৰ এক দৰ্শনীয় ইনিংছ খেলে ৷ গাইকোৱাডে 47 টা বলত 11 টা চাৰি আৰু 1 টা ছয়ৰ সহায়ত 77 ৰাণ সংগ্ৰহ কৰি অপৰাজিত হৈছে ৷ ইফালে ৰিংকু সিঙেও গাইকোৱাডৰ সৈতে যুচি বান্ধি দলৰ স্ক’ৰ 234 লৈ যোৱাত সহায় কৰে ৷ ৰিংকু সিঙে 22 টা বলত 5 টা ছয় আৰু 2 টা চাৰিৰ সহায়ত 48 ৰাণত অপৰাজিত হৈ থাকে ৷