বুধবাৰে মহালয়া । পিতৃপক্ষৰ অন্ত পেলাই মহালয়াত দেৱী পক্ষৰ আৰম্ভণি হয় ৷ মহালয়া পিতৃপক্ষ আৰু দেৱীপক্ষৰ সন্ধিক্ষণ । ইয়াৰ জৰিয়তে দুৰ্গাপূজাৰ আৰম্ভ হয় । এই দিনটোতে ধৰালৈ দেৱীৰ আগমন হৈছিল বুলি বিশ্বাস কৰা হয় । মহালয়াৰ দিনটো কিদৰে পালন কৰিব লাগে জনপ্ৰিয় জ্যোতিষশাস্ত্ৰবিদ কিৰো ইয়ঙৰ পৰা এই সন্দৰ্ভত বিতংভাৱে জানো আহক-
জ্যোতিষী কিৰো ইয়ঙে কয় যে, ২ অক্টোবৰৰ পুৱাৰ ভাগতে আৰম্ভ হ’ব মহালয়া । মহালয়াৰ সময়খিনি হৈছে পিতৃপক্ষ আৰু দেৱীপক্ষৰ মাজৰ সন্ধিক্ষণ । দেৱী এই দিনটোতে স্বামীগৃহৰ পৰা মাতৃগৃহলৈ আহে ।
মহালয়াৰ দিনটোত কি কি কৰিব ?
পুৱাৰ ভাগত দেৱীৰ মাহাত্মাং সূত্ৰ সকলোৱে শুনিব লাগে । পুৱাৰ ভাগত নদীৰ পাৰলৈ গৈ দেৱীক স্মৰণ কৰিব লাগে । এই দিনটোত পূৰ্বপুৰুষৰ আত্মাৰ শান্তিৰ অৰ্থে তৰ্পণ কৰিব লাগে । ঘৰৰ কোনো প্ৰয়াত হৈছে যদি তেওঁলোকৰ ফটোত নতুন মালা লগোৱাৰ লগতে এগচি বন্তি জ্বলাব লাগে ।
- এই দিনটোত যিসকলে মহালয়াত তৰ্পণ কৰিব নোৱাৰে তেওঁলোকে পিতৃপক্ষৰ উদ্দেশ্যে মাল্যদান আৰু পূৰ্বপুৰুষৰ প্ৰিয় খাদ্য আগবঢ়াব লাগে ।
- দৰিদ্ৰ লোক আৰু পশু-পক্ষীক খাদ্য দিব লাগে । ঘৰত গীতাপাঠ বিষ্ণুপাঠ কৰিব লাগে । সেই দিনটোত ঘৰৰ দক্ষিণ দিশত গোটেই নিশা এগছি বন্তি জ্বলাই ৰাখক ।
- মহালয়াৰ দিনটোত আহত গছৰ তলত তিল আৰু বগা ফুল আদি দি তৰ্পণ কৰিলে ঘৰত শ্ৰীবৃদ্ধি ঘটে বুলি বিশ্বাস কৰা হয় ।
এই দিনটোত কি কৰিব নালাগে
- কোনো ধৰণৰ শুভ কাম কৰিব নালাগে । সেই দিনটোত গৃহপ্ৰৱেশ, সম্পত্তি ক্ৰয়, নতুন ব্যৱসায়ৰ আৰম্ভণি কৰিব নালাগে ।
- মহালয়াৰ দিনটোত আমিষ আহাৰ গ্ৰহণ কৰিব নালাগে ।
- ধূমপান-মদ্যপান কৰাৰ পৰা বিৰত থাকিব লাগে ।
