বিশেষ প্ৰতিবেদন, ৬ অক্টোবৰ : সত্য হৈছে যুদ্ধৰ প্ৰথম আঘাত; মহিলা আৰু শিশু দ্বিতীয় । ই প্ৰতিটো সংঘৰ্ষৰ ক্ষেত্ৰতে সঁচা সেয়া লাগিলে ইজৰাইল আৰু হামাছ, ৰাছিয়া আৰু ইউক্ৰেইন বা পশ্চিম এছিয়াৰ আন ঠাইত চলা সংঘৰ্ষই নহওঁক কিয় । এবছৰ পূৰ্বে হামাছৰ যুঁজাৰুসকলে ইজৰাইলত আক্ৰমণ কৰিছিল । নিৰ্বিচাৰভাৱে গুলীচালনা কৰি এক সম্পূৰ্ণ যুদ্ধৰ পৰিৱেশ কৰি তুলিছিল । ৭ অক্টোবৰত হামাছে ১,২০০ গৰাকী লোকক হত্যা কৰিছিল আৰু প্ৰায় ২৫০ গৰাকী ইজৰাইলীক অপহৰণ কৰিছিল; তেওঁলোকৰ ভিতৰত ১০০ তকৈও অধিক লোক এতিয়াও গাজাৰ কোনোবা অঞ্চলত হামাছে বন্দী কৰি ৰাখিছে আৰু কোনেও নাজানে যে তেওঁলোকৰ কিমান জীয়াই আছে ।
যুদ্ধৰ ফলত প্ৰভাৱিত পেলেষ্টাইনী
ইয়াৰ প্ৰতিশোধ স্বৰূপে, ইজৰাইলী সেনাই এতিয়ালৈকে প্ৰায় ৪১,০০০ পেলেষ্টাইনীক হত্যা কৰিছে । মৃতকৰ সামগ্ৰিক সংখ্যাৰ ভিতৰত ১৬,০০০ শিশু আছিল । ১৯,০০০ শিশু অনাথ হৈছে আৰু ১০০০ ৰো অধিক শিশু ঘূণীয়া হৈছে । ৯০ শতাংশ পেলেষ্টাইনী আভ্যন্তৰীণভাৱে স্থানচ্যুত হৈছে । সম্পূৰ্ণ অৱৰোধ হোৱাৰ বাবে বেছিভাগ লোকে খাদ্য সংকটৰ সন্মুখীন হৈছে । চিকিৎসালয়, বিদ্যালয় আদিকে ধৰি সমগ্ৰ গাজাৰ বিভিন্ন অট্টালিকাসমূহ ধ্বংসপ্ৰাপ্ত হৈছে ।
প্ৰভাৱিত মহিলা আৰু শিশু
এবছৰৰ সংঘৰ্ষৰ অন্তত পেলেষ্টাইন প্ৰায় ধ্বংস হৈ গৈছে আৰু হামাছে এতিয়াও বিভিন্ন লোকক বন্দী কৰি ৰাখিছে । ইজৰাইলত জীৱন যাত্ৰা স্বাভাৱিক যেন লাগিলেও এই সংঘৰ্ষৰ কেন্দ্ৰবিন্দু গাজাত জীৱন স্থবিৰ হৈ পৰিছে । শিশু আৰু মহিলাসকল আকাশী আক্ৰমণৰ ক্ষেত্ৰত অধিক অসুৰক্ষিত । তেওঁলোকে আশ্ৰয় ল'ব পৰা কোনো সুৰক্ষিত স্থান নাই । প্ৰাথমিক অস্তিত্ব সংকটত আছে । আনহাতে গাজাত স্বাস্থ্য আৰু পৰিচ্ছন্নতা বহু পিছপৰি গৈছে । যেতিয়া এটা বোমাই শিশুক টুকুৰা টুকুৰ কৰি পেলায় আৰু চিৰজীৱনৰ বাবে ঘূণীয়া কৰে তেতিয়া মানৱীয়তা সম্পূৰ্ণ হেৰাই যায় । যিবোৰ শিশুৰ মুখৰ মাত ফুটা নাছিল তেওঁলোকো এই যুদ্ধৰ চিকাৰ হৈছে । তেওঁলোক কাৰো শত্ৰু নহয় বা তেওঁলোকৰ জীৱন মৰ্যাদাহীন হিচাপে গণ্য কৰিব নোৱাৰি ।
যেতিয়া শিশু অধিকাৰৰ বিষয়ে বিশ্বজুৰি অধিক চৰ্চা হৈ আছে আৰু শিশু অধিকাৰৰ ওপৰত ৰাষ্ট্ৰসমূহে আয়োজন কৰা সন্মিলনবোৰ পবিত্ৰ হিচাপে বিবেচনা কৰা হৈছে তেনে এক সময়তে তেওঁলোকক হত্যা কৰা হৈছে । এই যুদ্ধই আন অঞ্চলতো প্ৰভাৱ পেলাইছে । যাৰ ফলত সেই অঞ্চলবোৰৰ মহিলা আৰু শিশুসকল আক্ৰমণৰ প্ৰতি অধিক অসুৰক্ষিত অনুভৱ কৰিছে ।
অস্থিৰ পশ্চিম এছিয়া
শেহতীয়াকৈ লেবাননৰ বিৰুদ্ধে ইজৰাইলৰ যুদ্ধই এক নতুন উদ্বেগৰ সৃষ্টি কৰিছে । বেছিভাগ অঞ্চলতে জীয়াই থকা আৰু বিকাশৰ ধাৰণাটোৰ ক্ষতি কৰিছে আৰু এতিয়া লেবাননৰ দক্ষিণত ইয়াৰ অস্তিত্ব অতি কম । লেবাননৰ যুদ্ধৰ বাতৰিটোৱে পশ্চিম এছিয়াৰ লোকসকলক দিনক দিনে উদ্বিগ্ন কৰি তুলিছে আৰু গাজাৰ ভয়াৱহতাই কেৱল তেওঁলোকৰ অস্থিৰতাৰ অনুভূতি বৃদ্ধি কৰাত সহায় কৰিছে । পেলেষ্টাইন আৰু লেবাননৰ কিছু অংশত আকাশী আক্ৰমণৰ ফলত সমগ্ৰ অঞ্চলটোত অনিশ্চয়তাই বিৰাজ কৰিছে ।
য়েমেনৰ হুথিসকলে কিছু সময়ৰ বাবে নিৰৱ হৈ থকা যেন লাগিছে, তেওঁলোকে হিজবুল্লাহৰ পিছত পৰৱৰ্তী লক্ষ্য হ'ব পাৰে বুলি আশংকা কৰিছে । ইৰাণে হুথি আৰু হিজবুল্লাহ উভয়কে সমৰ্থন কৰে । হিজবুল্লাহ নেতা হাছান নাছৰুল্লাহক হত্যা কৰাৰ পিছত ইৰাণে ব্ৰিংকমেনশ্বিপৰ আশ্ৰয় লৈছিল, সম্ভৱতঃ ইজৰাইলে কেনে প্ৰতিক্ৰিয়া দেখুৱাব তাৰ পৰীক্ষা কৰাৰ প্ৰয়াস কৰিছিল । হিজবুল্লাহ আৰু হামাছৰ প্ৰতি ইজৰাইলৰ প্ৰতিক্ৰিয়া কঠোৰ আৰু হিংস্ৰ আছিল ।
ইজৰাইলৰ মুকলি বিৰোধিতা কৰা একমাত্ৰ ৰাষ্ট্ৰ হৈছে য়েমেন, লেবানন আৰু ইৰাণৰ দৰে কিছুমান চিয়া প্ৰধান দেশ । চৌদি আৰৱ আৰু অন্যান্য চুন্নী প্ৰধান দেশসমূহে নৰম কূটনীতিৰ আশ্ৰয় লয় । ইছলামিক দেশসমূহে সতৰ্ক হৈ আছে আৰু ইজৰাইল আৰু হামাছৰ মাজৰ বিবাদৰ মধ্যস্থতা কৰি উত্তেজনা হ্ৰাস কৰিবলৈ চেষ্টা কৰিছে । ইজিপ্ত আৰু কাটাৰে যুদ্ধবিৰতি অনাৰ বাবে কাম কৰি আছে আনহাতে আমেৰিকাই ইজৰাইলক নিৰন্তৰ সমৰ্থন কৰিছে আৰু অস্ত্ৰ-শস্ত্ৰৰে সহায় কৰি আছে । আমেৰিকাই ইজৰাইলক যুদ্ধবিৰতিৰ বাবে উৎসাহিত কৰিবলৈ এক বিফল প্ৰয়াস কৰিছিল ।
ভাৰতৰ বাবে পশ্চিম এছিয়া গুৰুত্বপূৰ্ণ
এই সকলো ক্ষেত্ৰতে ভাৰতে এক অতি গুৰুত্বপূৰ্ণ স্থিতি গ্ৰহণ কৰিছে কিয়নো ভাৰতে ইজৰাইলৰ সৈতে এক ঘনিষ্ঠ সম্পৰ্ক ৰাখে আৰু পেলেষ্টাইনী নেতাসকলৰ সৈতেও সুসম্পৰ্ক বজাই ৰাখে । ভাৰতে সতৰ্কতাৰে পদক্ষেপ লয় কিয়নো সমগ্ৰ পশ্চিম এছিয়াত ইয়াৰ বিশেষ স্থান আছে । উচ্চাভিলাষী আইএমইইচি (ভাৰত মধ্য প্ৰাচ্য অৰ্থনৈতিক কৰিডৰ) প্ৰকল্পৰ সফলতা চৌদি আৰৱৰ ওপৰত যথেষ্ট নিৰ্ভৰ কৰে যিটো এতিয়াও আৰম্ভ হোৱা নাই । কেৱল চৌদি আৰৱে নহয় ইৰাণো ভাৰতৰ বাবে গুৰুত্বপূৰ্ণ । ইৰাণত ভাৰতৰ চাবাহাৰ বন্দৰ কৌশলগত আৰু অৰ্থনৈতিকভাৱে গুৰুত্বপূৰ্ণ । ভাৰতৰ বিকাশৰ বাবে ইৰাণ আৰু চৌদি দুয়োখন দেশে গুৰুত্বপূৰ্ণ ।
সমগ্ৰ পশ্চিম এছিয়া ভাৰতৰ বাবে কৌশলগতভাৱে গুৰুত্বপূৰ্ণ । কিয়নো গুৰুত্বপূৰ্ণ প্ৰতিৰক্ষাৰ যোগান ইজৰাইলৰ পৰা আহে । একে সময়তে, ইৰাণে ভাৰতক খাৰুৱা তেল যোগান ধৰে । ৮০ শতাংশ তৈল সম্পদ পশ্চিম এছিয়াৰ পৰা আহে আৰু ব্যাঘাতৰ ফলত ভাৰতৰ যথেষ্ট অসুবিধা হ'ব পাৰে । ইজৰাইল আৰু ইৰাণৰ মাজত এক সম্পূৰ্ণ যুদ্ধ ভাৰতৰ স্বাৰ্থৰ বিৰুদ্ধে হ'ব । ভাৰতে আলোচনাৰ বাবে আবেদন জনাইছে আৰু হিংসাৰ সমাপ্তিৰ বাবে ওকালতি কৰি আহিছে । চীন আৰু ভাৰতে পশ্চিম এছিয়াত সম্পদ আৰু সুযোগৰ বাবে প্ৰতিদ্বন্দ্বিতা কৰি আহিছে ।
যদি হামাছে ২০২৩ৰ ৭ অক্টোবৰত আক্ৰমণ আৰম্ভ নকৰিলেহেঁতেন, চীনৰ মধ্যস্থতাৰ এক বেলেগ ফলাফল হ'লহেঁতেন । চীনে হামাছ আৰু আল ফাতাহৰ লগতে চৌদি আৰৱ আৰু ইৰাণৰ মাজত মীমাংসাৰ মধ্যস্থতা কৰিবলৈ চেষ্টা কৰিছিল । এই চুক্তিসমূহে চুন্নী আৰু চিয়াসকলক একত্ৰিত কৰাৰ পূৰ্বে এক সম্পূৰ্ণ সংঘৰ্ষ আৰম্ভ হয় । যাৰ ফলত চৌদি আৰৱ আৰু ইৰাণীসকলৰ মাজত কঠিন অনুভূতি অমীমাংসিত হৈ পৰে আৰু ইজৰাইলক প্ৰাধান্য দিয়া হয় । ইজৰাইলে হামাছ আৰু ইয়াৰ মিত্ৰশক্তিৰ বিৰুদ্ধে যুঁজ অব্যাহত ৰাখিব, যাৰ ফলত চৌদি আৰৱ আৰু ইজৰাইল দুয়োপক্ষ উপকৃত হ'ব, যি দুয়োটাই হুথিসকলৰ পৰা পৰিত্ৰাণ পাবলৈ প্ৰয়াস কৰি আহিছে । ইৰাণৰ মিছাইল আক্ৰমণৰ প্ৰতি ইজৰাইলে কেনেদৰে সঁহাৰি দিয়ে সেয়াহে লক্ষণীয় হ'ব ।
লগতে পঢ়ক :এটা বছৰ ধৰি অশান্তজৰ্জৰ- যুদ্ধ বিধ্বস্ত পশ্চিম এছিয়া ! - ISRAEL IRAN CONFLICT
