মহালয়াৰ পিছৰ দিনটোতে অৰ্থাৎ ৩ অক্টোবৰৰ পৰা আৰম্ভ হ’ব নৱৰাত্ৰি পূজা ৷ এই ৯ দিনত দুৰ্গা দেৱীৰ ৯ টা ৰূপৰ পূজা কৰা হয় ৷ এনেক্ষেত্ৰত আপুনি কিদৰে নৱৰাত্ৰি পালন কৰিব জানো আহক জনপ্ৰিয় জ্যোতিষশাস্ত্ৰবিদ কিৰো ইয়ঙৰ পৰা -
জ্যোতিষী কিৰো ইয়ঙে কয়, "নৱৰাত্ৰিত দেৱীৰ ৯ টকা ৰূপক বেলেগ বেলেগ নামেৰে পূজা কৰা হয় ৷ প্ৰতিদিনে দেৱীৰ ৰং বেলেগ হয় ৷ প্ৰতিবছৰৰ দৰে এইবাৰো এই ৯ দিনত দেৱীৰ ৯টা বেলেগ বেলেগ ৰং আছে ৷ নৱৰাত্ৰিৰ আৰম্ভণিতে অৰ্থাৎ ৩ অক্টোবৰত পুৱাই এগচি চাকি জ্বলাব লাগে যাতে সেই চাকিগচি নৱমী পূজালৈ নুমাই নাযায় তাৰ প্ৰতি লক্ষ্য ৰাখিব লাগে ৷ মংগল ঘট এটা প্ৰতিষ্ঠা কৰি কাঠৰ পিৰাত ৰঙা নহ'লে হালধীয়া কাপোৰ দি তাত দেৱীৰ ফটো প্ৰতিষ্ঠা কৰিব লাগে ৷"
প্ৰথম দিনটোত দেৱীক শৈলপুত্ৰী বুলি পূজা কৰা হয় ৷ এই দিনটোত দেৱীৰ ৰং হালধীয়া, এই দিনটোত দেৱীয়ে চন্দ্ৰ গ্ৰহক নিয়ন্ত্ৰণ কৰে ৷ যিসকলৰ চন্দ্ৰ অশুভ কাৰক তেওঁলোকে এই দিনটোত দেৱীক পূজা কৰিলে ভাল ফল পায়, ধন ঐশ্বৰ্য বৃদ্ধি পায়
- নৱৰাত্ৰিৰ দ্বিতীয়টো দিনত দেৱীৰ ব্ৰক্ষচাৰিনী ৰূপক পূজা কৰা হয় ৷ এই দিনটোত দেৱীৰ ৰং সেউজীয়া ৷
- তৃতীয় দিনটোত চণ্ডঘন্টা ৰূপক পূজা কৰা হয় ৷ এই দিনটোত দেৱীৰ ৰং ধূসৰ ৷
- চতুৰ্থ দিনটোত দেৱীৰ কুষ্মাণ্ডা ৰূপক পূজা কৰা হয় ৷ সেইদিনা দেৱীৰ ৰং কমলা ৷
- পঞ্চম দিনা স্কন্দমাতাৰ ৰূপক পূজা কৰা হয় ৷ এই দিনত দেৱীৰ ৰং বগা ৷
- ষষ্ঠ দিনটোত কাত্যায়নী ৰূপক পূজা কৰা হয় ৷ সেইদিনাৰ ৰং ৰঙা ৷
- সপ্তম দিনটোত কালৰাত্ৰী ৰূপক পূজা কৰা হয় ৷ সেইদিনা দেৱীৰ ৰং ৰয়েল ব্লু
- অষ্টম দিনটোত দেৱীৰ মহাগৌৰী ৰূপৰ পূজা কৰা হয় ৷ সেইদিনা দেৱীৰ ৰং গুলপীয়া ৷
- নৱমীৰ দিনটোত সিদ্ধিদাত্ৰী ৰূপক পূজা কৰা হয় ৷ সেইটো দিনত দেৱীৰ ৰং বেঙুনীয়া ৷
- দশমীৰ দিনটোত প্ৰথম দিনা প্ৰতিষ্ঠা কৰা মংগল ঘটটো বিসৰ্জন দিব লাগে ৷
নৱৰাত্ৰিৰ ব্ৰত কিদৰে ৰাখিব ?
নৱৰাত্ৰিত নিৰ্জলা ব্ৰত ৰাখিব পাৰিলে ভাল ৷ কিন্তু নিৰ্জলা ব্ৰত ৰখাটো সম্ভৱ নহয় ৷ সেয়েহে দিনটো ব্ৰত ৰাখি সন্ধিয়া ফল-মূল খাব পাৰে ৷ এই দিনকেইটা তলত উল্লেখিত সামগ্ৰী যেনে-ফল-মূল, মৌ, গাখীৰ আদি দেৱীক প্ৰসাদ হিচাপে আগবঢ়াব পাৰে ৷
