সোণাৰাম চুতীয়া সমন্বয় ক্ষেত্ৰ, যোৰহাট : শ্ৰীমন্ত শংকৰদেৱ সংঘৰ ৯৪ সংখ্যক বাৰ্ষিক অধিৱেশনৰ দেওবাৰে অন্তিম দিন । যোৰহাটৰ ম'হবন্ধা এৰালতলি পথাৰৰ বৈষ্ণৱ পণ্ডিত সোণাৰাম চুতীয়া সমন্বয় ক্ষেত্ৰত ৬ ফেব্ৰুৱাৰী পৰা ৯ ফেব্ৰুৱাৰীলৈ চাৰিদিনীয়া কাৰ্যসূচীৰে অনুষ্ঠিত হৈছে এই অধিৱেশন ।
অন্তিমদিনা এৰালতলি পথাৰৰ পৰা ঘৰ অভিমুখে যাত্ৰা ভকত-বৈষ্ণৱ তথা সেৱক-সেৱিকাৰ । ইফালে বৈষ্ণৱ পণ্ডিত সোণাৰাম চুতীয়া সমন্বয় ক্ষেত্ৰত এৰাৰ সময়ত সকলোৰে চকুত আৱেগৰ চকুলো । ইজনে সিজনৰ পৰা বিদায়ৰ মুহূৰ্তত কান্দি কান্দি বিদায় দিয়া দৃশ্যই সকলোৰে হৃদয় সেমেকাই তুলিছে ।
ইয়াৰ মাজতে কেন্দ্ৰীয় সেৱা বাহিনীৰ ১০ হাজাৰ সেৱক-সেৱিকাই ঘৰমুৱা হোৱা ছবিখনে সকলোকে আৱেগিক কৰি তুলিছে । কাৰণ শংকৰদেৱ সংঘৰ অভিন্ন অংগ হৈছে কেন্দ্ৰীয় সেৱা বাহিনী ।
আজিৰ প্ৰজন্মই ধৰ্মীয় সংস্কৃতি ধৰি ৰাখিব নাজানে
আনহাতে, নৱপ্ৰজন্মক প্ৰতিনিধিত্ব কৰা উচ্চ শিক্ষিত এগৰাকী সেৱিকাই কয়, "অধিৱেশনস্থলীত আমাক ধুনীয়াকৈ থাকিবলৈ দিছে । বহু নিয়মানুৱৰ্তিতা আৰু বহু সা-সুবিধাৰে আমাক থাকিবলৈ দিছে । আমি সেৱা বাহিনীৰ শিবিৰত আনন্দ-স্ফূৰ্তি কৰিলোঁ । ধৰ্ম-বৰ্ণ নিৰ্বিশেষে থকা সকলোৰে লগত চিনাকি হ'লোঁ । কৃষ্টি-সংস্কৃতি আদান-প্ৰদান কৰিলোঁ । বিদায় বেলাত আমাৰ দুখ লাগিছে । আমাক বিদায় দি তেওঁলোকেও কান্দিছে । এয়া বুজাব নোৱৰা অনুভূতি । ইয়াত যি ধৰ্মীয় চৰ্চা হয় সেয়াই মন-মগজুক মুগ্ধ কৰে । সেয়া বাহিৰত পোৱা নাযায় ।"
তেওঁ লগতে কয়, "গুৰুজনা অবিহনে অসমীয়া জাতি আধৰুৱা । আজিকালিৰ প্ৰজন্মই আমাৰ ধৰ্মীয় সংস্কৃতি ধৰি ৰাখিব নাজানে । আজিৰ প্ৰজন্ম ডি জে আদিকে ধৰি আধুনিক সংস্কৃতিৰ লগত জড়িত । সদায় ধৰ্মীয় পৰিবেশ জানিব আৰু বুজিব লাগিব । মোৰ বহুত ভাল লাগিল । কাৰণ নৰাত আমি একেলগে শুলোঁ । ইয়াত ঠাণ্ডা অনুভৱ হৈছে নে গৰম অনুভৱ হৈছে । এক ভাললগা পৰিবেশ । ঘৰত থাকিলে সেই পৰিবেশ পোৱা নাযায় । আজিকালিৰ প্ৰজন্ম আধুনিক হ'বলৈ গৈ থাকে ।"
উল্লেখ্য যে শ্ৰীমন্ত শংকৰদেৱ সংঘৰ ৯৪ সংখ্যক বাৰ্ষিক অধিৱেশনত প্ৰতিদিনে লাখ লাখ ভক্তৰ সমাগম ঘটে । ফলত সমন্বয়ৰ এক বিৰল দৃশ্য প্ৰত্যক্ষ কৰিবলৈ পোৱা যায় ।
