বৰপেটা, ১৮ এপ্ৰিল: বৃহস্পতিবাৰে সাংসদ পদৰ বাবে মনোনয়ন দাখিল কৰিলে আঠবাৰৰ বিধায়ক ফণীভূষণ চৌধুৰীয়ে ৷ হাজাৰ হাজাৰ সমৰ্থকক লগত লৈ বিশাল সমদলেৰে বৰপেটা আয়ুক্ত কাৰ্যালয়ত মনোনয়ন দাখিল কৰে বৰপেটা লোকসভা সমষ্টিৰ প্ৰাৰ্থীগৰাকীয়ে ৷
অগপ, বিজেপি আৰু ইউ পি পি এলৰ জ্যেষ্ঠ নেতা-কৰ্মীসকলে অংশগ্ৰহণ কৰে প্ৰাৰ্থীগৰাকীৰ মনোনয়ন দাখিলৰ সময়ত ৷ মনোনয়ন দাখিল কৰাৰ সময়ত উপস্থিত থাকি সাংবাদিকৰ আগত অগপৰ সভাপতি অতুল বৰাই কয় যে তেওঁলোকে বৰপেটা লোকসভা সমষ্টিত জয়লাভ কৰাটো নিশ্চিত । ৰাইজে তেওঁলোকৰ প্ৰতি যি উৎসাহ প্ৰদৰ্শন কৰিছে তাৰ পৰাই নিশ্চিত হৈছে যে ফণীভূষণ চৌধুৰীয়ে বিপুল ভোটত জয়লাভ কৰিব ।
বুধবাৰে নলবাৰীত নৰেন্দ্ৰ মোদীৰ বিশাল সভাৰ পিচত আজি ফণীভূষণ চৌধুৰীৰ মনোনয়ন দাখিলতো ৰাইজৰ সঁহাৰিয়ে তেওঁলোকৰ প্ৰাৰ্থীগৰাকীৰ প্ৰতি থকা মৰমকে স্পষ্ট কৰিছে বুলিও বৰাই কয় । আনহাতে প্ৰাৰ্থী তথা অগপৰ জ্যেষ্ঠ নেতা ফণীভূষণ চৌধুৰীয়ে কয় যে মনোনয়ন দাখিলৰ সময়ত তেওঁ যিধৰণৰ সঁহাৰি পাব বুলি আশা কৰিছিল তাতকৈ বহু বেছিকৈ লাভ কৰিছে ।