শিলচৰ:ৰাজ্যৰ ৫ সমষ্টিৰ উপ-নিৰ্বাচনক লৈ সমষ্টিকেইটাত ৰাজনৈতিক বতাহ উত্তপ্ত হৈ পৰিছে । শাসক-বিৰোধী উভয়ে নিজ নিজ প্ৰাৰ্থীৰ হৈ মাৰাথন প্ৰচাৰত অৱতীৰ্ণ হৈছে । তাৰ মাজতে ঝাৰখণ্ডৰ নিৰ্বাচনী প্ৰচাৰৰ পৰা আহি ৰাজ্যৰ উপ-নিৰ্বাচনৰ প্ৰচাৰত নামি পৰিছে মুখ্যমন্ত্ৰী ডঃ হিমন্ত বিশ্ব শৰ্মা ।
মঙলবাৰে ধলাই সমষ্টিৰ বিজেপি প্ৰাৰ্থী নিহাৰ ৰঞ্জন দাসৰ হৈ দুখনকৈ নিৰ্বাচনী প্ৰচাৰ সভাত অংশগ্ৰহণ কৰে মুখ্যমন্ত্ৰীয়ে । ধলাইৰ বি এন এন পি হাইস্কুল আৰু পালংঘাটৰ চি চি জে চি হাইস্কুলৰ খেলপথাৰত আয়োজিত দুখন বিশাল নিৰ্বাচনী প্ৰচাৰ সভাত অংশগ্ৰহণ কৰি নিজ দলৰ প্ৰাৰ্থীৰ হৈ প্ৰচাৰ চলাই মুখ্যমন্ত্ৰীয়ে ।
নিৰ্বাচনী প্ৰচাৰ সভাত অংশগ্ৰহণ কৰি প্ৰথমৰ পৰাই কংগ্ৰেছক ক্ষুৰধাৰ সমালোচনা কৰে হিমন্ত বিশ্ব শৰ্মাই । তেওঁ কয়, "কংগ্ৰেছৰ হাতত বিজেপিৰ বিৰুদ্ধে কোনো ইছ্যু নাই বাবেই নিহাৰ ৰঞ্জন দাসক বাংলাদেশী সজাই অসমৰ পৰিস্থিতি উত্তপ্ত কৰিব বিচাৰিছে । বাংলাদেশী কোন হয়, সেয়া চোৱাৰ দায়িত্ব কংগ্ৰেছৰ নহয় । সেই দায়িত্ব চৰকাৰৰ ।"