গুৱাহাটী, ১৯ মাৰ্চ : ২০২৩ বৰ্ষটোৰ শেষৰ ফালে মুক্তি লাভ কৰা এখন সফল অসমীয়া ছবি ‘ৰঙাটাপু ১৯৮২’ । আদিত্যম শইকীয়াৰ পৰিচালনাৰে নিৰ্মাণ কৰা ছবিখন দৰ্শকৰ মাজত বিশেষ ভাৱে সমাদৰ লাভ কৰিবলৈ সক্ষম হৈছিল । ছবিখন চাই কোনেও ক’ব পৰা নাই যে এইখন পৰিচালক হিচাপে আদিত্যম শইকীয়াৰ প্ৰথম ছবি ৷
হয়, এই ছবিখনৰ জৰিয়তে পৰিচালক হিচাপে আত্মপ্ৰকাশ কৰিছিল আদিত্যমে ৷ ৰঙাটাপুৰ সফলতাৰ পাচত আদিত্যম শইকীয়াৰ পৰিচালনাৰে এইবাৰ আহি আছে আন এটা নতুন প্ৰজেক্ট ৷ অৱশ্যে এয়া ছবি নহয়, আদিত্যমৰ পৰিচালনাৰে আহি আছে ৱেব চিৰিজ ‘মইনা কলিজা’ ।
অহা ১ এপ্ৰিলৰ পৰা Percelia Production নামৰ ইউটিউব চেনেলত মুক্তি পাব এই ৱেব চিৰিজখন ৷ ৫টা খণ্ডত মুক্তি লাভ কৰিব ‘মইনা কলিজা’।
ৱেব চিৰিজৰ কাহিনী কি ?
বৰ্তমান সময়ত নৱ-প্ৰজন্মৰ মাজত জনপ্ৰিয় হৈ পৰিছে সামাজিক মাধ্যমত শ্বেয়াৰ কৰা ‘Reels’ । একাংশই ‘Reels’ দ্বাৰা নিজৰ সুপ্ত প্ৰতিভা বিকাশ কৰি আহিছে । এই ‘Reels’ক মুখ্য বিষয় হিচাবে লৈ নিৰ্মাণ কৰা হৈছে এই ৱেব চিৰিজ "মইনা কলিজা" ।
আদিত্যম শইকীয়াৰ কাহিনী আৰু পৰিচালনাৰে নিৰ্মাণ কৰা ৱেব চিৰিজখনত অভিনয় কৰিছে চুমি বৰা, সৌৰভ হাজৰিকা, সিদ্ধাৰ্থ শৰ্মা, চুমকি কছাৰী, হৰপল শইকীয়া, পাপৰি বৰা, প্ৰতিভা চৌধুৰী, ৰাজীৱ দাউৰী, ৰাগিনী কৌশিক, অমিতাভ ৰাজখোৱা, জলী হাজৰিকা ফুকন, ৰাজমানী ভূঞা, নানু, কৃতিকা শইকীয়া, দীক্ষিতা দাস, নমী আৰু নিৰ্মালী আদিকে ধৰি বহু অভিনেতা-অভিনেত্ৰীয়ে ।
উল্লেখ্য যে, Percelia Production ৰ প্ৰযোজনাত নিৰ্মাণ কৰা এই নতুন অসমীয়া ৱেব চিৰিজখন বিনামূলীয়াকৈ দৰ্শকে উপভোগ কৰিব পাৰিব । ৱেব চিৰিজখনৰ ইতিমধ্যে ট্ৰেইলাৰ মুকলি কৰা হৈছে । ট্ৰেইলাৰটো দৰ্শকৰ মাজত সমাদৰ লাভ কৰিবলৈ সক্ষম হৈছে ।
লগতে পঢ়ক :সাহসী ফটো সাংবাদিকৰ সংগ্ৰামৰ কাহিনীৰে আহি আছে ৱাইড এংগল
