নিউজ ডেস্ক, 25 ফেব্ৰুৱাৰী : বিহাৰত সংঘটিত হৈছে এক শোকাৱহ ঘটনা ৷ কাইমুৰ জিলাত ৰাষ্ট্ৰীয় ঘাইপথ 2 ৰ মহনীয়া অঞ্চলৰ দেৱকালী গাঁৱৰ সমীপত সংঘটিত হোৱা পথ দুৰ্ঘটনাত কমেও 9 জন লোকৰ থিতাতে কৰুণ মৃত্যু হৈছে ৷ এই ভয়ানক ঘটনাৰ পিছত ঘাইপথছোৱাত বৃহৎ যান-জঁটৰ সৃষ্টি হয় ৷ ঘটনাৰ তথ্য লাভ কৰি আৰক্ষী আৰু এন এইচ এ আইৰ দলে ঘটনাস্থলীত উপস্থিত হৈ মৃতদেহবোৰ উদ্ধাৰ কৰি সমগ্ৰ বিষয়টোৰ তদন্ত আৰম্ভ কৰিছে ৷
তথ্য অনুসৰি চাচাৰামৰ পৰা বাৰাণসী অভিমুখে এখন স্ক’ৰপিঅ’ বাহন গৈ আছিল ৷ দেৱকালী গাঁও পোৱাৰ লগে লগে বাইকৰ সৈতে সংঘৰ্ষ হয়, যাৰ ফলত দুয়োখন বাহন নিয়ন্ত্ৰণৰ বাহিৰলৈ গৈ ডিভাইডাৰ জঁপিয়াই ঘাইপথৰ সিটো পাৰে খুন্দা মাৰে ৷ পথৰ সিপাৰে পুনৰ কণ্টেইনাৰ ট্ৰাকৰ সৈতে বহুবাৰ সংঘৰ্ষ হয় ৷
ঘটনাত স্ক’ৰপিঅ’ বাহনখনৰ আৰোহী আৰু বাইক আৰোহীকে ধৰি মুঠ 9 জন লোকৰ থিতাতে কৰুণ মৃত্যু হয় ৷ মৃত লোক সকলৰ চিনাক্তকৰণৰ কামত নিয়োজিত হৈ আছে আৰক্ষী ৷ মৃতদেহ সমূহ মৰণোত্তৰ পৰীক্ষাৰ বাবে ভভুৱা সদৰ চিকিৎসালয়লৈ প্ৰেৰণ কৰিছে আৰক্ষীয়ে ৷ মোহনিয়াৰ এছ ডি পি অ’ দিলীপ কুমাৰে জানিবলৈ দিয়া মতে, স্ক’ৰপিঅ’ বাহনখন চাচাৰামৰ দিশৰ পৰা, মোহনিয়া হৈ উত্তৰ প্ৰদেশ অভিমুখে গৈ আছিল স্ক’ৰপিঅ’খন ৷ তিনিওখন বাহনৰ মাজত একাধিক সংঘৰ্ষ হোৱা বুলিও তেওঁ জানিবলৈ দিয়ে ৷
নিহত 9 জন লোকৰ ভিতৰত 8 জন লোক স্ক’ৰপিঅ’ত যাত্ৰা কৰা লোক আছিল ৷ আৰক্ষীয়ে ঘটনা সন্দৰ্ভত গোচৰ ৰুজু কৰি মৃতকৰ পৰিয়াললৈ তথ্য প্ৰেৰণ কৰাৰ প্ৰচেষ্টা অব্যাহত ৰাখিছে ৷
লগতে পঢ়ক :উত্তৰ প্ৰদেশৰ ফটকা কাৰখানাত বিধ্বংসী অগ্নিকাণ্ড; সাতজন শ্ৰমিকৰ থিতাতে মৃত্যু
