'యునాని వైద్యంలో నూతన ఆవిష్కరణలు, వ్యాపార వృద్ధికి భారీ అవకాశాలు'

Unani National Conference On Innovations in Hyderabad : యునాని వైద్యంలో నూతన ఆవిష్కరణలు, వ్యాపార వృద్ధికి భారీ అవకాశాలు ఉన్నాయని సెంట్రల్​ కౌన్సిల్​ ఫర్​ రీసెర్చ్​ ఇన్​ యునాని (సీసీఆర్​యూఎం) డీజీ డాక్టర్​ జాహీర్​ అహ్మద్​ పేర్కొన్నారు. ఈ మేరకు ఎర్రగడ్డలోని నేషనల్​ రీసెర్చ్​ ఇనిస్టిట్యూట్​ ఆఫ్​ యునాని ఫర్​ స్కిన్​ డిజార్డర్స్​లో ఏర్పాటు చేసిన జాతీయ సదస్సులో ఆయన పాల్గొని ప్రసంగించారు. ఈ కార్యక్రమంలో అమిటీ యూనివర్సిటీ ఛాన్స్​లర్​ డాక్టర్​ డబ్ల్యూ సెల్వమూర్తి, ఎన్​ఐఎన్​ డైరెక్టర్​ డాక్టర్​ హేమలత, నైపర్​ డైరెక్టర్​ శైలేంద్ర సరాఫ్​ సహా పలువురు ప్రముఖులు పాల్గొన్నారు. 

ఈ సందర్భంగా నిత్య జీవితంలో తీసుకునే ఆహారానికి వైద్యపరంగా ఉన్న విలువలతో పాటు యునాని విభాగంలో కొత్త కొత్త ఆవిష్కరణలకు ఉన్న ఆస్కారాన్ని ఈ సదస్సులో చర్చించారు. సరికొత్త అంకుర సంస్థలకు యునానిలో అనేక రకాల అవకాశాలు ఉన్నాయని డాక్టర్​ జాహీర్​ అహ్మద్​ తెలిపారు. మరీ ముఖ్యంగా యునానీతో చర్మ సంబంధిత వ్యాధులను మెరుగ్గా తగ్గించవచ్చని అభిప్రాయపడ్డారు. ఈ తరహా చికిత్సలను ప్రజలకు చేరువ చేసేందుకు అవసరమైన మొబైల్​ అప్లికేషన్లు, యాప్​లు రూపకల్పన చేయాల్సిన అవసరం ఉందన్నారు.