కేంద్రం పాలసీ వల్లే హైదరాబాద్​కు మంచి కంపెనీలు : నిర్మలా సీతారామన్‌

Nirmala Sitharaman Election Campaign In Hyderabad : తొమ్మిదిన్నరేళ్లు అధికారంలో ఉన్న బీఆర్ఎస్ పార్టీ అన్ని విధాలా రాష్ట్రాన్ని భ్రష్టు పట్టించిందని కేంద్రమంత్రి నిర్మలా సీతారామన్‌ విమర్శించారు. కేంద్ర ప్రభుత్వ అభివృద్ధిని విపక్షనేతలు కొనియాడుతున్నారని తెలిపారు. తెలంగాణలోనూ అభివృద్ధి కొనసాగాలంటే బీజేపీని గెలిపించాలని కోరారు. హైదరాబాద్ జూబ్లీహిల్స్ నియోజకవర్గం మధురానగర్​లో ఏర్పాటు చేసిన బీజేపీ అభ్యర్థి లంకల దీపక్ రెడ్డికి మద్దతుగా నిర్మలమ్మ ఎన్నికల ప్రచారం నిర్వహించారు. దీపక్ రెడ్డి గెలుపునకు కార్యకర్తలు కృషి చేయాలని పిలుపునిచ్చారు.

Nirmala Sitharaman Comments On BRS Govt : కేంద్ర ప్రభుత్వం పాలసీ వల్లే హైదరాబాద్​కు అంతర్జాతీయ కంపెనీలు వస్తున్నాయని నిర్మలా సీతారామన్ తెలిపారు. కాళేశ్వరం ప్రాజెక్ట్​లో వేల కోట్ల అవినీతి జరిగిందని ఆరోపించారు. ధనిక తెలంగాణను కేసీఆర్ అప్పుల పాలు చేశారని మండిపడ్డారు. పెట్రోల్ మీద వ్యాట్ వేసింది బీఆర్ఎస్ ప్రభుత్వమేనని.. కేంద్రం కాదని స్పష్టం చేశారు. పేరులో తెలంగాణ తీసేసి తెలంగాణ గురించి కేసీఆర్ మాట్లాడుతున్నారని విమర్శించారు. ఈ ఎన్నికలు తెలంగాణ ప్రజలకు చాలా ముఖ్యమని.. అందుకే ప్రజలు ఆలోచించి ఓటు వేయాలని సూచించారు. రానున్న ఎన్నికల్లో బీజేపీ పార్టీ అధికారంలోకి వస్తుందని ఆమె ధీమా వ్యక్తం చేశారు.