'కేసీఆర్ టికెట్లు ఇస్తే మంచోడు, లేకుంటే చెడ్డోడా'

Minister Harish Rao in Praja Ashirvada Sabha at Malkajgiri : రాహుల్‌గాంధీ రాష్ట్రానికి వచ్చి ఎవరో ఇచ్చిన స్క్రిప్ట్‌ చదివి వెళ్లిపోతున్నారని వైద్య,  ఆరోగ్య శాఖ మంత్రి హరీశ్​రావు అన్నారు. కర్ణాటక రాష్ట్రంలో కరెంట్ కోతలతో రైతులు ఇబ్బందులు పడుతున్నారని మంత్రి తెలిపారు. మల్కాజ్​గిరి నియోజకవర్గ కేంద్రంలోని లక్ష్మీసాయి గార్డెన్స్‌లో నిర్వహించిన ప్రజా ఆశీర్వాద సభలో హరీశ్​రావు కార్యకర్తలు, ప్రజలనుద్దేశించి మాట్లాడారు. అంతకు ముందు ఆనంద్‌బాగ్‌ అంబేడ్కర్ విగ్రహం కూడలి నుంచి బీఆర్​ఎస్​ అభ్యర్థి మర్రి రాజశేఖర్ రెడ్డితో కలిసి ర్యాలీగా లక్ష్మిసాయి గార్డెన్‌కు చేరుకున్నారు. మైనంపల్లి స్వార్థం కోసం పార్టీ మారాడని.. ఆయన మెదక్‌, మల్కాజ్​గిరి రెండు చోట్ల ఓడిపోవడం ఖాయమని మంత్రి స్పష్టం చేశారు.  

కేసీఆర్ టికెట్లు ఇస్తే మంచోడు.. లేకుంటే చెడ్డోడా అని హరీశ్​రావు ప్రశ్నించారు. మర్రి రాజశేఖర్ రెడ్డి ఎంపీగా ఓడినా ప్రజాసేవా మరిచిపోలేదన్నారు. కేసీఆర్ చేతిలో తెలంగాణ ప్రశాంతంగా ఉందని.. అన్ని రంగాల్లో తెలంగాణ దేశానికి మోడల్​గా మారిందని వివరించారు. మల్కాజ్​గిరి ప్రజల కోసం సీఎం కేసీఆర్ వేయి పడకల సూపర్‌ స్పెషాలిటీ ఆస్పత్రి నిర్మిస్తున్నారని తెలిపారు. అందులోనే 250 మాతా శిశు సంరక్షణ ఆసుపత్రి కూడా ఉంటుందన్నారు.