మంచిర్యాలలో కాంగ్రెస్​ కార్యకర్తపై బీఆర్​ఎస్​ కౌన్సిలర్​ దాడి

Councilor Attack On Congress Worker In Mancherial : మంచిర్యాల జిల్లా చెన్నూరు పురపాలిక 16వ వార్డు కౌన్సిలర్ రమేశ్ తమ కార్యకర్తను అకారణంగా కొట్టారని ఆరోపిస్తూ శనివారం కాంగ్రెస్ పార్టీ నాయకులు, కార్యకర్తలు చెన్నూరు పట్టణంలో ఆందోళనకు దిగారు. బీఆర్ఎస్​ నాయకుల దాడిని నిరసిస్తూ స్థానిక గాంధీచౌక్ వద్ద రోడ్డుకు అడ్డంగా బైటాయించి ఆందోళన వ్యక్తం చేశారు. దాంతో పోలీసులు నిరసనకారుల వద్దకు చేరుకొని ఎదైనా ఉంటే పోలీస్ స్టేషన్​లో ఫిర్యాదు చేయండని నాయకులకు నచ్చజెప్పడంతో శాంతించిన వారు పోలీస్ స్టేషన్​కు వెళ్లారు. 

కొత్తగూడెం కాలనీకి చెందిన బొంతల సందీప్ అనే యువకుడు తన వీధిలో జేసీబీ తగిలి విద్యుత్తు తీగ తెగిపడింది. రాత్రి అవుతున్నందున తీగను సరిచేసి విద్యుత్తు సరఫరాను పునరుద్ధరించాలని కౌన్సిలర్ రమేశ్​ను కోరగా, ఆయన ఆగ్రహంతో అతడిపై విచక్షణా రహితంగా కర్రతో దాడికి పాల్పడ్డారని కాంగ్రెస్ నాయకులు ఆరోపించారు. వీధిలో అందరూ చూస్తుండగానే నిన్ను చంపేస్తానంటూ సందీప్​పై బెదిరింపులకు పాల్పడ్డారన్నారు. తీవ్రంగా గాయపడ్డ బాధితుణ్ణి ప్రథమచికిత్స నిమిత్తం స్థానిక ప్రభుత్వ ఆసుపత్రికి తీసుకువెళ్లారు. ఓ ప్రజాప్రతినిదై ఉండి సమస్యను పరిష్కరించకపోగా తమ పార్టీ కార్యకర్త అన్న అక్కసుతో దాడికి పాల్పడి తీవ్రంగా గాయపర్చాడని కాంగ్రెస్ నాయకులు ఆరోపించారు. రమేశ్​పై తక్షణం చర్యలు తీసుకోవాలని డిమాండ్ చేశారు. అనంతరం పార్టీ నాయకులు స్థానిక పోలీస్ స్టేషన్​లో ఫిర్యాదు చేశారు.