భద్రాద్రిలో వైకుంఠ ఏకాదశి అధ్యయనోత్సవాలు - నిజ రూపంలో దర్శనమిచ్చిన రామయ్య

Bhadradri Vaikunta Utsavalu 2023 : భద్రాద్రి రామయ్య సన్నిధిలో శ్రీ వైకుంఠ ఏకాదశి అధ్యయనోత్సవాలు ఘనంగా జరుగుతున్నాయి. ఉత్సవాల్లో భాగంగా దశవతారాల్లో రోజుకొక అవతారంలో దర్శనమిస్తున్న రామయ్య, నేడు నిజరూపంలో (రామయ్య) దర్శనమిచ్చారు. రేపు బలరామ అవతారంలో, ఎల్లుండి శ్రీకృష్ణ అవతారంలో దర్శనమివ్వనున్నారు. శ్రీరామ అవతారంలో ఉన్న స్వామివారికి బేడా మండపంలో ఆలయ అర్చకులు ప్రత్యేక పూజలు నిర్వహించారు. 

Bhadradri Mukkoti Utsavalu : ఈ నెల 13వ తేదీ నుంచి రోజుకో అవతారంలో దర్శనమిస్తున్న రామయ్యను దర్శించుకునేందుకు భక్తులు అధిక సంఖ్యలో ఆలయానికి వస్తున్నారు. 22న గోదావలి నదిలో తెప్పోత్సవం, 23వ తేదీన ఉత్తర ద్వార దర్శనం వేడుకలు జరగనున్నాయి. శ్రీరామ అవతారంలో ఉన్న స్వామివారికి మధ్యాహ్నం నుంచి సాయంత్రం వరకు తిరు వీధి సేవ జరిగింది. కోలాట నృత్యాలు, మంగళ వాయిద్యాలు, వేదమంత్రాల నడుమ సకల రాజ లాంఛనాలతో స్వామివారు పురవీధుల్లో విహరించారు. పెద్ద సంఖ్యలో హాజరైన భక్తులకు తగిన ఏర్పాట్లు చేశామని ఆలయ అధికారులు తెలిపారు.