చర్మాన్ని జాగ్రత్తగా ఉంచుకోవాలనే క్రమంలో తెలిసో, తెలియకో కొన్ని పొరపాట్లు చేసేస్తుంటాం. వాటివల్ల చర్మానికి నష్టాలే ఎదరవుతాయి. అందుకే మనం తరచూ చేసే పొరపాట్లు ఏంటో? వాటిని ఎలా సరిచేసుకోవాలో ఇప్పుడు చూద్దాం.
- స్కిన్కేర్ ఉత్పత్తులను చర్మతత్వానికి, అలాగే ఆయా కాలాలకు సరిపోయే విధంగా ఎంచుకోవాలి. చలికాలంలో చర్మానికి ఎక్కువ పోషణ అవసరమవుతుంది. అలాని ఈ కాలంలో జిడ్డు చర్మం ఉన్నవారు హెవీ క్రీమ్స్ను వాడొద్దు.
- ఆయిలీ స్కిన్ ఉన్నవారు ముఖంపై పేరుకున్న నూనెలను తొలగించుకోవడానికి తరచూ సబ్బును వాడతారు. ఇది పెద్ద పొరపాటు. సబ్బులోని రసాయనాలు చర్మం పీహెచ్ స్థాయిలను తగ్గిస్తాయి. దాంతో ముఖంపై మొటిమలు వస్తాయి.
- జిడ్డు కాంబినేషన్ స్కిన్ ఉన్నవారు నూనె ఆధారిత క్రీములను, ఫేషియల్ మసాజ్ చేయించుకోవద్దు. ఇలా చేయడం వల్ల తైల గ్రంథులు మరింత ఉత్తేజితమై నూనెలను స్రవిస్తాయి. దాంతో చర్మ రంధ్రాలు మూసుకుపోతాయి. ఫలితంగా మొటిమలు, మచ్చలు, వస్తాయి. కాబట్టి జిడ్డు చర్మం ఉన్నవారు ఆయిల్ ఫ్రీ మ్యాటీ మాయిశ్చరైజర్, జెల్ ఆధారిత సన్స్క్రీన్లాంటి నూనెరహిత ఉత్పత్తులను వాడాలి.
- చాలామంది రాత్రిపూట ముఖానికి క్రీమ్ రాసి అలానే వదిలేస్తారు. ఇలా చేయడం వల్ల పెద్ద ఉపయోగమేమీ ఉండదు. నిజానికి చర్మం తనకు కావాల్సిన పోషణను కొద్దిసేపటిలో గ్రహించేస్తుంది. రాత్రంతా క్రీమ్ను ముఖానికి పట్టించి ఉంచడం వల్ల చర్మ రంధ్రాలు మూసుకుపోయి గాలి ప్రసరణ సరిగా జరగదు. కాబట్టి క్రీమ్ అప్లై చేసిన పదిహేను నిమిషాల తర్వాత దూదితో కంటికి కింద మిగిలిన క్రీమ్ను తుడిచేస్తే సరిపోతుంది.
- చర్మానికి గాఢమైన లోషన్స్ను వాడకపోవడమే మంచిది. అలాగే ముఖాన్ని పదే పదే చేతులతో తాకొద్దు. ఎందుకంటే వాటిపై లెక్కకు మించి సూక్ష్మజీవులు ఉంటాయి. ఇలా ప్రతిసారి ముఖాన్ని తాకడం వల్ల చర్మ సంబంధ సమస్యలు రావొచ్చు.
ఇదీ చూడండి:వ్యాయామంతో శరీరానికే కాదు.. మెదడుకూ లాభాలే!
