మనలో చాలామందికి ఆనందం కోసం టీవీ చూడటం లేదంటే ఫోన్ చూడటం అలవాటుగా ఉంటుంది. అయితే ఈ అలవాటు శ్రుతిమించి వ్యసనంగా మారితే ఎంతో ప్రమాదకరమని వైద్యులు హెచ్చరిస్తున్నారు. టీవీ, ఫోన్, కంప్యూటర్, ల్యాప్టాప్ వంటి ఎలక్ట్రానిక్ స్క్రీన్లను ఎక్కువ సేపు చూస్తే కంటి సమస్యలు మాత్రమే తలెత్తుతాయని చాలామంది భావిస్తుంటారు. కానీ అనేక మానసిక, శారీరక సమస్యలకు ఇది కారణమవుతుందని వైద్యులు చెబుతున్నారు.
టైం పాస్ కోసం టీవీ, ఫోన్ చూసే పరిస్థితి నుంచి ఎక్కువ సమయం టీవీ, ఫోన్లు చూడటానికే మనం కేటాయించే పరిస్థితికి వచ్చేశాం. గతంలో టీవీ లేదంటే ఫోన్ని చూడటానికి ఒక టైం అంటూ పెట్టుకునే మనం.. ఇప్పుడు ఎలాంటి నియంత్రణ లేకుండా స్క్రీన్లను చూస్తున్నాం. టీవీలు, ఫోన్లు, కంప్యూటర్లు, ల్యాప్ టాప్లు వాడే వారిలో స్క్రీన్లు చూసే సమయం చాలా ఎక్కువగా ఉంటోంది. వర్క్ ఫ్రం హోం చేసే వారికి స్క్రీన్ చూడాల్సిన తప్పనిసరి పరిస్థితి ఏర్పడగా.. ల్యాప్ టాప్ లేదంటే కంప్యూటర్ల ముందు వాళ్లు గంటల కొద్దీ గడపాల్సి వస్తుంది. ఇక టీవీలో వివిధ కార్యక్రమాలను, ఫోన్లలో ఫొటోలు, వీడియోలను చూసే వారు తాము ఎంతసేపు చూస్తున్నామనే విషయాన్ని మర్చిపోతుంటారు. దీని కారణంగా స్క్రీన్ టైం ఎంత అనే అంచనా ఎవరికీ ఉండటం లేదు.
స్క్రీన్ టైం ఎక్కువగా ఉంటే కేవలం కళ్లు మాత్రమే కాదు, అనేక శారీరక, మానసిక సమస్యలు తలెత్తుతాయని వైద్యులు హెచ్చరిస్తున్నారు. స్క్రీన్ టైం ఎక్కువగా ఉండటం వల్ల శరీరంలో అనేక మార్పులు వస్తాయని, దీర్ఘకాలంలో అవి అనారోగ్య సమస్యలకు కారణమవుతాయని అంటున్నారు. మరీ ముఖ్యంగా టీవీలు, ఫోన్లు, కంప్యూటర్లు, ల్యాప్ టాప్ల ముందు గంటల కొద్దీ గడిపే వారికి ఏదైనా తినాలనే కోరిక ఉంటుందట. దీంతో వీరు చిరుతిళ్లకు ప్రాధాన్యత ఇస్తుంటారు. లేదంటే మామూలు ఆహారం తింటే స్క్రీన్లు చూస్తూ ఎక్కువ మోతాదులో లాగించేస్తారట. ఇలా శారీరక శ్రమ లేకపోగా ఎక్కువ క్యాలరీలను శరీరానికి అందించడం వల్ల కొవ్వు పెరిగి అధిక బరువుకు దారి తీస్తుందని వైద్యులు అంటున్నారు.
"చాలామందికి స్క్రీన్ టైం అనే దాని గురించి అవగాహన లేకపోవచ్చు. అయితే రెండు గంటల కన్నా ఎక్కువ సమయం ఒకేచోట కూర్చొని స్క్రీన్ చూడటం వల్ల అనేక అనారోగ్య సమస్యలు తలెత్తుతాయి. దీనికి తోడు స్క్రీన్ చూస్తూ చిప్స్, పాప్ కార్న్ వంటి స్నాక్స్ తీసుకోవడం వల్ల శరీరానికి ఎక్కువ క్యాలరీలు అంది, అధిక బరువు పెరిగేందుకు దారి తీస్తాయి. అలాగే ఎక్కువ స్క్రీన్ టైం ఉండే వారిలో ఒంటరితనం వేధిస్తుంది. అలాంటి వాళ్లు అందరితో కలిసి కాసేపు మాట్లాడటం, కుటుంబ సభ్యులతో సమయం గడపడం మంచిది. దీని వల్ల మానసిక సమస్యలు రావు. ఎక్కువ స్క్రీన్ టైం ఉంటే నిద్రకు భంగం కలుగుతుంది. టీవీ చూసిన తర్వాత మంచిగా నిద్రపడుతుందని చాలామంది అనుకుంటారు. కానీ అధ్యయనాల ప్రకారం అది నిజం కాదు. నిద్రపోవడానికి రెండు గంటల ముందు స్క్రీన్ చూడకుండా ఉండటం మంచిది. తలనొప్పి, బీపీ పెరుగుదల మీద ప్రభావం చూపిస్తుంది కాబట్టి స్క్రీన్ టైంను తగ్గించుకోవడం మంచిది"
-డా. కె.శివరాజు, సీనియర్ ఫిజీషియన్, డయాబెటలాజిస్ట్
గంటల కొద్దీ కంప్యూటర్లు లేదంటే ల్యాప్ టాప్ల ముందు పని చేసే అవసరం ఉన్న వాళ్లు ఎక్కువగా నీళ్లు తాగడం, ప్రతి గంటకు ఒకసారి వాకింగ్ చేయడం మంచిది. స్క్రీన్ టైం ఎక్కువగా కలిగిన వాళ్లు రాత్రి సరైన సమయానికి నిద్రపోయే అలవాటు చేసుకోవడం మంచిది. రాత్రిపూట త్వరగా పడుకోవడం వల్ల అనేక అనారోగ్య సమస్యలకు చెక్ పెట్టినట్లవుతుంది. ఇక స్క్రీన్ టైం ఎక్కువ ఉన్న వాళ్లు తిన్నగా కూర్చోవడం ఎంతమాత్రం మంచిదికాదు. మెడ మీద ఎక్కువ ఒత్తిడి కలగకుండా జాగ్రత్తవహించాలి. టీవీ, ఫోన్, కంప్యూటర్, ల్యాప్టాప్ చూడటం వల్ల భవిష్యత్తులో శారీరక, మానసిక సమస్యలు తలెత్తకుండా జాగ్రత్త వహించాల్సిన అవసరం ప్రతి ఒక్కరికీ ఉంది.
