పగటి కలలు మంచివే! క్రియేటివిటీ పెరుగుతుందట!!

కొందరు అప్పుడప్పుడు పగటి కలలు కంటుంటారు. అయితే అవి సమయాన్ని వృథా చేస్తాయని చాలా మంది అంటుంటారు. కానీ అది నిజం కాదని.. పగటి కలలు మన భవిష్యత్తులో తీసుకునే నిర్ణయాలకు ఉపయోగపడతాయని మానసిక నిపుణులు చెబుతున్నారు. వాటి వల్ల అనేక లాభాలు ఉన్నాయని అంటున్నారు. అవేంటో తెలుసుకుందామా?

పగటి కలలు.. చాలా మంది జీవితాల్లో సర్వసాధారణం. అవి మనసుకు ఉల్లాసం కలిగించి.. ఒంటరితనం నుంచి ఉపశమనం కలిగిస్తాయి. చాలా మంది మనసులో మెదిలే ప్రతికూల భావాల నుంచి బయటపడడానికి పగటి కలలను ఆశ్రయిస్తుంటారు! కానీ పగటి కలలు మంచివి కావని కొందరు చెబుతుంటారు. మరికొందరు 'ఏంటి.. పగటి కలలు కంటున్నావా?' అని హేళన కూడా చేస్తుంటారు. అయితే పగటి కలల వల్ల మనుషుల్లో సృజనాత్మకత, సమస్యలను పరిష్కరించే సామర్థ్యం పెరుగుతుందని శాస్త్రవేత్తలు చెబుతున్నారు.

నిద్రలో వచ్చే కలలకు, పగటి కలలకు చాలా తేడా ఉంటుంది. ఇవి కేవలం మెలకువలో ఉన్నప్పుడే వస్తుంటాయి. అవి కూడా కొన్ని సెకన్ల పాటు మాత్రమే ఉంటాయి. మనం ఏదైనా సృజనాత్మకంగా పని చేసేటప్పుడు, సమస్య పరిష్కారంలో బిజీ ఉండేటప్పుడు ఎక్కువగా పగటి కలలు వచ్చే అవకాశం ఉందని నిపుణులు చెబుతున్నారు. పని ఒత్తిడితో బాగా అలిసిపోయినప్పుడు.. మన మెదడు పగటి కలలు కంటుందని అంటున్నారు. పగటి కలల స్థితిని మెదడు విశ్రాంతి తీసుకోవడంగా భావించాలని తెలిపారు.

"చాలా మంది పగటి కలలు మంచివి కావని చెబుతుంటారు. మరికొందరైతే.. పగటి కలలను వెక్కరిస్తుంటారు. కానీ మనం 30-50 శాతం సమయం పగటి కలల్లోనే ఉంటామని శాస్త్రవేత్తలు చెబుతున్నారు. ఈ పగటి కలల వల్ల సృజనాత్మకంగా మనకు చాలా లాభాలు ఉన్నాయి. మనం ఏదైనా ఒక పని చేసినప్పుడు దృష్టి దానిపైనే ఉంటుంది. కానీ పగటి కలలు కనడం వల్ల మనకు తెలియని విషయాలు మెదడులోకి వస్తుంటాయి. అప్పుడు మనలో ఉన్న క్రియేటివిటీ పెరుగుతుంది."

-- కార్తీక్​ మాడుగుల, సైకాలజిస్ట్​

ఒత్తిడితో పనిచేసిన తర్వాత లేదా మనసుకు బాధ కలిగించే సందర్భాన్ని ఎదుర్కొన్న తర్వాత కాసేపు వాటన్నింటినీ పక్కన పెట్టి మనసుకు నచ్చిన ఆలోచనల్లోకి వెళ్లడం మన మానసిక ఆరోగ్యానికి చాలా మంచిది! పని ఒత్తిడిలో ఉన్నప్పుడు ఉద్దేశపూర్వకంగానూ పగటి కలల కనవచ్చు. ఆ సమయంలో మన దగ్గర్లో ఉన్న కిటికీ పక్కన కూర్చుని దూరంగా చూడాలి. అప్పుడు నిదానంగా శ్వాస తీసుకుని వదలాలి. అలా కాసేపు చేశాక మనసుకు నచ్చిన విషయాల గురించి ఆలోచించాలి. చక్కటి అందమైన ప్రదేశంలో ఉన్నట్టుగా.. నచ్చిన వ్యక్తితో మాట్లాడినట్లు ఊహించుకోవాలి. ధ్యానం, విశ్రాంతి లాగా పగటి కలల వల్ల కూడా మనం ఒత్తిడి నుంచి బయటపడొచ్చు!

"ఆఫీస్​లో గానీ రిలేషన్​ షిప్​లో గానీ బాగా ఒత్తిడిగా అనిపిస్తే.. ఆ విషయాలపైనే దృష్టి పెట్టకుండా కాసేపు మనకు నచ్చిన అంశాల గురించి ఆలోచించాలి. అలా పగటి కలలు కంటే కాస్త మనం ఒత్తిడి నుంచి బయటపడవచ్చు. సమస్యలను పరిష్కరించేందుకు సరికొత్త ఆలోచనలు కూడా రావొచ్చు. ముఖ్యంగా మన గురించి మనం మెరుగ్గా ఆలోచించగలం. మన మీద మనకు గట్టి నమ్మకం ఏర్పడుతోంది. కొత్త ప్రయత్నాలు చేయడానికి తగిన ఆత్మ విశ్వాసం కచ్చితంగా వస్తోంది. కష్టసమయాల్లో పగటి కలల వల్ల ఉపశమనం లభిస్తుంది" అని నిపుణులు తెలిపారు.

• ఇవీ చదవండి: