కళ్ల చుట్టూ 'డార్క్​ సర్కిల్స్​' వేధిస్తున్నాయా? ఇలా చేసి చూడండి!

Dark Circles Under Eyes: చాలా మందికి కళ్ల చుట్టూ నల్లటి వలయాలు ఏర్పడుతుంటాయి. ఇది వయసుతో సంబంధం లేకుండా చాలా మందిని వేధించే సమస్యే. అయితే.. ఎక్కువగా నిద్ర లేమి, టీవీ చూడటం, కంప్యూటర్​ ముందు అధిక సమయం గడపడం వంటివి దీనికి కారణాలుగా ఉండొచ్చు. మరి.. వీటిని తగ్గించుకోవడం ఎలా? వైద్యులు ఏం చెబుతున్నారు?

Dark Circles Under Eyes: ప్రస్తుతం చాలా మందిని వేధిస్తున్న సమస్యల్లో కంటి కింద నల్లటి వలయాలు కూడా ఒకటి. దీనికి కారణాలు ఎన్నో ఉండొచ్చు. టీవీ చూడటం, పోషకాహార లోపం, కంప్యూటర్​ను అలాగే కళ్లప్పగించి చూస్తూ ఉండటం.. ఇలా చాలానే ఉంటాయి. ఈ నల్లటి మచ్చలతో ముఖం అందవిహీనంగా కనిపిస్తుందని చాలా మంది బాధపడుతుంటారు. మరి వీటిని తగ్గించుకోవడం ఎలా, నల్లటి వలయాలు ఏర్పడటానికి ఇంకేం కారణాలున్నాయో చెబుతున్నారు ప్రముఖ డెర్మటాలజిస్ట్ డా. చంద్రావతి.

డార్క్ సర్కిల్స్ రావడానికి కారణాలు:
కళ్ల చుట్టూ నల్లగా ఉండడం అనేది చాలా సహజమైన సమస్య. ఇందుకు అనేక కారణాలు ఉన్నాయి.

• రక్త లేమి కారణంగా కళ్ల చుట్టూ నల్లటి చారలు వచ్చే అవకాశముంది.
• చర్మం పొడిగా ఉన్నవారి కళ్ల చుట్టూ డార్క్ సర్కిల్స్ రావచ్చు.
• కొందరికి కంటి చుట్టూ ఉన్న చర్మం ఎప్పుడూ దురదగా ఉంటుంది. అలాంటి వాళ్లు పదేపదే కళ్లు నలుపుకుంటూ ఉంటారు. అలా చేయడం వల్ల కూడా కళ్ల చుట్టూ నల్లగా మారే అవకాశముంది.
• కొంత మంది లావుగా ఉన్నవారిలో మెడ చుట్టూ, కళ్ల చుట్టూ నల్లగా ఉంటుంది.
• నిద్ర లేమి మరో కారణం. నైట్ షిఫ్ట్ చేసేవాళ్లు, ఎక్కువ సేపు కంప్యూటర్, టీవీ చూసేవాళ్లకు కూడా కళ్ల చుట్టూ డార్క్ సర్కిల్స్ ఉంటాయి.
• కొందరికి కళ్ల చుట్టూ ఉన్న చర్మం పల్చగా ఉంటుంది. దాని కింద ఉన్న రక్త నాళాలు బయటకు కనిపించి, నల్లగా ఉన్నట్టు అనిపిస్తుంది.
• మరికొందరికి కళ్లు లోతుగా ఉంటాయి. అలాంటి వారిలో కళ్ల చుట్టూ నీడ పడి డార్క్ సర్కిల్స్​లా కనిపిస్తాయి.కళ్ల చుట్టూ నల్లటి వలయాలు రావడానికి ఇన్ని కారణాలు ఉన్నాయి. వీటిని బట్టి వైద్యులు వేర్వేరు చికిత్సా విధానాలు అవలంబిస్తారు. అన్నింటికీ ఒకటే వైద్యం సరిపోదు.
• కళ్ల చుట్టూ చర్మం దురదగా ఉన్నవారు.. ఆ సమస్యను తగ్గించుకునేందుకు, కళ్లు నలుపుకోకుండా చూసేందుకు ప్రయత్నించాలి.
• పొడి చర్మం ఉన్నవాళ్లు ఎప్పటికప్పుడు మాయిశ్చరైజర్ రాసుకోవాలి.
• పిగ్మెంటేషన్​ పోగొట్టే క్రీమ్స్​ ఉంటాయి. వాటిని రోజూ పగలు, రాత్రి రాసుకోవాలి. సన్​స్క్రీన్​ లోషన్​ వాడుతూ ఉండాలి.
• ఎనీమియా ఉంటే ఆ సమస్యను పోగొట్టుకునేందుకు అవసరమైన చికిత్స తీసుకోవాలి.
• టీవీలు, కంప్యూటర్ల ముందు ఎక్కువ సేపు కూర్చోకుండా చక్కగా నిద్రపోవాలి.

మరీ అవసరమైతే.. కెమికల్ పీల్స్​ అనే చికిత్సా విధానం అనుసరించాలి. అలా చేస్తే పిగ్మెంటేషన్​ తగ్గే అవకాశముంది.చర్మంపై నలుపు ఉంటే పైన చెప్పిన చికిత్సా విధానాలు ఉపయోగపడతాయి. కళ్లు లోతుగా ఉన్నవారికి.. మరో పద్ధతి ఉంది. హెలిరోనిక్ యాసిడ్​ ఫిల్లర్స్​ను ఇంజెక్ట్ చేస్తే లోతు తగ్గి.. కళ్ల చుట్టూ ఉన్న వలయాలు కూడా తగ్గినట్టు అనిపిస్తుంది. పిగ్మెంటేషన్​ తగ్గించడానికి లేజర్ ట్రీట్​మెంట్​ కూడా అందుబాటులో ఉంది. అసలు డార్క్​ సర్కిల్స్​కు కారణం ఏంటో తెలుసుకున్నాకే వైద్యులు చికిత్స చేస్తారు.
రెగ్యులర్​గా సన్​స్క్రీన్​, మాయిశ్చరైజర్​ రాసుకోవడం, రాత్రిపూట 6-8 గంటలు నిద్రపోవడం, ఎక్కువసేపు టీవీ, కంప్యూటర్​ ముందు కూర్చోకుండా ఉండడం వంటి జాగ్రత్తలు పాటిస్తే కళ్ల చుట్టూ ఉన్న డార్క్​ సర్కిల్స్​ను తగ్గించుకోవచ్చు.

ఇవీ చూడండి: 'తొక్క'లోది అనుకోకండి.. వాటితో ఉపయోగాలు ఎన్నో!!