కాలుష్యం నుంచి కురులను కాపాడుకోండిలా..

వాయుకాలుష్యం కురులపై తీవ్ర ప్రభావం చూపుతుంది. గాలిలోని కాలుష్య కారకాలు జుట్టుకు, మాడుకు అంటుకుపోయి దురద, చిరాకు కలిగిస్తాయి. ఇవి తేమను లాగేసుకొని జుట్టు పొడిబారేలా చేస్తాయి. దీంతో జుట్టు కళ తప్పుతుంది. అయితే కొన్ని జాగ్రత్తలతో ఈ కాలుష్యం ప్రభావాలను తగ్గించుకోవచ్చు అంటున్నారు నిపుణులు. అవేంటో చూసేద్దాం రండి..

కాలుష్యంతో వెంట్రుకలు పెళుసుబారి తేలికగా విరిగిపోతాయి. రోజులో ఎక్కువసేపు బయట తిరిగేవారికి ఈ ముప్పు మరీ ఎక్కువ. మరి ఈ సమస్యకు చెక్ పెట్టాలంటే... ఈ చిన్ని చిట్కాలు పాటించాల్సిందే....

• బయటకు వెళ్లేముందు తలకు టోపీ ధరించటం లేదా రుమాలు చుట్టుకోవటం మంచిది.
• తడికి దుమ్ము ధూళి అంటుకుపోతాయి. కాబట్టి తడి జట్టుతో రోడ్డు మీదికి వెళ్లకూడదు.
• జుట్టును గాలికి వదిలేయకుండా వీలైనంత వరకు తలకు దగ్గరగా ముడివేసుకోవాలి. అలాగని రబ్బరు బ్యాండ్ల వంటి వాటితో మరీ గట్టిగా బిగించకూడదు.
• వారానికి ఒకసారి షాంపూతో తలస్నానం చేశాక జుట్టుకు ఆవిరి పడితే మాడు మీది సూక్ష్మ రంధ్రాలు తెరుచుకొని వాటిల్లో చిక్కుకున్న కాలుష్య కారకాలు తేలికగా బయటకు వచ్చేస్తాయి.
• తేనె, పెరుగు, స్ట్రాబెర్రీ, వెనిగర్‌ కలిపి ఇంట్లో చేసుకునే మాస్క్‌ వెంట్రుకలకు రాసుకొని, అరగంట తర్వాత గోరువెచ్చటి నీటితో కడుక్కోవటం మంచిది.
• చేపలు, గింజపప్పులు, పెరుగు, తాజా పండ్లు, ఆకుకూరలు తీసుకోవటం ద్వారా వెంట్రుకల ఆరోగ్యానికి అవసరమైన పోషకాలు అందుతాయి.
• కొబ్బరినూనెలోని లారిక్‌ యాసిడ్‌ వెంట్రుకలోని కెరాటిన్‌ దెబ్బతినకుండా చూస్తుంది. ఇది వెంట్రుకల మధ్యలోని ఖాళీల్లో నిండి దుమ్ము, ధూళి, కాలుష్య కారకాలు, రసాయనాలు లోపలికి వెళ్లకుండా అడ్డుకుంటుంది.

ఇదీ చదవండి: జీవన శైలిని చక్కబెట్టుకో.. ఆరోగ్యాన్ని ఒడిసిపట్టుకో...