అలసిన శరీరం విశ్రాంతి కోరుతుంది. బాగా నిద్రపోతేనే, ఉదయం లేచి మన పనుల్ని మనం చక్కగా చేసుకోగలం. ఎంతలేదన్నా.. ఏడు నుంచి తొమ్మిది గంటల పాటు నిద్రపోవాలి. అప్పుడే శరీరం సేదతీరుతుంది. మనసు ప్రశాంతంగా ఉంటుంది. మళ్లీ కొత్త ఉత్సాహం వస్తుంది. కారణాలేవైనా.. కొన్నిసార్లు సక్రమంగా నిద్రపట్టదు. అటువంటి సమయాల్లో మనకు సర్వసహజంగా అందుబాటులో ఉండే ఔషధ మూలికలు ఉపకరిస్తాయి. వాటి గురించి పరిశోధించిన డాక్టర్‌ నయనతార శాంతి.. ఐదు ఉత్తమ మూలికల గురించి చెప్పారు.
ఐదు ఉత్తమ ఔషధ మూలికలు..
లావెండర్(సుగంధ ద్రవ్యాలు).. భయాల్ని తగ్గించే సువాసనలు కొన్ని ఉంటాయి. అవి కుంగుబాటును కూడా అదుపు చేస్తాయి. ప్రశాంతమైన నిద్రకు ఎంతో కొంత దోహదపడతాయి. తులసి, మరువం నుంచి వచ్చే పరిమళాలు ఉపశమనమిస్తాయి. పీల్చే లావెండర్లు ఒత్తిళ్లను కొంతవరకైనా తగ్గిస్తాయి.
చామంతి..
చామంతి ప్రసిద్ధి చెందిన పురాతన ఔషధ మూలిక. ఆధునిక అధ్యయనాలు చామంతి సామర్థ్యాన్ని రుజువు చేస్తున్నాయి. చామంతి ఆందోళనను తగ్గిస్తుంది. మీ నరాలకు ఉపశమనాన్ని ఇస్తుంది. బిడ్డకి జన్మనిచ్చిన స్త్రీలలో కొందరు ఆ ప్రసవం తాలూక నిస్సత్తువ, ఇతర విధాల ఆందోళనలతో సతమతమవుతుంటారు. రాత్రిపూట సరైన నిద్ర లేక భారంగా రోజులు వెళ్లదీస్తుంటారు. అలాంటివారు ఓ రెండు వారాలపాటు చామంతి టీ తాగితే ఉపశమనం పొందుతారని ఒక పరిశీలన వెల్లడించింది.
వలేరియన్..
వలేరియన్ ఔషధ మూలిక వేర్లు నిద్రలేమితో బాధపడుతున్న వారికి చికిత్స సమయంలో వాడుతారు. ఆ వేర్లు మెరుగైన నిద్రను ప్రేరేపిస్తాయి. వలేరియన్ వేర్లు.. మాత్రల రూపంలో ముందుల దుకాణాల్లో లభిస్తాయి.
జుమికి(పాషన్ ఫ్లవర్)..
జుమికి పువ్వులు శరీరవ్యవస్థకు మేలు చేస్తాయి. అప్పటికప్పుడే ఉపశమనమిచ్చి, ఆందోళన తగ్గించి నిద్రలోకి జారుకునేలా చేస్తాయి.
అశ్వగంధ.. వైద్య సంబంధమైన ఈ ఔషధ మూలిక సైతం నిద్రను ప్రసాదించేదే. లోపల ఒత్తిడి ఉంటే, నిద్ర ఎలా పడుతుంది? తీవ్రత తగ్గితేనే కదా మనసు కుదుటపడేది! ఒత్తిడికిలోనై తల్లడిల్లేవారు అశ్వగంధ పదార్థాలను వినియోగిస్తే ఎంతో ఉపయోగం. నిద్ర మాత్రలకు అలవాటు పడకుండా, శరీరాన్ని సహజంగానే నిద్రలోకి చేర్చే ఈ తరహా గుళికలు వాడాలన్నది వైద్యనిపుణుల సూచన.
ఔషధాలు, మూలికల వినియోగం ఎలా?
హెర్బల్ టీ: ఒక కప్పు వేడినీటికి 1 టీస్పూన్ మూలికలను జోడించి కొంత హెర్బల్ టీని తయారు చేసుకోవాలి. దాన్ని 20 నిమిషాలు అలాగే ఉంచి, ఆపై వడకట్టి తాగాలి. మీరు ఒక రోజులో రెండు నుంచి మూడు కప్పుల హెర్బల్ టీని తాగవచ్చు.
ఉపయోగకర తైలాలు.. నిద్రకు సిద్ధమయ్యేముందు వేడినీటి స్నానం ఎంతైనా ఉత్తమం. ఆ నీళ్లలో సుగంధభరిత నూనె కలిపితే, శరీరం సేదతీరుతుంది. ఆలివ్‌, కొబ్బరి, ద్రాక్ష విత్తనాలు కలిపిన తైలాల్ని శరీరానికి రాసుకుంటే బాగుంటుంది. చేతులు, కాళ్లు, మెడ, నుదురు, ఇతర శరీరభాగాల మర్దనకు ఈ నూనెను ఉపయోగించాలని నిపుణులు చెబుతున్నారు. తైలాల వాడకంలో జాగ్రత్తలు తప్పనిసరి.
అరోమాథెరపీ..
సహజ మూలికలు, ఔషధ పదార్థాల వాసన పీల్చడం వల్ల ఎంతో ఉపశమనాన్ని పొందవచ్చు. కొవ్వొత్తుల పరిమళం, ఇతరత్రా సుగంధాలు గదినిండా వ్యాప్తిస్తే సుఖ నిద్ర తథ్యం.
ఆహారం, నిద్ర రెండూ సమాన అవసరాలే. హెర్బల్ మందుల వినియోగంలోనూ వైద్యుల సలహాలను పాటించాలి. బలవంతంగా కాకుండా సహజ నిద్రకే ప్రాధాన్యమివ్వడం అన్ని విధాలా ప్రయోజనకరం. అనేక సహజ ఔషధ మూలికలు మన శరీర ఆరోగ్యానికి సహకరించేవే. వాటివల్ల ఎటువంటి ప్రభావాలు, ఇతర సమస్యలుండవు. వినియోగించే ముందు మాత్రం వైద్య పర్యవేక్షణ తప్పనిసరిగా ఉండాలి.
