యాదాద్రిలో భక్తుల రద్దీ.. వేసవి తాపానికి ఉక్కిరిబిక్కిరి

Devotees Rush In Yadadri: ప్రసిద్ధ పుణ్యక్షేత్రం యాదాద్రికి వచ్చే భక్తుల సంఖ్య రోజురోజుకీ పెరుగుతోంది. సెలవు రోజుల్లో ఆ సంఖ్య మరింత అధికంగా ఉంటోంది. పునర్నిర్మాణం తర్వాత స్వయంభువులను దర్శించుకునేందుకు భక్తులు పోటెత్తుతున్నారు. ఆలయ శోభను కనులారా ఆస్వాదించేందుకు వేసవిని సైతం లెక్క చేయకుండా వస్తున్నా.. ఆలయ ప్రాంగణంలో మాత్రం అందుకు తగినట్లుగా మౌలిక వసతులు కొరవడటంతో భక్తులు ఇబ్బందులు ఎదుర్కొంటున్నారు.

Devotees Rush In Yadadri: తెలంగాణ ప్రసిద్ధ పుణ్యక్షేత్రం యాదాద్రికి భక్తుల తాకిడి పెరిగింది. ఆదివారం కావడంతో వివిధ ప్రాంతాల నుంచి భక్తుల రాకతో యాదగిరీశుని సన్నిధి భక్తులతో రద్దీగా మారింది. క్యూలైన్లు, ప్రసాదాల కౌంటర్లు, కల్యాణకట్ట, లక్ష్మీ పుష్కరిణి.. కిటకిటలాడుతున్నాయి. స్వామి వారి ఉచిత దర్శనానికి రెండు గంటలు, ప్రత్యేక ప్రవేశ దర్శనానికి గంట సమయం పడుతోంది. రద్దీ దృష్ట్యా భక్తులకు లఘు దర్శన సౌకర్యం ఏర్పాటు చేశారు. ప్రధానాలయంలో ఉదయం నుంచి ఆరాధనలు, స్వామివారి నిత్యకైంకర్యాలను అర్చకులు శాస్త్రోక్తంగా చేపట్టారు. భక్తులు స్వామి వారిని దర్శించుకుని మొక్కులు చెల్లించుకుంటున్నారు.

ఉక్కపోతతో ఉక్కిరిబిక్కిరి: కాగా స్వయంభువుల దర్శనం కోసం భక్తులు క్యూలైన్లలో గంటల కొద్దీ నిరీక్షిస్తున్నారు. తాగునీరు సౌకర్యం ఉన్నా వేసవి కావడంతో నల్లాల ద్వారా వస్తున్న వేడి నీరు తాగలేక ఇబ్బందులు పడుతున్నారు. ఆలయ మాడ వీధుల్లోనూ సరిపోను తడకల పందిర్లు లేకపోవడంతో భానుడి తాపానికి భక్తులు తట్టుకోలేకపోతున్నారు. ఉక్కపోతతో చిన్నారులు, వృద్ధులు సతమతమవుతున్నారు.

'ఉదయం 7 గంటలకు బయల్దేరి వచ్చాము. దాదాపు మూడు గంటలకు పైగా నిల్చొనే ఉన్నాం. మా వయసును దృష్టిలో పెట్టుకుని అయినా వృద్ధులను పంపించడం లేదు. అడిగితే పట్టించుకోవడం లేదు. దాహార్తిని తీర్చుకునేందుకు నీళ్లు తాగుదామన్నా.. నల్లాల నుంచి వేడి నీళ్లే వస్తున్నాయి. కనీస సదుపాయాలు కూడా లేవు. చిన్నపిల్లలు తట్టుకోలేకపోతున్నారు.' -భక్తుడు

వీఐపీలకే సకల మర్యాదలు: మరోవైపు యాదాద్రికి వచ్చే వీఐపీలకే సకల మర్యాదలు చేపడుతున్నారని భక్తులు ఆగ్రహం వ్యక్తం చేస్తున్నారు. సామాన్య భక్తులను పట్టించుకోవడం లేదని అసహనం వ్యక్తం చేశారు. కనీసం మౌలిక సదుపాయాలైనా సరిగా కల్పించడం లేదని ఆవేదన చెందుతున్నారు.

"కోట్ల రూపాయల ఖర్చు పెట్టి కట్టించామని సీఎం కేసీఆర్‌ చెప్పుకొంటున్నారు. కానీ ఇక్కడ చూస్తే కనీస సదుపాయాలు కూడా లేవు. గంటల తరబడి క్యూలైన్లలో ఎదురుచూస్తున్నాం. తాగు నీరు సౌకర్యం కూడా లేదు. వీఐపీలకైతే దగ్గరుండి మరీ సకల మర్యాదలు కల్పిస్తున్నారు. వేసవి తాపానికి చిన్నారులు, వృద్ధులు తట్టుకోలేకపోతున్నారు. తిరుపతిలో మౌలిక సదుపాయాలు కల్పిస్తారు. ఇక్కడ అవి కూడా లేవు." -భక్తురాలు

'చల్లటి మంచినీళ్లు విక్రయించినా కొనుగోలు చేసేవాళ్లం. అలాంటి సౌకర్యం కూడా కల్పించాం. వ్యయప్రయాసల కోర్చి ఇంతదూరం వచ్చాం. స్వామివారిని దర్శించుకుని సంతోషంగా వెళ్దాం అనుకుంటే.. ఈ క్యూలైన్లలోనే గంటల తరబడి ఎదురుచూసి నీరుగారిపోతున్నాం. సెలవు రోజని కూడా అధికారులు సౌకర్యాలు కల్పించలేదు.' -భక్తుడు

ఇవీ చదవండి: నేనూ కార్మికుడినే.. కష్టమొస్తే మీ వెనకే ఉంటా: చిరంజీవి