Cp Ranganath on Preethi Suicide incident Update : రాష్ట్రవ్యాప్తంగా సంచలనం సృష్టించిన పీజీ వైద్య విద్యార్థిని ప్రీతి ఆత్మహత్య కేసును పోలీసులు ఛాలెంజ్గా తీసుకున్నారు. కేసు దర్యాప్తు వేగవంతంగా కొనసాగుతోందని వరంగల్ పోలీస్ కమిషనర్ రంగనాథ్ తెలిపారు. ప్రీతిని హత్య చేసి ఉంటారని తల్లిదండ్రులు ఇచ్చిన ఫిర్యాదు మేరకు విచారణ చేశామని.. హత్య చేసినట్లు ఎక్కడ ఆధారాలు లభించలేదని సీపీ వివరించారు.
మెడికో ప్రీతి మృతి కేసులో పోస్టుమార్టం రిపోర్ట్ కోసం వేచిచూస్తున్నట్లు వ్యాఖ్యానించిన సీపీ రంగనాథ్... మంత్రి కేటీఆర్, హరీశ్రావులకు కేసు పురోగతిపై ఎప్పటికప్పుడు సమాచారం అందిస్తున్నామని తెలిపారు. నిందుతులపై కఠిన చర్యలు తీసుకోవాలని ఇప్పటికే ప్రభుత్వం సూచించిందన్నారు. ప్రధాన నిందితుడు అయిన సీనియర్ విద్యార్థి సైఫ్తో పాటు మరో ఇద్దరిపై అనుమానం ఉందని.. వారిని అదుపులోకి తీసుకునేందుకు ఆధారాలను సేకరిస్తున్నామని సీపీ తెలిపారు. ఏ విధంగా చూసిన ప్రీతి మృతికి కారణం ర్యాగింగే అని స్పష్టం చేశారు. వైద్య విద్యార్థిని ప్రీతి ఆత్మహత్య చేసుకునే రోజు వరకు సైఫ్ ఆమెను వేధించిన్నట్లు పేర్కొన్నారు.
'మెడికో ప్రీతి మృతి కేసు దర్యాప్తు కొనసాగుతోంది. ప్రీతి హత్యకు గురైనట్లు ఏలాంటి ఆధారాలు లేవు. ప్రీతి పోస్టుమార్టం రిపోర్ట్ కోసం చూస్తున్నాం. ఏ విధంగా చూసిన ప్రీతి మృతికి కారణం ర్యాగింగే. ప్రీతి కేసు దర్యాప్తును ప్రభుత్వం పరిశీలిస్తోంది. మంత్రులు కేటీఆర్, హరీశ్‌రావు దర్యాప్తును పరిశీలిస్తున్నారు.'-రంగనాథ్, వరంగల్ పోలీస్ కమిషనర్
20 లక్షలు ఆర్థిక సహాయం అందజేసిన మంత్రి ఎర్రబెల్లి : వేధింపులతో బలవన్మరణానికి పాల్పడిన వైద్య విద్యార్థిని ప్రీతి కుటుంబాన్ని ఆదుకునేందుకు అందరం కృషి చేద్దామని మంత్రి ఎర్రబెల్లి దయాకర్రావు కోరారు. కొంతమంది ఈ ఘటనలో రాజకీయ ఉనికి కోసం పాకులాడటం మంచిది కాదని ఆయన హితవు పలికారు. ఈ నెల 17న మంత్రి ఎర్రబెల్లి జనగామ జిల్లా కొడకండ్ల మండలంగిర్ని తండాలోని ప్రీతి స్వగృహానికి వెళ్లి ఆమె కుటుంబ సభ్యులను పరామర్శించారు. ప్రీతి చిత్రపటానికి పూలమాల వేసి నివాళులర్పించారు.
అనంతరం కుటుంబ సభ్యులకు ఎర్రబెల్లి చారిటబుల్ ట్రస్ట్ తరఫున 20 లక్షల రూపాయల ఆర్థిక సహాయాన్నిమంత్రి ఎర్రబెల్లి అందజేశారు. ప్రీతి సోదరి, సోదరుడికి ప్రభుత్వ ఉద్యోగాలు కల్పిస్తామని హామీ ఇచ్చారు. వారి కుటుంబానికి సీఎం కేసీఆర్, కేటీఆర్ అండగా నిలుస్తారని చెప్పారు. ప్రీతి కుటుంబానికి ప్రభుత్వం అండగా ఉంటుందని భరోసా ఇచ్చారు. తన బిడ్డను భవిష్యత్తులో మంచి డాక్టర్గా చూడాలన్న కలను చెదరగొట్టిన నిందితులను కఠినంగా శిక్షించాలని ప్రీతి తల్లి శారద మంత్రిని కోరారు.
ఇవీ చదవండి:
