Errabelli Dayakar rao Review: మిర్చి రైతులకు నష్టం జరగకుండా వరంగల్ ఎనుమాముల మార్కెట్ అధికారులు చర్యలు తీసుకోవాలని పంచాయతీ రాజ్ శాఖ మంత్రి ఎర్రబెల్లి దయాకర్రావు ఆదేశించారు. ఉదయం నుంచి మార్కెట్లో జరిగిన రైతుల ఆందోళనపై ఆయన సమీక్షించారు. జిల్లా కలెక్టర్, మార్కెట్ ఛైర్మన్తో మాట్లాడారు. రైతులకు అండగా ముఖ్యమంత్రి కేసీఆర్ ఉన్నారని.. ఎవరు మోసం చేసినా క్షమించే ప్రసక్తే లేదని హెచ్చరించారు.
గత సంవత్సరం కన్నా... ఈసారి మిర్చి పంటలకు ధరలు బాగా ఉన్నాయని... అయితే చీడపీడలు, ప్రకృతి వైపరీత్యాలతో దిగుబడులు తగ్గాయని మంత్రి అన్నారు. రైతుకు మద్దతు ధర వచ్చే విధంగా మార్కెట్ అధికారులు చర్యలు తీసుకోవాలన్నారు. గిట్టుబాటు ధరలు వచ్చిన రైతులు తమ సరుకులను విక్రయించుకోవాలని సూచించారు. మిగిలిన రైతులు... శీతల గిడ్డంగుల్లో భద్రపరుచుకోవాలన్నారు. కలెక్టర్, మార్కెట్ కమిటీ ఛైర్మన్, కమిటీ సభ్యులు, మార్కెటింగ్ శాఖ అధికారులు... రోజూ ధరలపై పర్యవేక్షించాలని, రైతులకు అధిక ధరలు వచ్చే విధంగా చర్యలు తీసుకోవాలని ఆదేశించారు.
భగ్గుమన్న రైతులు..
Farmers Protest at Enumamula market : వరంగల్ ఎనుమాముల మార్కెట్లో మిర్చి పంటకు ధర తగ్గించడం వల్ల రైతులు భగ్గుమన్నారు. ఎంతో కష్టపడి పంటను తీసుకువస్తే తక్కువ రేటుకు కొనుగోలు చేస్తున్నారని ఆందోళనకు దిగారు. మార్కెట్ యార్డు కార్యాలయాన్ని ముట్టడించి నిరసన తెలిపారు. గిట్టుబాటు ధర కల్పించాలని పెద్ద ఎత్తున నినాదాలు చేశారు. సీజన్ ప్రారంభంలో రూ. 18 వేల 600 పలికిన ధరను.. రూ. 17 వేల 200కు తగ్గించారని ఆరోపించారు. నాణ్యత పేరుతో జెండా పాటకన్నా తక్కువకు కొంటున్నారని ఆగ్రహం వ్యక్తం చేశారు.
ఇదీ చూడండి:
Mirchi Farmers Protest:ఎనుమాముల మార్కెట్లో రైతుల ఆందోళనతో ఉద్రిక్తత
