పర్యటకులను రారమ్మంటున్న లక్నవరం సరస్సు

వరుస సెలవులతో లక్నవరం సరస్సుకు సందర్శకులు పోటెత్తారు. కుటుంబ సమేతంగా వచ్చి లక్నవరం అందాలను తనివితీరా వీక్షిస్తున్నారు. సరస్సులో బోటింగ్ చేస్తూ సరదాగా గడుపుతున్నారు.

చుట్టూ పచ్చని చెట్లు, కొండలు, గుట్టల మధ్యలో వంపులు తిరిగిన అందమైన సరస్సు లక్నవరంలో నెలవైంది. అక్కడకు వెళ్తే ఓ పట్టాన వెనక్కి రాలేమంటే అతిశయోక్తి కాదు. ఇటీవల కురిసిన భారీ వర్షాలతో లక్నవరానికి జలకళ వచ్చింది. 35 అడుగులకు నీటిమట్టం చేరి మత్తడి పోస్తోంది. గతంలో ఏర్పాటు చేసిన వేలాడే వంతెనకు తోడు ఇటీవల ఏర్పాటు చేసిన రెండో వంతెన కూడా ప్రత్యేక ఆకర్షణగా నిలుస్తోంది.
వారంతాల్లో వరుస సెలవులు రావటంతో ఈ ప్రాంతానికి సందర్శకులు పోటెత్తుతున్నారు. హైదరాబాద్​తోపాటు పొరుగు రాష్ట్రాల నుంచి సందర్శకులు లక్నవరం బాటపడుతున్నారు. నిండుకుండలా కనిపిస్తున్న సరస్సును చూసి పర్యటకులు మైమరిచిపోతున్నారు. కుటుంబసభ్యులు, స్నేహితులతో కలిసి వచ్చి సరదాగా బోటింగ్ చేస్తూ ఉల్లాసంగా గడుపుతున్నారు.

5 వేల ఎకరాల్లో విస్తరించి ఉన్న ఈ సరస్సుకు ఏటికేడు పర్యటకుల సంఖ్య పెరుగుతోంది. ప్రధానంగా వారాంతాల్లో రద్దీ అధికంగా ఉంటోంది. బస చేసేందుకు వీలుగా గుట్టలపై ప్రత్యేకంగా పర్యటక శాఖ కాటేజీలు ఏర్పాటు చేసింది. కానీ ఇక్కడ అవి దొరకడమే గగనంగా మారిందంటే... సందర్శకుల తాకిడి ఏ విధంగా ఉందో అర్ధమవుతోంది. చూస్తున్నకొద్దీ చూడాలనిపించే అందాలతో... రారమ్మంటూ ఆహ్వానించే లక్నవరం సందర్శన... పర్యటకులకు మధురానుభూతులు అందిస్తూ... మనోహర పర్యటక ప్రాంతంగా నిలుస్తోంది.

ఇవీ చూడండి: కాంగ్రెస్‌ తాత్కాలిక అధ్యక్షురాలిగా సోనియా గాంధీ