కాజీపేట రైల్వే జంక్షన్‌ను డివిజన్ ఏర్పాటు కోసం రాష్ట్రప్రభుత్వం తరఫున అన్ని విధాల కృషి చేస్తామని చీఫ్ విప్‌ దాస్యం వినయ్‌ భాస్కర్‌ తెలిపారు. వరంగల్‌ అర్బన్‌ జిల్లా కాజీపేటలో రైల్వే డివిజన్ సాధన సమితి ఆధ్వర్యంలో ఉద్యమ కార్యాచరణ సన్నాహాక సదస్సు నిర్వహించారు. ఈ కార్యక్రమానికి ఆయన ముఖ్య అతిథిగా హాజరై ప్రసంగించారు.
డివిజన్ ఏర్పాటు కోసం కేంద్ర ప్రభుత్వానికి నివేదిక పంపేలా కృషి చేస్తానని ఆయన హామీ ఇచ్చారు. త్వరలోనే ముఖ్యమంత్రి, ఎంపీలతో చర్చిస్తానని అన్నారు. కాజీపేట జంక్షన్ డివిజన్‌గా మార్చేందుకు అన్ని అర్హతలు ఉన్నాయని సాధన సమితి సభ్యులు వివరించారు. రైల్వే కోచ్ ఫ్యాక్టరీ ఏర్పాటు, ఫిట్‌లైన్ పనుల వేగవంతం, వ్యాగన్ వర్క్ షాప్ పనులు ప్రారంభించాలనే డిమాండ్లపై ఈ కార్యక్రమంలో ప్రధానంగా చర్చించారు. ఈ సమావేశంలో సాధన సమితి వ్యవస్థాపకులు గాదె ఇన్నారెడ్డి, కర్ర యాదవరెడ్డి పాల్గొన్నారు.
