Variety Ganesh Idols 2023 in Warangal : జైజై గణేశా.. జై కొడతా గణేశా.. మా స్ఫూర్తి నీవే గణేశా

Variety Ganesh Idols 2023 in Warangal : విఘ్నాలు తొలగించే వినాయకుడి పండుగ వచ్చిందంటే చాలు.. దేశవ్యాప్తంగా ఆధ్యాత్మికత ఉట్టిపడుతుంది. చిన్నా పెద్దా తేడా లేకుండా గణనాథుల ఏర్పాట్లలో నిమగ్నమైపోతారు. ప్రస్తుతం ప్లాస్టర్‌ ఆఫ్‌ పారిస్‌ ప్రతిమలతో కలిగే నష్టాల్ని దృష్టిలో ఉంచుకొని.. మట్టివిగ్రహాల వైపు మొగ్గు చూపుతున్నారు. పర్యావరణానికి ప్రాధాన్యమిస్తూనే.. సందేశాత్మకంగా విభిన్న ఆకృతులలో ఏకదంతుడ్ని ఏర్పాటు చేసి పూజిస్తున్నారు

Variety Ganesh Idols 2023 in Warangal : పర్యావరణ పరిరక్షణలో మేము సైతం అంటూ మట్టి గణపతులతో ముందుకు సాగుతున్నారు ఓరుగల్లు వాసులు. పర్యావరణహితంతో పాటు.. సందేశాత్మక ఆకర్షణీయ ప్రతిమలను కొలువుదీర్చారు. హన్మకొండ సుధానగర్​కు చెందిన నిర్వాహకులు.. రోడ్డు ప్రమాదాలపై అవగాహన కల్పించడానకి వీలుగా తలమీదే రక్షణ మీదే అంటూ.. వాహనదారుడికి హెల్మెట్‌ అందిస్తున్నట్లు ఉమాసుతుడ్ని ఏర్పాటు చేశారు.

కాశీ బుగ్గలో వెండివర్ణంతో భారీ గోపురంతో పాటు దక్షిణామూర్తి తరహాలో లంబోదరుడ్ని కొలువుదీరాడు. చార్‌బౌళిలో కోలాటం నృత్యాలు, మంగళ వాద్యాల నడుమ... సిద్ధి, బుద్ధి సహిత విఘ్నేశ్వరుడిని చూసేందుకు భక్తులు తరలివస్తున్నారు. వరంగల్ చౌరస్తాలోని శ్రీలక్ష్మీ వినాయక కార్పొరేషన్ సభ్యులు ఏకంగా.. 10,116 రాఖీలతో వినాయకుని ప్రత్యేకంగా తయారు చేయించారు. ఒడిశా కళాకారులు నెల రోజులపాటు శ్రమించి ఈ విగ్రహం తయారు చేసినట్లు నిర్వాహకులు తెలిపారు. కాషాయం, తెలుపు, ఆకుపచ్చ వర్ణంతో కూడిన దూది రాఖీలను ఇందుకు ఉపయోగించినట్లు నిర్వాహకులు తెలిపారు.

Variety Ganesh Idols 2023 in Telangana : ఏటా భిన్నంగా దర్శనమిచ్చే గీతా భవన్ వినాయకుడు.. ఈ ఏడాది దాల్చిన చెక్క, డ్రై ఫ్రూట్స్​తో కొలువుదిరి భక్తులను కనువిందు చేస్తున్నారు. బెంగాల్​కి చెందిన కళాకారులు 10 రోజుల పాటు శ్రమించి.. 100 కిలోల దాల్చిన చెక్కను ఉపయోగించి ఈ విగ్రహాన్ని తయారు చేసినట్లు నిర్వాహకులు వివరించారు. పిన్నవారి వీధికి చెందిన కాకతీయ యూత్ అసోసియేషన్ సభ్యులు బాలగణపతిని ప్రతిష్టించారు. మబ్బుల నడుమ బాలగణపతి చూడరమ్యంగా ఉన్నాడు.

Ganesh Chaturthi Celebrations Telangana 2023 : ఎండిపోయిన చెట్టు కొమ్మలను తీసుకువచ్చి వాటికి రంగులు అద్ది.. మండపానికి ఎదురుగా అందంగా ఆకర్షించే విధంగా తీర్చిదిద్దారు అండర్ రైల్వేగేట్ సమీపంలో భక్త గజానన మండలి సభ్యులు ఏకంగా ఇస్కాన్ టెంపుల్ నమూనాతో కూడిన భారీ సెట్టింగ్​ను ఏర్పాటుచేసి.. మురళీధరుని రూపంలో విఘ్నేశ్వరుని ఏర్పాటు చేశారు. బట్టల బజార్‌లో త్రివర్ణపతాక రంగులద్దుకున్న.. మట్టివినాయకుడు జాతీయ ఐక్యతను చాటుతున్నాడు.

Chandrayaan Ganesh Idol : చంద్రయాన్- 3 విజయవంతం కావడంతో శాస్త్రవేత్తల ఔన్నత్యాన్ని చాటుతూ.. నిర్మల మాల్ వద్ద గణేష్ ఉత్సవ సమితి సభ్యులు విభిన్న ఆకృతిలో వినాయకుని ఏర్పాటు చేశారు. చంద్రమండలంపై వినాయకుడు కొలువు దీరిన విధంగా.. వినాయకుడితో పాటు రాకెట్​ను ఏర్పాటు చేశారు. పర్యావరణ హితమైన మట్టి గణపతిని ప్రతిష్టించి.. మబ్బులు ఏర్పడే విధంగా దూదిని ఉపయోగించి అందంగా తీర్చిదిద్దారు. విభిన్న ఆకృతుల్లో పుడమి సంరక్షణను నొక్కి చెబుతున్న వినాయకుడి స్ఫూర్తిని ఆదర్శంగా తీసుకొని ముందుకుసాగుదామని పలువురు సూచిస్తున్నారు.