వరంగల్ రూరల్ జిల్లా పరకాల నియోజకవర్గంలోని సంగెం మండలంలోని మండల ప్రజా పరిషత్ కార్యాలయంలో నిర్వహించిన సర్వసభ్య సమావేశంలో పరకాల ఎమ్మెల్యే చల్లా ధర్మారెడ్డి పాల్గొన్నారు. ఈ సందర్భంగా సమావేశంలో మాజీ రాష్ట్రపతి ప్రణబ్ ముఖర్జీకి నివాళులర్పించారు. అధికారులు, ప్రజా ప్రతినిధులు సమన్వయంతో పనిచేస్తేనే అభివృద్ధి సాధ్యమని ఎమ్మెల్యే పేర్కొన్నారు.
మండలంలోని సమస్యలు, అభివృద్ధి పనులపై వివిధ శాఖల అధికారులతో ఆయన సమీక్షించారు. వర్షాల కారణంగా నష్టపోయిన రైతులకు ప్రభుత్వ పరంగా న్యాయం చేస్తామన్నారు. మండలంలోని పంటచేలల్లో వ్యవసాయ అధికారులు క్షేత్రస్థాయిలో పర్యటించి పూర్తిస్థాయిలో నివేదిక సమర్పించాలని ఆదేశించారు. ఈ కార్యక్రమంలో మండల ప్రజాప్రతినిధులు, అధికారులు తదితరులు పాల్గొన్నారు.
ఇదీ చూడండి: 'తీవ్రవాదం ఏ రూపంలో ఉన్నా భారత్ సహించదు'
