వరంగల్ రూరల్ జిల్లా గీసుగొండ మండలంలోని ఊకల్ గ్రామంలో పరకాల ఎమ్మెల్యే చల్లా ధర్మారెడ్డి హరితహారం కార్యక్రమంలో పాల్గొన్నారు. ఈ సందర్భంగా గ్రామ శివారులోని వైశ్యులకు సంబంధించిన 8 ఎకరాల స్థలంలో మొక్కలు నాటారు.
నియోజకవర్గ పరిధిలోని వాగులు, చెరువులు, కుంటల పక్కన విరివిగా మొక్కలు నాటాలని ఎమ్మెల్యే అధికారులకు సూచించారు. హరితహారం కార్యక్రమం రాష్ట్ర వ్యాప్తంగా పండగ వాతావరణంలో జరుగుతోందన్నారు. భవిష్యత్ తరాల కోసమే ముఖ్యమంత్రి కేసీఆర్ ఈ కార్యక్రమానికి శ్రీకారం చుట్టారని తెలిపారు. ప్రతి ఒక్కరూ తమ ఇంటి ఆవరణలో మొక్కలు నాటి వాటిని సంరక్షించాలని కోరారు.
కార్యక్రమంలో నగర మేయర్ గుండా ప్రకాశ్రావు, కుడా ఛైర్మన్ మర్రి యాదవరెడ్డి, మున్సిపల్ కమిషనర్ పమేలా సత్పతి, పలువురు స్థానిక ప్రజాప్రతినిధులు పాల్గొన్నారు.
