హత్య కేసులో రిమాండ్కు నిందితుడు
మహబూబాబాద్ జిల్లా బయ్యారం మండల భాజపా నేత రాసాల లింగయ్య హత్య కేసులో నిందితుడైన కాస లింగయ్యను అరెస్ట్ చేసి రిమాండ్కు తరలిస్తున్నట్లు ఎస్పీ కోటిరెడ్డి తెలిపారు.
ఇటీవల జరిగిన సహకార సంఘాల ఎన్నికల్లో కమలం పార్టీ తరఫున పోటీ చేయాలని నిందితుడు కాస లింగయ్యను.. మృతుడు రాసాల లింగయ్య కోరాడు. మీ పార్టీ తరఫున పోటీ చేసే ప్రసక్తే లేదని భాజపా నేత లింగయ్యను నిందితుడు దూషించాడు.
ఇద్దరి మధ్య మాటామాటా పెరిగి ఘర్షణ చోటుచేసుకుంది. మరుసటి రోజు నిందితుడు కాస లింగయ్య.. భాజపా నేత రాసాల లింగయ్యను బలంగా కొట్టాడు. రాసాల తలకు బలమైన గాయమైంది. ఆస్పత్రికి తరలించారు. బాధితుడు చికిత్స పొందుతూ మృతి చెందాడు. మృతుని బంధువుల ఫిర్యాదు మేరకు నిందితుడిని అరెస్ట్ చేసి రిమాండ్కు తరలించినట్లు ఎస్పీ తెలిపారు.
