వనపర్తి నల్ల చెరువు చుట్టుపక్కల అక్రమ వెంచర్లు

ఈ ప్రాంతం బాగుందని నమ్మించారు. చెరువు పక్కనే... వేగంగా అభివృద్ధి చెందుతుందని రియల్టర్లు ఊరించారు. చకాచకా ప్లాట్లు చేసి అమ్మేశారు. ఇదంతా 40 ఏళ్ల క్రితం జరిగింది. ఇప్పుడా ప్రాంతం చెరువు ఎఫ్​టీఎల్​​లోకి వస్తుందని.. తెలిసి ప్లాట్లు కొన్న వారంతా లబోదిబోమంటున్నారు. నల్ల చెరువు ఎల్​టీఎఫ్​లో జరిగిన ఈ భూదందా ఇప్పుడు 800మందిని నిలువునా ముంచేసింది.

వనపర్తి జిల్లా కేంద్రంలోని నల్ల చెరువు మినీ ట్యాంక్​బండ్​గా మార్చాలని ప్రభుత్వం నిర్ణయించింది. అనుకున్నదే తడువుగా చెరువులోకి కల్వకుర్తి ఎత్తిపోతల పథకం నీటిని మళ్లించారు. చెరువులో నీరు ఫుల్ ట్యాంక్ లెవల్​- ఎఫ్​​టీఎల్ వరకు చేరింది. గత 40 ఏళ్లుగా... నీళ్లు లేక బోసిపోయి ఉన్న చెరువు ఇప్పుడు నిండుకుండలా పారుతోంది. ఫలితంగా చెరువు చుట్టుపక్కన వెలసిన అక్రమ వెంచర్లు మునిగిపోయాయి. ఈ వెంచర్​లో కొన్ని వందల సంఖ్యలో ప్లాట్లు కొనుగోలు చేసిన లబ్ధిదారులు ఇప్పుడు లబోదిబోమంటున్నారు.

పాతికేళ్లుగా గమనించలేదు..

218 ఎకరాల విస్తీర్ణం ఉన్న ఈ చెరువులోకి 40 ఏళ్లుగా నీళ్లు లేవు. చెరువు చుట్టూ ఉన్న పట్టాదారులు తమ పొలాలను స్థిరాస్తి వ్యాపారులకు విక్రయించారు. వారు ఎలాంటి అనుమతులు లేకుండా చెరువు ఎఫ్​టీఎల్​లోనే అక్రమంగా వెంచర్లు వేశారు. ఎప్పుడో పాతికేళ్ల కింద కొనుగోలు చేసిన వారు స్థానికులు కాక బయటి ప్రాంతాల వారు అయినందున ఆ ప్లాట్ల కేసి ఎవరూ గమనించలేదు. తీరా ఇప్పుడు చెరువు నిండి అలుగు పారడం వల్ల నీరు ఎఫ్​టీఎల్ దాటి వచ్చింది.

800 ప్లాట్లు ఉంటాయని అంచనా..

ఈ పరిణామంతో అక్రమంగా వేసిన ప్లాట్లు నీటిలో మునిగిపోయాయి. ఇవి దాదాపు 800 వరకు ఉంటాయని అంచనా. చెరువు నీటిలో మునిగిపోయిన ప్లాట్లన్ని అక్రమ వెంచర్లు వేసినవేనని.. వాటిని కొన్నవారికి ఎలాంటి హక్కులు చెందవని నీటిపారుదల శాఖ అధికారులు, మున్సిపాలిటి, తహసీల్దార్​లు సంయుక్తంగా నోటీసులు జారీ చేశారు. అక్రమ వెంచర్లు వేసిన స్థిరాస్తి వ్యాపారులు ఎఫ్​టీఎల్​ను తగ్గించేందుకు నీటిపారుదల శాఖ అధికారులపై ఒత్తిడి తీసుకొచ్చేందుకు ప్రయత్నాలు చేస్తున్నారు.

ఎఫ్​టీఎల్ తగ్గిస్తే అలుగు ద్వారా నీరు బయటికి పోయి ప్లాట్లు తేలుతాయని స్థిరాస్తి వ్యాపారులు ఆలోచిస్తున్నారు. ఒకసారి ప్లాట్లు తేలాక లబ్ధిదారులను ఊరడించి.. ఎలాగోలా సర్దిచెప్పాలని భావిస్తున్నారు.

ఇవీ చూడండి: 'పుర' ఎన్నికల సందడి.. అమల్లోకి ప్రవర్తనా నియమావళి