కుళ్లిన మాంసం, చేపలు విక్రయిస్తున్న హోటల్ యజమానికి రూ.10 వేలు జరిమానా విధించారు. వనపర్తి జిల్లా ఆత్మకూరులో మున్సిపల్ కమిషనర్ రమేశ్ నిర్వహించిన ఆకస్మిక తనిఖీల్లో ఈ సంఘటన వెలుగుచూసింది. పట్టణ కేంద్రంలోని దాబాలు, హోటళ్లలో పురపాలక సిబ్బందితో కలిసి ఆయన సోదాలు నిర్వహించారు.
ఇలాంటి చర్యలు పునరావృతం కాకుండా అందరికీ నోటీసులు జారీ చేశారు. మాంసం విక్రయదారులు మార్కెట్లో ఆరోగ్యంగా ఉన్న జీవాలను మాత్రమే వధించాలని హెచ్చరించారు. లేని పక్షంలో కఠిన చర్యలు తీసుకుంటామన్నారు. తూనికల విషయంలో కచ్చితమైన నియమ నిబంధనలు పాటించాలని రమేశ్ సూచించారు.
