గల్వాన్ లోయలో చైనా దొంగదెబ్బతో వీరమరణం పొందిన కర్నల్ సంతోశ్ బాబు కుటుంబానికి భారత ఆర్మీ అండగా ఉంటుందని కేంద్ర మంత్రి కిషన్ రెడ్డి భరోసా ఇచ్చారు. సూర్యాపేటలో సంతోశ్ బాబు కుటుంబ సభ్యులను కిషన్ రెడ్డి పరామర్శించారు. కర్నల్.. ఏ లక్ష్యం కోసమైతే ప్రాణత్యాగం చేశారో ఆయన లక్ష్యం సాధించేందుకు ప్రధానమంత్రి మోడీ ప్రపంచ దేశాల మద్దతు కూడగడుతున్నారని కిషన్ రెడ్డి వెల్లడించారు. అందులో భాగంగా సైన్యానికి పూర్తి అధికారాలు ఇచ్చినట్లు మంత్రి ప్రకటించారు. చైనా వస్తువులను బహిష్కరించాలని మంత్రి సూచించారు.
కర్నల్ కూతురు అభిజ్ఞ, కుమారుడు అనిరుద్నుతో మాట్లాడారు. కోరుకొండ సైనిక్ స్కూల్, నేషనల్ డిఫెన్స్ అకాడమీ సమయాల్లో సంతోశ్ బాబు నైపుణ్యాన్ని ఫోటో ఆల్బమ్ తెప్పించుకొని తిలకించారు. చిన్ననాటినుంచే సైనికుడిని చేయాలన్నా తన ఆకాంక్ష మేరకే తన కుమారుడు కోరుకొండ సైనిక్ స్కూల్లో తొలి ప్రయత్నంలోనే అడ్మిషన్ సాధించాడని సంతోశ్ బాబు తండ్రి ఉపేందర్ మంత్రికి వివరించారు. సంతోష్ బాబులో నరనరాన దేశభక్తి కనిపించేదని, దేశం కోసం నాకు ఏదైనా జరిగినా గర్వపడాలని తమకు ధైర్యం చెప్పేవాడని అన్నారు.
ఇదీ చూడండి: శ్రీనగర్ ఎన్కౌంటర్లో ముగ్గురు ముష్కరులు హతం
