ఉత్కంఠగా ఎదురుచూస్తున్న హుజూర్నగర్ ఉప ఎన్నిక ఓట్లను ఇవాళ లెక్కించనున్నారు. సూర్యాపేటలోని వ్యవసాయ మార్కెట్ గోదాం ఆవరణలో... లెక్కింపు చేపడతారు. ఇందుకోసం 150 మందికి పైగా సిబ్బంది విధులు నిర్వర్తించనున్నారు. ఉదయం 8 గంటలకు లెక్కింపు ప్రారంభం కానుంది. మధ్యాహ్నం 12 కల్లా ఫలితం తేలనుంది. 14 టేబుళ్లు ఏర్పాటు చేసి, 22 రౌండ్లలో లెక్కించనున్నారు.
ఆఖర్లో వీవీప్యాట్ల లెక్కింపు
తొలుత ఎలక్ట్రానిక్ ట్రాన్స్ ఫర్ ఫర్ పోస్టల్ బ్యాలెట్ సర్వీస్... ఈటీపీబీఎస్ ఓట్లను లెక్కిస్తారు. అవి పూర్తైన తర్వాత... ఈవీఎంలను లెక్కిస్తారు. ఐదు పోలింగ్ కేంద్రాలకు సంబంధించిన వీవీప్యాట్ల స్లిప్పులను లెక్కించనున్నారు. 302 పోలింగ్ కేంద్రాలుండగా... అందులో ఐదింటివి మాత్రమే లెక్కిస్తారు. ఇందుకోసం ఏ కేంద్రాల వీవీప్యాట్లు తీసుకోవాలనేది లాటరీ పద్ధతిన నిర్ణయిస్తారు. ఉదయాన్నే లాటరీ పద్ధతి నిర్వహించినా... ఈవీఎంల లెక్క పూర్తైన తర్వాతే వీవీప్యాట్ల లెక్కింపు చేపడతారు.
200 మందితో భద్రత
ఒక్కో టేబుల్ వద్ద... ప్రతి అభ్యర్థికి సంబంధించిన ఏజెంటును అనుమతిస్తారు. ప్రతి టేబుల్ వద్ద కౌంటింగ్ సూపర్ వైజర్, సహాయకుడు, సూక్ష్మ పరిశీలకుడు ఉంటారు. కౌంటింగ్ కేంద్రం వద్ద మూడంచెల భద్రత ఉంటుంది. 30 పోలీసు యాక్టు అమలు చేయడంతో పాటు అడుగడుగునా నిఘా ఏర్పాటు చేశారు. జిల్లా ఎస్పీ ఆర్.భాస్కరన్ ఆధ్వర్యంలో పారామిలిటరీ విభాగం, స్పెషల్ పార్టీ, ఆర్మ్ గార్డ్స్ సహా రెండు వందల మంది సిబ్బందిని... భద్రత కోసం నియమించారు. అధికార తెరాసకు, విపక్ష కాంగ్రెస్కు కీలకంగా మారిన ఈ స్థానంలో విజేత ఎవరో మరికొన్ని గంటల్లో తేలనుంది.
ఇదీ చూడండి: అటవీ అభివృద్ధి సంస్థ ఛైర్మన్‌గా వంటేరు
