తెలంగాణలో కరోనా రోజురోజుకూ విజృంభిస్తోంది. ఇవాళ సూర్యాపేట జిల్లాలో మరో 6 కరోనా పాజిటివ్ కేసులు నమోదయ్యాయని కలెక్టర్ వినయ్ కృష్ణారెడ్డి తెలిపారు. నాగారం మండలం వర్ధమానుకోట గ్రామంలో ఒకే కుటుంబానికి చెందిన ఆరుగురికి కొవిడ్-19 లక్షణాలు ఉన్నట్లు వైద్య పరీక్షలో నిర్ధరణ జరిగిందని ఆయన పేర్కొన్నారు.
సూర్యాపేట పట్టణంలోని కుడకుడ ప్రాంతానికి చెందిన వ్యక్తికి... తొలుత కరోనా నిర్ధరణ జరిగింది. ఆ తర్వాత ఆయన అత్తగారిల్లయిన వర్ధమానుకోటలోని ఆరుగురు కుటుంబ సభ్యులకు కరోనా వైరస్ సోకింది.
కుడకుడ వాసి భార్య సహా ఆమె ఇద్దరు సోదరులు, వారి సతీమణులతోపాటు... తల్లి కరోనా బారిన పడ్డారు. ఆమె తనయుడు, తండ్రికి సంబంధించిన వైద్య పరీక్షల నివేదికలు రావాల్సి ఉంది. వర్ధమానుకోటకు చెందిన కుటుంబ పెద్ద... మాంసం వ్యాపారి. ఈ మధ్యకాలంలో ఆయన 27 కుటుంబాలకు మాంసం అమ్మినట్లు గుర్తించిన అధికారులు... మెుత్తం 99 మందిని క్వారంటైన్కు తరలించారు. మామ, అల్లుడు కలిసి దిల్లీలోని మర్కజ్ ప్రార్థనల్లో పాల్గొన్నట్లు గుర్తించారు.
మెుత్తంగా సూర్యాపేట జిల్లాలో కరోనా బాధితుల సంఖ్య ఎనిమిదికి చేరుకుంది. రాష్ట్ర వ్యాప్తంగా కరోనా పాజిటివ్ కేసుల సంఖ్య 340కి చేరింది.
