జాతీయ రహదారి భద్రత మాసోత్సవం సందర్భంగా సిద్దిపేట జిల్లా హుస్నాబాద్ పోలీస్ శాఖ ఆధ్వర్యంలో హాఫ్ మారథాన్ పరుగు పోటీలను సీపీ జోయల్ డేవిస్తో కలిసి ఎమ్మెల్యే సతీష్ కుమార్ ప్రారంభించారు. ప్రారంభానికి ముందు యువతీ, యువకులు చేసిన సాంస్కృతిక కార్యక్రమాలు ఆకట్టుకున్నాయి.
డ్రోన్ కెమెరాలు..
హుస్నాబాద్ డివిజన్తోపాటు చుట్టుపక్కల జిల్లాల నుంచి దాదాపు వెయ్యి మంది పోటీల్లో పాల్గొన్నారు. ముందుగా హుస్నాబాద్ ఎనే-అక్కన్నపేట అంబేద్కర్ చౌరస్తా మీదుగా.. తిరిగి హుస్నాబాద్ ఎనేకు చేరుకునే 21కే పరుగును ఎమ్మెల్యే, సీపీ జెండా ఊపి ప్రారంభించారు. పోటీ పర్యవేక్షణకోసం పోలీసుల డ్రోన్ కెమెరాలు వినియోగించారు.
తర్వాత 10కే, 5కే, యువతుల కోసం 5కే పరుగు పోటీలను ప్రారంభించారు. యువత భారీ సంఖ్యలో పాల్గొనడంతో హుస్నాబాద్ పట్టణంలోని ఎనే ప్రాంతంలో కోలాహలం నెలకొంది. రోడ్డు భద్రతకు సంబంధించి ప్రమాణం చేయించారు. పోటీల్లో విజయం సాధించిన వారికి బహుమతులు అందించారు.
ఎమ్మెల్యే విజ్ఞప్తి..
హాఫ్ మారథాన్ నిర్వహించడం, దాదాపు వెయ్యి మంది ఈ పోటీలో పాల్గొనడంతో ఎమ్మెల్యే హర్షం వ్యక్తం చేశారు. గతంలో హుస్నాబాద్లో 407 మందికి పోలీస్ ఉద్యోగాల కోసం శిక్షణ ఇవ్వడం జరిగిందన్నారు. అందులో 100 మంది కొలువులు సాధించారని తెలిపారు.
పోలీస్ ఉద్యోగాలకు నోటిఫికేషన్ రానున్నందున శిక్షణ కేంద్రాన్ని హుస్నాబాద్ ప్రాంతంలో ఏర్పాటు చేసేలా చొరవ చూపాలని సీపీ జోయల్ డేవిస్ని ఎమ్మెల్యే విజ్ఞప్తి చేశారు. హాఫ్ మారథాన్ పోటీలను నిర్వహించి విజయవంతం చేసినందుకు పోలీసులను, యువతీ, యువకులను సీపీ అభినందించారు.
ఇదీ చూడండి: మీ రెజ్యూమ్ ఎలా ఉండాలి..?
