జీఎస్టీ, ఐజీఎస్టీ 14వ ఆర్థిక సంఘం నిధులు బీఆర్జీఎఫ్ కింద రాష్ట్రానికి రావాల్సిన రూ.10 వేల కోట్ల కోటా ఇవ్వకుండా కేంద్రంలోని భాజపా ప్రభుత్వం మాయమాటలు చెబుతోందని రాష్ట్ర ఆర్థిక శాఖ మంత్రి హరీశ్రావు ధ్వజమెత్తారు. సిద్దిపేట జిల్లా రాయపోల్ మండల కేంద్రంలో 266 మంది రైతులకు ఎంపీ కొత్త ప్రభాకర్ రెడ్డి, జడ్పీ ఛైర్పర్సన్ రోజా శర్మలతో కలిసి రైతులకు పట్టాదారు పాసు పుస్తకాలను పంపిణీ చేశారు.
తెరాస ప్రభుత్వం రైతుల ప్రభుత్వమని, అధికారంలోకి వచ్చినప్పటి నుంచి రైతుల కోసమే పని చేస్తోందని హరీశ్రావు పేర్కొన్నారు. కరోనా వంటి విపత్కర పరిస్థితుల్లోనూ సంక్షేమ పథకాలు ఎక్కడా ఆగలేదని తెలిపారు. రాబోయే దుబ్బాక ఉప ఎన్నికల్లో తెరాసకే పట్టం కట్టాలని కోరారు.
నూతన రెవెన్యూ చట్టాన్ని స్వాగతిస్తున్నారు..
వన్-బి కోసం రైతులు తహసీల్దార్ కార్యాలయాల చుట్టూ తిరగాల్సిన అవసరం లేకుండా కొత్త రెవెన్యూ చట్టాన్ని తీసుకొచ్చామన్నారు. ముఖ్యమంత్రి కేసీఆర్ తీసుకొచ్చిన ఈ నూతన రెవెన్యూ చట్టాన్ని స్వాగతిస్తూ గ్రామగ్రామాన రైతులు ట్రాక్టర్లతో ర్యాలీలు నిర్వహిస్తున్నారని తెలిపారు. మిషన్ భగీరథ ద్వారా ప్రతి ఇంటికీ నీరందించిన విధంగానే.. కాళేశ్వరం ప్రాజెక్టుతో ప్రతి ఎకరాకు సాగు నీరు అందిస్తామని స్పష్టం చేశారు.
ఈ సందర్భంగా కొత్త రెవెన్యూ చట్టాన్ని స్వాగతిస్తూ రాయపోల్ మండలం ఆరేపల్లి నుంచి మండల కేంద్రం వరకు రైతులు ట్రాక్టర్లతో భారీ ప్రదర్శన నిర్వహించారు. ర్యాలీని మంత్రి హరీశ్రావు జెండా ఊపి ప్రారంభించారు.
కార్యక్రమంలో రాష్ట్ర అటవీ అభివృద్ధి సంస్థ ఛైర్మన్ వంటేరు ప్రతాప్రెడ్డి, జిల్లా అదనపు కలెక్టర్ పద్మాకర్, ఆర్డీవో విజయేందర్రెడ్డి, పలువురు తెరాస నాయకులు, కార్యకర్తలు తదితరులు పాల్గొన్నారు.
ఇదీచూడండి: ఏడో ఆర్థిక గణాంక సర్వే.. ఉపాధి అవకాశాలు
