కాల్వల భూసేకరణకు రైతులు ముందుకు రావాలి: హరీశ్​రావు

సిద్దిపేట జిల్లాలో మంత్రి హరీశ్​రావు రైతులకు పట్టాదారు పాసుపుస్తకాలను పంపిణీ చేశారు. కాల్వల భూసేకరణకు రైతులు స్వచ్ఛందంగా ముందుకు రావాలని పిలుపునిచ్చారు.

కాల్వల భూసేకరణకు రైతులు స్వచ్ఛందంగా ముందుకు రావాలని మంత్రి హరీశ్​రావు పిలుపునిచ్చారు. సిద్దిపేట కొండా భూదేవి గార్డెన్స్​లో నియోజకవర్గ పరిధిలోని సిద్దిపేట రూరల్​లో 209 మందికి, సిద్దిపేట అర్బన్​లో 305 మంది రైతులకు పట్టాదారు పాసుపుస్తకాలను మంత్రి హరీశ్​రావు చేతుల మీదుగా పంపిణీ చేశారు.

కాళేశ్వరం నీళ్లు వచ్చాక రైతులతో జరుగుతున్న మొదటి సమావేశంలో మంత్రి హరీశ్​ ఈ పట్టాదారు పాసుపుస్తకాలను పంపిణీ చేశారు. నియోజకవర్గంలోని సిద్దిపేట రూరల్​, అర్బన్​ మండలాలు మినహా అన్నీ మండలాలకు కాళేశ్వరం జలాలు వచ్చాయన్నారు. త్వరలోనే రూరల్​, అర్బన్​ మండలానికి మల్లన్న సాగర్​ నీళ్లు తెస్తామని హామీనిచ్చారు. రైతులు కూడా పెద్ద మనసుతో కాల్వలు, పిల్ల కాల్వల భూ సేకరణకు ప్రభుత్వానికి సహకరించాలన్నారు. ఎంతోమంది రైతుల త్యాగాల ఫలితమే ఈ కాళేశ్వరమని చెప్పారు. తెరాస పాలనలో రైతు రాజ్యం వచ్చిందని మంత్రి వెల్లడించారు.

ఇదీ చూడండి : ఈ ఏడాది ఖైరతాబాద్​ వినాయకుడు ఎత్తు ఒక్క అడుగే!