తహసీల్దార్ విజయారెడ్డి​ హత్య వెనుక ఎవరి ప్రమేయం ఉంది?

రాష్ట్రమంతా... ఉలిక్కిపడేలా చేసిన తహసీల్దార్ విజయారెడ్డి​ సజీవ దహనం ఘటనపై పోలీసులు దర్యాప్తు ముమ్మరం చేశారు. అసలు ఈ కేసులో నిందింతుని వెనక ఎవరైనా ఉన్నారా... అనే కోణంతో పాటు నిందితుని నేపథ్యంపై లోతైన విచారణ సాగుతోంది. మరోవైపు నిందితుడు సురేశ్  పరిస్థితి విషమంగా ఉంది. ఇదే అదునుగా... ఎన్నో భూవివాదాలు వెలుగుచూస్తున్నాయి.

అబ్దుల్లాపూర్​మెట్ తహసీల్దార్ విజయారెడ్డి హత్య కేసులో పోలీసుల దర్యాప్తు కొనసాగుతోంది. నిందితుడు సురేశ్ బంధువులను అధికారులు లోతుగా విచారిస్తున్నారు. భూ వివాదమే హత్యకు దారితీసిందని నిర్ధరణకు వచ్చిన పోలీసులు... బాచారం, గౌరెల్లి గ్రామాల్లో స్థానికుల నుంచి వివరాలు సేకరిస్తున్నారు.

ఎవరిదైనా ప్రోద్బలముందా...?

మరోవైపు ఘటనలో తీవ్ర గాయాలపాలై ఉస్మానియా ఆస్పత్రిలో చికిత్స పొందుతున్న నిందితుడు సురేశ్​ పరిస్థితి విషమంగా ఉందని వైద్యులు తెలిపారు. దాడికి సంబంధించి సురేశ్ వెనుక ఎవరి ప్రమేయం, ప్రోద్బలం ఉందనే కోణంలో పోలీసులు విచారణ జరుపుతున్నారు. ఈ ఘటనలో గాయపడిన అటెండర్​ చంద్రయ్య, రైతుకు అపోలో ఆస్పత్రిలో చికిత్స అందిస్తున్నారు.

తహసీల్దార్ హత్యతో శివారు ప్రాంతాల్లో భూవివాదాలు ఒక్కొటిగా వెలుగులోకి వస్తున్నాయి. ఈ హత్యతో స్థానిక అధికార ప్రతిపక్ష నేతలు ఒకరిపై ఒకరు ఆరోపణలు చేసుకుంటున్నారు.

ఇదీ చూడండి: వాయుకాలుష్యం ధాటికి మాస్కులు ధరిస్తున్న దేవుళ్లు